Next Episode, Please!

Variety versiyasiga ko'ra 2024-yilning eng yomon 10 seriali

Variety nashrining ikki tanqidchisining versiyasiga ko'ra, desak aniqroq bo'lsa kerak. Lekin "Sugar" haqida u qadar yomon fikrlar o'qimagandim. Ko'rgandan keyin baho beramiz endi.

➡️Please!

"Присяжный № 2" — adolat yoki shaxsiy xavfsizlik?

Qariya Klint Istvud 94 yoshida ham film suratga olishda davom etmoqda. Qoyil qolishga arziydi. Klint Istvud tomonidan suratga olingan "Присяжный № 2" ('Juror No. 2') nomli filmni tomosha qilishimga [1] uning rejissyor ekanligi, [2] ushbu filmda Nikolas Holt asosiy rolni ijro etganligi, [3] yaxshi reyting (IMDBda — 7,1) va [4] filmga yozilgan qiziqarli sinopsis sababchi bo'ldi.

Filmning sinopsisini o'qisangiz, menimcha siz ham qiziqib qolasiz:

"Yaqinda ota bo'lishi tug'ilishi kutilayotgan oddiy fuqaro Jastin Kempni sud jarayoniga "prisyajniy" (sudlarda oddiy fuqarolar ichidan tanlab olinadigan sud maslahatchilari guruhi) sifatida tanlanadi. Ishning dastlabki ko'rib chiqilishida, tafsilotlarni eshitib, Jastin og‘ir bir dilemmaga duch keladi".

Ushbu filming sinopsisidan tashqari undagi aktyorlar tarkibi ham meni o'ziga tortdi: Nikolas Holt, J.K. Simmons (ko'pchilikka "Spider-Man" [2002], "Whiplash" filmlari orqali mashhur) , Zoi Doych, Toni Kolett.

Xo'sh, filmda qanday axloqiy masala ko'tarilishini, uning ilk 12 daqiqasidayoq tushunasiz. Shuning uchun, ushbu dilemmani batafsilroq tushuntirsam ham spoyler bo'lmaydi deb o'ylayman:

Tasavvur qiling, jala quyayotgan paytda, siz mashinangizda uyga ketayapsiz. Shunday quyayaptiki, hech narsa ko'rinmaydi. Ko'prik ustidan o'tayotganingizda siz nimanidir urib yuborgandek bo'ldingiz, birdan to'xtab, mashinadan tushib uyoq-buyoqni qaragan bo'ldingiz, hech narsa (hech kim) ko'rinmadi. Yo'lni chetida "ehtiyot bo'ling, kiyiklar" degan mazmundagi yo'l belgisini ko'rdingiz. Ehtimol, kiyikni urib yuborgan bo'lsam kerak, deb survordingiz. Oradan deyarli bir yil o'tib, taqdir taqazosi bilan sizni oddiy fuqaro sifatida qotillik bo'yicha sud ishiga sud maslahatchilari kengashiga (prisyajniy) chaqirishadi. Avvalo siz nega chaqirishganini ham bilmaysiz. Ammo o'sha sud ishida bir yigit bir qizni o'ldirganlikda ayblanayotgan bo'ladi. Qizning murdasi esa aynan o'sha kuni siz o'tgan ko'prik ostidan, boshi toshga urilib majag'langan holda topilgan bo'ladi. Lekin aynan o'sha kuni yigit sevgilisi bilan janjallashgani va ko'pchilik buning guvohi bo'lgani uchun uni aybdor deb topishadi. Siz bu yigitning aybdor emasligini bilasiz, lekin siz o'sha kuni bo'lgan voqeani ochiq-oydin so'zlab bersangiz, sizni qamashadi. Siz qanday yo'l tutgan bo'lardingiz? (ayolingiz homilador ekanligini, yaqinda farzandingiz tug'ilishini ham hisobga oling)

Ana dilemma-yu, mana dilemma. O'ylantiradigan kino ekan. Tavsiya qilaman. Klint Istvud film suratga olish uchun qiziq ssenariy tanlagan.

