يا هلالاً للبكـاء قد فجعتَ الأولياء
***
يا هلال من الأزل شايل الم
تنرسم دمعه على أعيون الأمم
يا محرم للدمه ظل يجري دم
كلُ منْ فوقَ السماء
يا هلالا للبكاء
***
يا هلالاً بالأفق چنك جرح
تنرسم چن سيف ويريد الذبح
يا نحر حزيت لو ردنه الشرح
نحرَ سيد الأنبياء
يا هلالا للبكاء
***
يا هلال ومن تهل فوگ العباد
تحِرم الأحباب بثياب السواد
تنوح لجل الفاجعه السبعه الشداد
وأتى منها النداء
يا هلالا للبكاء
***
يا هلال ابطلعتك تبچي السور
لن كتاب الله حزوله النحر
اختلط دم حسين وي دم الفجر
وبكى الكونُ دماء
يا هلالا للبكاء
يا هلالاً قد بكى منهُ الرسول
وبكى الكرارَ بالدمعِ الهطول
يا هلالا قد رمى قلبَ البتول
يومَ كربٍ وبلاء
يا هلالا للبكاء
***
يا هلال النوح يجري بطلعتك
گلي بالله شلون زينب شافتك
چنهه لا هليت بالطف نادتك
قد هوى فيك اللواء
يا هلالا للبكاء
***
ريت لا هليت لا عيني تشوف
طلعتك يهلال في يوم الطفوف
تلگتك عيناي بالدمع الذروف
فيكَ قد جلَ العزاء
يا هلالا للبكاء
***
الشاعر
موسى البديري
2012
