Dasturchi

Dasturlashning front-end yo’nalishi bo’yicha boshlang’ich asoslarini o’rganib, katta hayotga qadam qo’yayotganlarga kichkina eslatma!

Frontend dasturchilar HTML, CSS(SCSS, SASS va hakozo) va JS’dan foydalangan holda kamida 5-6 ta sahifasi bo’lgan 20 ta loyihani verstallashtiringlar, so’ngra veb ilovalar freymvorkidan (VueJS, NuxtJS, React, Angular va hakozo) foydalangan holda eng kamida 15 ta loyihani front qismini ishlab chiqing, bunda ohirgi 5 ta loyiha jamoa shaklida amalga oshirilishiga alohida e’tibor bering.

Xo’sh, shularni bajarganizdan so’ng bitta LMS, bitta ombor tizimi va bitta e-commerce loyihani bir o’zingiz uyda bajaring.

Har bir bosqichni startap qilayotgan jamoa yoki davlat tashkilotida emas, kuchli jamoaga ega biror bir IT kompaniya yoki aynan kuchli mutaxasislar yetishtirib chiqargan insonni ustoz deb tutib, katta yuklamalar(nagruzkalar) qo’yganda ham sabr bilan harakat qiling. In Sha Alloh, sizdan insoniyatga kerakli bo’lgan yaxshi mutaxassis yetishib chiqadi.

Quyidagilarni unutmang:
1. Ustozingizni aytganini vaqtidan oldin bajarishga doim harakat qiling;
2. Agar biror korxonada bo’lsangiz atrofingizdagilarga bilganizni o’rgating garchi ular buni bilishsada;
3. Loyihangizdan rostan foydalanadigan tadbirkorlarga bepulga loyiha qilib bering va albatta ulardan qog’oz shaklida yozma feedback oling;
4. Ishonchli va kuchli mutaxassislar yig’ilgan jamoaning a’zosi bo’lish uchun tinimsiz harakatda bo’ling;
5. Pul muhim narsa emas, doim unutmang;
6. Yetarlicha daromad topish uchun sizni bilimingizga ishonadiganlarni ko’paytiring;
7. Sabrli bo’ling, sizni baxtga shu yetaklaydi.

P.S. Yana ko’plab gaplarim bor edi, tez orada yana bilganlarimni ulashish uchun ko’proq vaqt ajratib yanada mazmunli va foydali postlar yozishga harakat qilaman.

Post foydali bo’lsa yaqinlaringizga ulashing, siz bilan dasturchi, Alisher Tojiev

Jamoamiz bilan tashkil qilgan Telegram bot kurslarini YouTubeʼga joyladik

Ushbu kursda oflayn oʻqish uchun jami 200 dan oshiq arizalar kelib tushgan edi.

Lekin faqatgina 28 nafar oʻquvchigina kursda oʻqiy olgan edi. Bizdan koʻpchilik kursni videoga olishni va uni onlayn koʻrish imkonini tashkil qilishni soʻradi.

Diqqat! Bu videolar boshlangʻichlar uchun emas! Dasturlash sohasidan fundamental bilimlaringiz boʻlishi lozim.

🎞 Videolar bu yerda

Bepul darslar tashabusskori - @AkhmatovichUz

Maktab, litsey va kollejlar, hatto institut va universitetlarda ham tez-tez tadbirlar boʻlib turadi. Ilmiy musobaqa va shu kabi foydalilarini hisobga olmaganda bu tadbirlarning aksari tepadan kelgan buyruqlar yoki shunchaki hisobot uchun oʻtkaziladi. Qizigʻi shundaki, bu kabi keraksiz narsalar uchun yaxshigina mablagʻ ajratiladi, qatnashuvchi talabalar uzoq vaqt darslardan ozod qilinadi, hatto payti kelsa baholari ham qoʻyib beriladi, lekin bularning bari oʻquvchi va talabalarning umri, vaqti evaziga amalga oshiriladi.

Firkrimni yanada ochiqroq aytsam, hisobot toʻldirish uchungina oʻtkaziladigan bu kabi tadbirlar uchun eng iqtidorli va eng yaxshi oʻquvchilar, kelajakda katta-katta ishlar qilishi umid qilinadigan yigit-qizlar tanlab olinadi. Ular esa butun oʻquv yilini sahnalarda oʻtkazadi, shaharma-shahar kezib, sheʼr va ashula aytish bilan ovora boʻladi. Ularga bu ishlari kelajakda foyda qilishi, universitetga kirishda yoki boshqa narsalarda manfaat berishi uqtiriladi, kerakli shaxs ekanliklari onglariga singdiriladi. Borib-borib talabaning oʻzi ham bunga ishonib qoladi, men eng manfaatli ishlarni qilyapman, deb oʻylay boshlaydi.

Aslida esa u sahnada hayajon bilan sheʼr oʻqiyotgan payti undan biroz orqada qolgan, oʻrtacha iqtidor egasi boʻlganlar oʻz ustida qattiq ishlayotgan, kelajagi uchun harakat qilayotgan va qisqacha aytganda umrini kitob ustida oʻtkazayotgan boʻladi. Natijada, tadbir oʻtkazishda mohir boʻlgan oʻz vaqtining eng iqtidorli talabalari bir necha yillardan soʻng ortda qolib ketgan, panada oʻz ustida ishlaganlar esa ulardan ancha oldinga oʻtib ketgan boʻladi.

Toʻgʻri, bu kabi tadbirlar orqali doʻstlar orttirish, nutqni rivojlantirish va shu kabi foydalar olish mumkin, lekin bu kelajakda qaytib kelmaydigan muhim darslar evaziga amalga oshilishi achinarli holat va bu "foyda" kelajakda keladigan zarar oldida dengizdan tomchidek gap. Oddiyroq qilib aytganda, bular sizga birni beradi, lekin sizdan oʻn, balki yuzni tortib oladi. Sizni diplomi bor, lekin yaroqsiz mutaxassisga aylantiradi.

Bu ishlar kelajagingizga hech qanday foyda keltirmaydi. Sizni bu tadbirlarga ruhlantirgan, balandparvoz nutqlaringizga qarsak chalgan va ogʻzi koʻpirib maqtaganlar shunchaki sizdan foydalanishadi, xolos. Kun kelib muvaffaqiyatsizlikdan siqilgan va sizga berilgan vaʼdalar yolgʻon ekanini anglaganingizda uning koʻzlarida avvalgi mehrli qarashlarni emas, sizga gʻirt begona insonni koʻrasiz.

Shunday ekan, qadrli ukam, singlim va doʻstim! Yuqorida aytilganlarni qisman oʻz boshidan oʻtkazgan yoki boshqalarda shunday boʻlganini kuzatgan va "tavba qilgan" bir tengdoshingiz sifatida sizga shuni aytamanki, bu kabi bekorchi tadbirlardan imkon qadar oʻzingizni olib qoching, eng foydalilarigagina qatnashing. Qaysi paytda yoʻq deya olish kerakligini biling. Sizga beradigan foydasi va zararini taroziga qoʻyib, hisob-kitob qiling va oʻylab koʻring. Agar keraksiz deb bilsangiz oʻqishingizdan chalgʻimang, juda boʻsh qolib ketsangiz repetitorga qatnang, kasb oʻrganing, sport bilan shugʻullaning yoki biror foydali narsa tomosha qiling. Shundagina Alloh nasib qilsa kelajakda katta ishlarni amalga oshirasiz, kerakli insonga aylanasiz. Harakat bizdan, natija esa Allohdan...

📌 @Iysoxon