➡️Please!

"Venom: So'nggi raqs" rostan ham so'nggi raqsmi?

O'tgan kuni "Venom 3"ni tomosha qildim. Quyida ham bu film haqida, ham komiks olamidagi Venom haqida va bu filmning ehtimoliy davomi haqida bayon etaman. Fikrlarim bilan bir qatorda "Venom: The Last Dance" filmiga spoylerlar ham bo'lishi mumkin.

Spoylerlarni yashirib ketishga harakat qilaman. Bordi-yu siz bu filmni hali tomosha qilmagan bo'lsangiz, yashiringan jumlalarni ochmang.

Xo'sh, bu filmda bizga yangi yovuz qahramon — Nallni namoyish etishdi. Venom haqidagi komikslarga ko'ra u simbiontlar va turli mavjudotlarni yaratgan "xudo". (O'zi bilmasdan "mo'jiza" yaratib qo'ygan, keyin esa boshqa ixtirosi uchun uni o'ldirib undagi biror resursni olishni harakat qilgan obrazlar, doktorlar, xudolarni boshqa filmlar yoki seriallarda ham ko'rganmiz — syujet uchun yaxshi "tryuk"). Bu obrazning paydo bo'lishi, endi Marvel kinoolamida yangi syujet liniyasining yaratilishiga sabab bo'lishi mumkin.

Biz aslida Nallni emas, boshqa birovni kutgan edik (ha, albatta, Spider-Man`ni). Chunki oldingi filmda bunga ishora qilingandek bo'lgandi... Ha, mayli, demak Venom Spider-Man`nikiga mehmonga borarkan.

"Venom: So'nggi raqs"da film tugagandan so'ng bir emas, ikkita titrlar orti kadrlari mavjud. Bilasiz, Marvel filmlarida doimo shunday usullar qo'llaniladi, titrlardan so'ng ham albatta nimadir bo'ladi, odatda keyingi filmga ishora beriladi. (Hafa qiladigan tomoni, bu haqida ayrim kinoteatrdagilarning bilmasligi. Bir safar kinoteatrda "Doctor Strange 2"ni tomosha qilganimda titrlar boshlanishi bilan proyektorni o'chirib qo'yishgan).

"Venom 3"dagi titrlar orti kadrlarining ko'rsatishicha, hali hammasi tugagani yo'q, Venom boshqa inson tanasiga o'tib olishiga va uning hali qaytishiga ishora qilishgan. Demak, davomini kutamiz. "Venom 4" ishlanmagan taqdirda ham bu obrazni boshqa superqahramon haqidagi filmlarda chiqarishadi. Masalan... Spider-Man.

Shunday ekan, "Venom: So'nggi raqs" filmi, katta ehtimol bilan, Venom uchun emas, balki Tom Hardi uchun so'nggi raqs edi. Ya'ni Eddi Brok/Venom obrazidagi demoqchi edim (O tangrim, Tomni o'zing asra, men uning ishtirokida "Tabu" serialining 2-mavsumining chiqishiga hali ham umidvorman).

Xo'sh, bu filmni ko'rish kerakmi? Agar siz shu paytgacha Marvel filmlarini ko'rib kelayotgan bo'lsangiz, albatta ko'rishingiz kerak, chunki Marvel filmlari doimo bir-biri bilan bog'lab tashlanadi. Filmning o'ziga keladigan bo'lsak, oxirgi paytlarda superqahramonlar haqida ishlanayotgan ko'plab filmlardan yaxshiroq chiqqan. Ko'rish kerak!)

➡️Please!

"Substansiya". Go'zallik qurbonlik talab qiladi

Ko'pchilik tomonidan maqtalayotgan "Substansiya" ("Substance") filmini nihoyat ko'rishga qaror qildim.

