حتى الكجر يوم ضربو بمبان ما وعوا ، انو الضرب كان ليك بخور ..
يايابا تبرا من الضرب ، والبضربك حتماً بجور ..
ما كانو واعين بالحصل ، ما شافو يوم زولاً جسور ..
بس دا القدر جابهم إليك ، وانتا البتهتف ودار تثور ..
****
ولو عرفو يا يابا الحصل ، إنو البلد وقعت عديل ..
يوماتي ماشة على الحضيض ، يوماتي دمعاتك تسيل ..
حق الملاح ما بكفّي زاد ، والشيل عليك أصبح تقيل ..
يا يابا أولاد الحرام ، سرقو البلد زي الدخيل ..
****
يوماتي برفعو سعرهم ، وبنزلو في سعر الأجر ..
يوماتي زايدين الهموم ، يوماتي زايدين في الجبر ..
والعِيشة غالية وما بتقيف ، والناس دي حالا ولا بسر ..
وانتا الضعيف مكسور جناح ، وتواسي نفسك بالصبر ..
****
بس لي متين ح نكون سكات ، وح نعيش دوام عيشة ودار ؟
بس لي متين ح نكون حضور ، يوماتي في نفس المدار ؟
بس لي متين نصمت إذاً ، والعِيشة حارة ووالعة نار ؟
أمرق معاي يا أبوي دوام ، وجّهني في نفس المسار ..
شاركني قول الحق يا حاج ، وإختار معاي نفس القرار ..
لابد تكون الثورة حق ، والثورة نور والثورة نار ..
واحد ولا بنقبل رجوع ، اتنين ولا بنحمل ودار ..
وصغارنا ملهوفين عليك ، ثايرين مع الناس الكبار ..
عفواً أبوي حق العلاج ، بجيك ح نجني الثمار ..
وح تقول أيا ولدي الكبير ، والجو ح يصفا من العكار ..
وتعيش معاي حرية جد ، يا أبويا ح نجني الثمار ..
