پڕ نەبێ جامی بەتاڵم تا ڪەی؟
نەشەڪێ باڵی خەیاڵم تا کەی؟
هاوسەر و دەستەملانی ژانم
گیانەڪەم، نایەوە باڵم تا ڪەی؟
شەو لە تاریڪی و بێدەنگیدا
ڕۆژەڪەم، بۆ تۆ بناڵم تا ڪەی؟
هەر لە یادی سەری بسڪت دابم
گیانە، ئاشوفتە بێ حاڵم تا ڪەی؟
هەر منەتباری شەراب و مەی بم
حەسرەتی چاوے ڪەژاڵم تا ڪەی؟
هەر لە ماچی دەمەڪەت بێبەش بم؟
لێوے وشڪ و دەمی تاڵم تا ڪەی؟
هەوەسی گەستنی ڪوڵمەم تا چەند؟
ئارەزووی مشتنی خاڵم تا ڪەی؟
شینە میوانی شەوانی دووریم
شادے، ڕوو ناڪەیە ماڵم تا ڪەی؟
من لە دووڕەنگی بە دڵ بێزارم
ڕەنگی زەرد، دیدەیی ئاڵم تا ڪەی؟
من وەڪوو هەنگێ هەڵاڵەم مشتوون
ژینی نێو گەند و هەڵاڵم تا ڪەی؟
من بەشێلانی چەمەن ڕاهاتم
هاتوچۆی نێو دڕ و داڵم تا ڪەی؟
بۆ سەرینچاوە و ڪانیاوی ڕوون
هەڵوەرێ ئەشڪی زوڵاڵم تا ڪەی؟
من هەڵۆ بووم و چیا هێلانەم
ژێر چەپۆڪی قەل و داڵم تا ڪەی؟
قەفەزے دژمنی بەدخوودے دڵڕەق
هەڵوەرێنێ پەڕ و باڵم تا ڪەی؟
سەرە نێزەی ستەم و زۆرداری
بنجنێ سینگی مەتاڵم تا ڪەی؟
گورگی بێدادی لە گیانم بەربوو
ئێشی جێ گاز و قەپاڵم تا ڪەی؟
من پەلەقاژە و هاوارێ نەڪەم
ئەو بڵێ زاڵم و زاڵم تا ڪەی؟
ڪوتڪی بێدادی هەر بڪوتێ ڪاسە سەرم
ڪار نەڪا دەست و زوخاڵم تا ڪەی؟
ئەو ڪە زاری ڕقی دەرڪێشاوە
من زمان بەستە و لاڵم تا ڪەی؟
پۆشتە و تێر و پڕ و خۆش لەوەڕە
برسی و ڕووت و ڕەجاڵم تا ڪەی؟
تەم و مژ، بەندەن و دەشتی گرتم
هەڵنەڪا سروە شەماڵم تا ڪەی؟
بەس نەبێ دەسبەسەریو دەربەدەری
نەچمەوە نێو ڪوڕ و ڪاڵم تا ڪەی؟
باخەوانانی جیهان پێم ناڵێن
بۆ وەری میوەیی ڪاڵم تا ڪەی؟
مانگ و مێریخی دەپێوێ ئینسان
منی ڪورد، زیندە بە چاڵم تا ڪەی؟
چاوەڕێی تیشڪی هەتاوی هیوام
نەڕەوێ هەور و گەواڵم تا ڪەی؟
مامۆستا هێمن
@kurdistan_mamosta