Horror janridagi kinolarni kam ko'raman, undayam agar birorta horror ko'pchilik tomonidan maqtalsa, reytingi baland bo'lsa, qiziqqanimdan ko'raman. Bu film ham har joyda oldimdan chiqaverdi-chiqaverdi, menam tomosha qilishni ortga suraverdim-suraverdim... Oxiri bugun ko'rdim.

"Substansiya"ni 1 soatdan oshiqroq ko'rib (film 2 soat 20 daqiqa davom etadi), bu "ilmiy fantastikaku, buni nimasi horror ekan" degan fikr xayolimda aylandi. Lekin fransiyalik ayol kinorejissyor Korali Farja hammasini filmning oxiriga tayyorlab qo'ygan ekan.

Kino ajoyib, o'zgacha... Faqat shu qurg'urni eng daxshat joylarini ovqat yeb ko'ribmaney. Ovqat yeyotganimda hatto kinoni to'xtatib, davomini keyin ko'raman deb, multfilm ham qo'yib qo'ydim. Mayli, balki bo'rttirayotgandirman. Filmni faqat oxiri shunaqa. Lekin bu detallarini yig'ishtirib turib, syujet va mazmun tomonlama baholasak, kinoda juda jiddiy masala ko'tarilgan va chuqur ma'noga ega.

Aytishim joizki, 90-yillarda yulduzlik cho'qqisiga chiqqan Demi Murni yana kassabop filmlarda ko'rish quvonarli hol. Shuningdek, Margaret Kuolli ham o'z rolini yaxshi o'ynagan. Avvalroq bu aktrisani Yorgos Lantimosning filmlarida ko'rgan edim. Keyin bu filmda rol o'ynagan Dennis Queydning familiyasi tanish ko'rindi, adashmabman, bu aktyor "The Boys" ("Пацаны") serialida rol o'ynagan Jek Queydning otasi ekan.

Rejissyorga kelsak, Korali Farja ijodini o'rganaychi deb biroz u haqda izlansam, men avval uning boshqa filmini ham ko'rgan ekanman. 2017-yilda chiqqan, uning debyuti hisoblangan "Revenge" ("Выжившая") filmini ham ko'rganman. U filmi ham yomon emas (har holda talabalik davrimda ko'rganimda shunaqa tuyulgan).

Xullas, "Substansiya" menga yoqdi. Juda chuqur mazmunga ega. Lekin ogohlantiraman, film ko'ngli bo'shlar uchun emas.

➡️Please!

"Arcane"ning 1-mavsumi shunchaki 2-mavsumdagi voqealar uchun tayyorgarlik edi

#serial

Bugun "Arcane: League of Legends" multserialining 2-mavsumini ko'rib tugatdim (9 ta qismdan iborat). Bilasizmi, yo'qmi, Riot Games studiyasi tomonidan ishlab chiqarilgan "League of Legends" degan o'yin bor — ushbu multserial o'sha o'yin dunyosi asosida ishlangan. O'sha dunyo Arkeyn deb nomlanadi.

Multserial Netflix mahsuloti bo'lib, unda ilmiy fantastika va fentezi olami qorishib ketgan. 1-mavsumi 2021-yilda chiqqan edi. 1-mavsum menda o'rtacha taassurot qoldirgan edi. Bilsam, 1-mavsumdagi vaqealar rivoji 2-mavsum uchun tayyorgarlik ekan xolos. 2-mavsumda "time loop" (o'zbekchada "vaqt sirtmog'i" bo'lsa kerak) mavzusining olib chiqilishi menga ozgina "Dark" serialini eslatib yubordi (va parallel taqdirlar mavzusi aralashgani sabab ozgina "Loki"ni ham).

Umuman olganda 2-mavsum menga yoqdi. Lekin diqqat bilan ko'rmasangiz, chalkashib ketishingiz mumkin. Bundan tashqari, 1-mavsumni ancha oldin ko'rgan bo'lsangiz, voqealarni eslab olish uchun yana bir bor ko'rishni maslahat beraman.

