بسم الله الرحمن الرحيم

مسلم سفير حسين ... ينطي الوجه لاوَين ؟!
بالكوفة غَريب
بس طوعة ماكو انصار ... صارتله ذو الفقّار
وكَفت للحبيب

صوت السفير ... مات الضمير
___

هذا مسلم يالتطالِع سيرته
جفوف حمّاي الحميّة الربّته
اشتره دينه وباع عالحَكَ ركَبتّه
الكوفة ميّت مستحاها وغدرته

يا للأسف غدروه ... والكاتبّوا خانوه
نقظوا بالوعود
موقف يشيّب الراس ... لو حاظر العبّاس
جا عنّه يذود

ما مِن نصير ... مات الضمير
___

الكَالت [اقْدِم] كلها ضِد مسلم صفت
جم رسالة وجم رسالة وما وفت ؟!
جنود كلها تحشّدت يمّه ولِفَت
بس ولا واحد لكَه مِنْ التفت

بليلة وضُحاها انخان ... هذا الوضع ما هان
يبقه لوحدّه
زمطوله بالآلاف ... لا ما نِذِل ونخاف
عينك شاهدّة

بس بالأخير ... مات الضمير
___

إحساس غُربة وحيل يصعب منظره
إكَبال بيت الحُرّة طوعة الطاهرّة
واكَف هنا المن وآني مرة ؟!
مِنْ درت بي كَالت ارجو المعذرة

إعذرني يا مولاي ... يا زمزم اشرب ماي
شفتك ذابلّة
إدخل وشَرْف البيت ... واتخصني انَه تمنيت
هاي المنزلّة

عند الكثير ... مات الضمير
___

سِمَع وَقْع الخيل واستل صارمّه
وبقتاله تذكّروا حامي الحمه
ما كِسَر أي ظلع يوم الملحمّة
ما يسوّيها كرامة لفاطمّة

مِنْ سِنَد ظهره يريد ... طاقة قتاله تزيد
أسروه بالغدر
يحجي ويصب العين ... باجر باخوي حسين
شيسوّي الشمر ؟!

يذْبَح شَبير ... مات الضمير
___

ما رِجَف ويصيح ضحّيت العُمُر
بكَلبه يحجي والدمع ينزل جَمُر
أهون اتيّسر ومِنْ فوكَ انْشُمُر
ولا تروح الحُرّة باجر باليسُّر

بحبل انسحب ممنون ... لكن بجف ام عون
لا يلتف حبل
كَلبي شكثر محروكَ ... باجر تطب السوكَ
زينب عالهزل

واقِع مَرير ...مات الضمير


الحَمدُ لله والشكر والفضل والمنّة
[ هَذَا مِنْ فَضْلِ رَبِّي ]
بركات الكفيل سلام الله عليه
#رزقهم_سلام_الله_عليهم
حيدر الموسّوي