Lekin "Arcane" Riot Games o'yinlari orasida men eng kutgan ekranizatsiya emas edi. Men "Valorant" o'yinining dunyosi haqida multserial suratga olinishini juda kutayapman.

Birinchidan, bu mening eng sevimli o'yinim. Ikkinchidan, Valorant dunyosida syujetlar liniyasi shunchalik qiziq va sirliki, undagi har bir qahramonning o'ziga xos tarixi, hikoyasi bor (o'yinini o'ynayotib buni tushunish qiyin, ammo YouTube orqali bu o'yin dunyosi haqida ko'plab videolar ko'rgach, bu alohida serial qilgulik alohida borliq ekanligini tushundim).

Xullas, fentezi va ilmiy-fantastika qorishmasini yoqtiradiganlarga "Arcane"ni ko'rishni tavsiya qilaman. 2-mavsum yaxshi chiqqan. Shu bilan birga, Riot Games yaqin yillarda "Valorant"ning ham ekranizatsiyasini e'lon qiladi degan umiddaman.

P.S. Shu serialgayam LGBT temasini qo'shishganey tavba, lekin syujetga shu shart emas edi.

➡️Please!

"Ozark" — boshqacha ko'rinishdagi "Breaking Bad"

#serial

Ora-sirada bir necha yil oldin chiqqan seriallarni ham ko'rib turaman. Oktabrda "Ozark" serialini ko'rishni boshlagandim.

Bu serial menga "Breaking Bad" ("Во все тяжкие") dagi atmosferani biroz eslatdi. Lekin menimcha "Ozark" serialining boshida asosiy qahramon Marti Byord "Breaking Bad"dagi Uolter Uaytga qaraganda o'limga ancha yaqinroq edi.

Marti Byord — moliyaviy maslahatchi, u qudratli narkokartelga "pulni yuvish"da yordam beradi. Ammo o'ziga bog'liq bo'lmagan sabablarga ko'ra, qiyin ahvolga tushib qoladi va oilasi bilan birgalikda, shahardagi hayotini tashlab, kam odam yashaydigan, qoloq bir hududga — Ozarkka ko'chishiga to'g'ri keladi. U bunday huvillab yotgan joyda millionlab "pullarni yuvishi" kerak (bir qarashda ilojsiz ish)...

Seriallarda temp tezkor bo'lsa, necha mavsumdan iborat bo'lishiga qaramay, bir nafasda ko'rib tashlayman. Misol uchun, "Taxtlar o'yini" — barcha mavsumini 3 hafta ichida tugatgandim. Lekin ba'zida voqealar sekin rivojlanadigan seriallar ham uchraydi, bularni uzoq vaqt ko'raman. Chunki orada zerikib, ikki mavsum orasida boshqa seriallarni ham tugatib olaman.

Boshida "Ozark" ham menga shunday seriallardan biridek tuyuldi. 1-mavsumining 8 ta qismini tomosha qilib, tashlab qo'ydim, orada bir necha bitta mavsumli seriallarni ko'rdim. Lekin "Ozark"ga yana qaytganimda, ayni zo'r joyida to'xtaganimni tushundim. 1-mavsumning oxirgi qismlari ancha kuchli chiqqan.

Hozir 2-mavsumini boshladim. Xullas, hozircha ayta olamanki, "Ozark" menga "Breaking Bad"dan olgan taassurotlarimni esga solayapti. Shu tipdagi seriallarning muxlislariga tavsiya qilaman. "Odnoznachno", ko'rish kerak.

Serial Netflix mahsuloti bo'lib, 1-mavsumi 2017-yilda chiqqan ekan. Jami 4 ta mavsum (oxirgisi 2022-yilda chiqqan).

➡️Please!

🐧 "Pingvin" Ozzning ko'tarilishi

#serial

"Pingvin" — DC Comics nashrining shu nomdagi personaji haqida suratga olingan serial. Osvald (Ozz) Kobblpot — Betmen dunyosidagi, ya'ni Gotham Citydagi eng yovuz personajlardan biri. Unga "Pingvin" laqabini — uning bir oyog'ida nuqsoni bo'lgani uchun pingvinlarga o'xshab yurishi sababli berishgan.

U Gothamning eng qoloq, "getto" hududida katta bo'lgan. Bolaligida go'yoki unda nimagadir erishish uchun hech qanday imkoniyat yo'qdek edi... Lekin oddiy bolakay asta-sekin "monstr"ga aylana boradi va vaqti kelib shaharning katta "figura"siga aylanadi. "Я создал монстра" degan mashhur ibora bor-ku, bu serialda o'sha "monstr"ni uning onasi yaratadi.

O'zi so'nggi paytlarda yovuz obrazlarni har tomondan ko'rsatib, unga nisbatan hamdardlik va simpatiya hissini uyg'otish serial va kinolarda ko'p qo'llaniladigan usul bo'lib qoldi. O'sha eski zamonlardagidek, personajlarni faqat bir tomonlama, faqat yovuz va faqat yaxshi obraz sifatida ko'rsatish endi zerikarli. Va bunday yondashuv endi hech kimni qiziqtirmaydi. (Garchi o'zimiznikilar buni hali ham davom ettirishayotgan bo'lishsa-da).

Shu jihatdan bu serialda ham obrazlar juda zo'r ochib berilgan. Bu yerda nafaqat bosh qahramonning, umuman barcha obrazlarning transformatsiyasini ko'rish mumkin.

Serial vizual tomondan ham puxta ishlangan, Gotham Cityning atmosferasini shunday his qilib o'tirasiz. Asosiy personaj rolini ijro etgan Kolin Farrelning grimchilari esa aktyorni mutlaqo boshqa insonga aylantirishgan, qoyil qolmasdan iloj yo'q.

Umuman olganda, serialni maqtashga arziydigan jihatlar ko'p. Bularni uzoq sanash mumkin. Lekin vazifam sifatida bu serial kimlarga yoqishini ham aytib o'tishim kerak. Shaxsan menga, mafiya va gansterlar haqidagi filmlarni sevib tomosha qiladigan inson sifatida bu serial juda yoqdi. Serial shuningdek Betmen va Joker haqidagi filmlarga, ularning dunyosi tasvirlangan asarlarga qiziqadigan insonlarga yoqadi.

📺 Bu serialni men shu tematikadagi boshqa shedevr seriallar orasiga qo'shib qo'yaman: "Boardwalk Empire" ("Подпольная империя"), "The Sopranos" ("Клан Сопрано"), "Taboo" ("Табу" [2017], asosiy rolni Tom Hardi o'ynagan), "Peaky Blinders" ("Острые козырьки").

Men uchun "Pingvin" — kriminal yo'nalishidagi yilning eng zo'r seriali.

➡️Please!

"Yovvoyi robot" — oxirgi paytlarda ko'rgan multfilmlarim ichida eng zo'ri

#multfilm

O'tgan oyda 'The Wild Robot', ya'ni "Yovvoyi robot" nomli multfilmni oilaviy tomosha qildik va ushbu shedevr hammamizga birdek yoqdi.

DreamWorks tomonidan taqdim etilgan ushbu multifilm yilning eng zo'r multfilmi (bu yil chiqqan "Boshqotirma 2", "Garfild kinoda", "Orion va zulmat" kabi ajoyib multfilmlarga hurmat bajo aylagan holda, albatta) degan nomga haqli.

Ushbu multfilm xatolik sababli o'rmonga tushib qolgan bir robot haqida hikoya qiladi. U insonlarga xizmat qilish uchun yaratilgan va ishga tushishi bilan atrofdagilardan buyruq kutadi. O'rmonda esa u nima qilishni bilmaydi va o'zining "mustaqil o'rganish" rejimini yoqib, o'rmonga quloq solgan holda, barcha jonzotlarning tilini o'rganadi... Spoyler qilib qo'ymasimdan to'xtay qolay.

Robot xuddi go'dak o'stirayotgan ona timsolida gavdalantirilgandek tuyuladi. Shuning uchun ham bu ijod mahsulini oila davrasida, ayniqsa farzandlar bilan tomosha qilish kerak. Farzandim biroz katta bo'lib, multfilmlarni tushuna boshlagach — ushbu shedevrni albatta unga ko'rsataman.

Siz ham yaxshisi, ko'p kutmasdan bugun kechqurun "Yovvoyi robot"ni tomosha qiling. Agar bu multfilmni allaqachon tomosha qilgan bo'lsangiz va shunga o'xshashroq "dobriy" multfilm ko'rishni xohlasangiz, 'Ronʼs Gone Wrong' ("Неисправимый Рон") yoki 'Big Hero 6' ("Город героев") kabi multfilmlarni qattiq tavsiya qilaman. Bular ham 'The Wild Robot'ga o'xshab shaxsiy TOPimdan joy olgan shedevrlar. Agar siz yuqoridagilarni tomosha qilgan bo'lsangiz, bu multfilmlar yoqqan-yoqmaganini bildirish uchun ushbu post ostida reaksiya qoldiring.

➡️Please!

"Trap" — manyakni tutish uchun qopqon
("Ловушка")

#kino

2024-yilda chiqqan filmlar orasida eng oxirgi ko'rganlarimni xotirlay boshlaganimda, mana shu film birinchi bo'lib xayolimga keldi.

Menga Nayt Shyamalanning filmlari doim yoqqan. Shuning uchun ham bu filmni tomosha qilishga qaror qilgandim. Film qiziqarli, boshidan oxirigacha sizni hayajonda ushlab turadi. O'zi bu rejissyorni barcha kinolari shunaqa. Shuning uchun, agar uning ijodi bilan tanish bo'lmasangiz, haliyam kech emas. Ayniqsa 'The Sixth Sense' ("Oltinchi hissiyot"), 'Split', 'Old' filmlaridan boshlashni tavsiya qilaman.

'Trap' filmi Shyamalanning shedevrlari orasiga kira oladimi yo'qmi, bir narsa deya olmayman. Lekin kinoda uning uslubi sezilib turadi. Menimcha, bir marta bo'lsa ham ko'rish kerak. Ayniqsa agar siz trillerlarni yoqtirsangiz, qahramonlar bilan birga havotirlanish hissi sizga begona bo'lmasa — bu film sizga yoqadi.

Ushbu filmda sevimli aktyorlarimdan biri Josh Xartnett asosiy rolni ijro etgan. Menga u rol o'ynagan 'Lucky Number Slevin' ("Счастливое число Слевина") filmi yoqqandi.

Postlarni shu filmdan boshlaganim va uni maqtaganim uchun darrov xulosa qilmanglar. Men juda rang-barang janrlar va tematikalardagi kinolarni ko'raman. Vaqt sayin hali barchasini ko'rib chiqamiz.

Bu filmni rafiqam bilan birga tomosha qilgandik va unga bunday filmlar juda yoqadi. Aslida o'zi kino bo'yicha qiziqishlarimiz kesishadigan kamsonli janr va tematika ham shu. Trillerlarni (jangari emas, aynan triller, bu ikkala yo'nalishni ko'pchilik adashtiradi) juda yaxshi ko'ramiz.

Shuning uchunmi, bu filmni juftingiz bilan bemalol tomosha qilishingiz mumkin. Menimcha qiziq taassurotlar olasizlar. Agar bir o'zingiz ko'rsangiz ham hechqisi yo'q. Hech narsa o'zgarmaydi — baribir tavsiya qilaman.

➡️Please!