Nisgilly sözler

بو گون گینه قار یاغیردی.
گینه ده پینتی نین دردلری باشینا باغیریردی !
باشماقلاری گیریق ،ایستی پالتاری یوخ ،بؤرکو یوخ ،......یوخ ،یوخ،یوخ.
گینه خارابالیقدان بیرجوت موشامبا آختاریب تاپاجاق آیاقلارینا گییه،بیر موشامبا تاپیب باشینا ،ایکیسین اللرینه.
آما او اوزونه گتیمه دی ،آناسیندان گونلوک ویدالاشیب ائودن چیخدی،کوچه نین باشیندا کی خارابالیغی گزیب آختاردیغین تاپیب یولا دوشدو.کند ایچینده کیمسه یوخودو ،یالنیز تاپدیق عمی توکانینین اؤنونده مانقالدا اؤت یاندیرمیشدی کورسویه قؤیماغا .
پینتی گئچیب اللرین قیزدیری،سؤنرا توکانین قاپیسندان سسلندی،تاپدیق عمی بو قاردونو من گؤتوره بوللم؟
نئنیسن بالا قاردونو ؟
هئچ ائله اوجوره سینه ایستیردیم.!
گؤتور.
قاردونون ایکی طرفینده قوللارینا یئر آچیب گئیدی اینینه ، سانکی بیر قاردون آدام اولموش .
هله بو قاردون یئلین قاباغین آلیر دیه رک یولا دوشدو.
کتدن ائششیه چیخاندا گؤردو بیر ماشین ساخلاییب ،اوستونده بیر اوتاغی وار ائله بیر ایکی دنه ال اونو ساخلاییب!!!
شوفور شوشه نی آشاغی یئندیریب پینتی نی چاغیردی .
پینتی یاخینا گئتدی.
باشدان آشاغا پینتی یه باخیب سؤروشدو :
حاج جاببارین مال خاناسی هایاندادی؟
پینتی دئدی ، کندین آشاغی طرفینده دی ،بویولدان گئدین مچید قاباغیندان ساغا دؤنون کوچه نین باشیندا مال خانادی.
سؤنرا سوروشدو ،سیز کیمسیز؟
او طرفده اوتوران دئدی : اوغول بیز کمیته دن گلمیشیق ،حاج جاببار دئییر ماللاریم ائشیحده قالیر اوشویورلر،ایستیریک مالخاناسین بؤیوتمئیه کومکلیق ائلییه ک .!!
پینتی بیر باخیب آغزین بوزوب یؤللاندی.
آلقورد

میللتیمیز هئی یانیر
طییاره ده
قاطاردا
پلاسکودا
گمیده
هئی باش ساغلیغی وئردیک
آما ساغالمادی باش
سئلده بوغولدو گئتدی
یا دئپرمده گؤمولدو
ایندی سو اؤرتاسیندا
الوولانیب وطن داش
یاسا سالیب آنانی
آتا،باجینی
قارداش
قارا بایراق آسیلدی
شاد نغمه لر کسیلدی
گینه ده باش ساغلیغی
گلیر ، گلیر آمما
باش ساغالمیر
ندندی؟
ندندی کی سؤنمورو
جانیمیزا دوشن اوت؟
یانیر میللت آماندی
تانری یاغیش رحمتین
یاغدیر ظولم اوتو سؤنسون
یاغیب دا سئله دؤنسون
ظولمو کؤچوندن سیلیب
یوردوموزدان گؤتورسون
آلقورد

گینه قانیم قایناییب
سالچالاندی اوره کده
دیلکلر کؤرپه له شیب
باغلی قالدی بلکده
دیلیم سو اولدو منیم
داشینیری الکده
هئی سوزولور ،داغیلیر
آدی قالدی دیلکده
تورک یازین ایستیینلر
اودوللری بیلکده
کلفجه لر تاخیلدی
چار میخلاری کورکده
گینه قانیم قاینادی
سالچالاندی اوره کده
آلقورد

خؤش گلیبسیز
گؤزلریمه ایشیق
اوره ییمه صفا
گتیرمیسیز🌺🌺🌺❤️❤️❤️

آتیشقانین دالیندا دوروب کؤله باخیردی،
بیر زامانلار گول ،چیچکلی باغییدی !
آغاجلار یوکونون چوخلوغوندان یؤرولوب باشین اییب یام یاشیل چیمنلری یاسدیق ائله ییب دینله نردیلر !!
اوزاقدا گؤم گؤی گؤلونن ، گؤی قوجاقلاشیب بیر بیرینه قؤووشاردیلار.
هر آخشام گونش اولارین بؤینونا قیزیل سیرغا سالیب آییراردی .
گؤلون گؤزل قؤخوسو گول چیچک قؤخوسویلا قاریشیب آدامی کئفلندیرردی.
چوخ اوزاق زامان ده ییردی ،پینتی نین یادینا گلیر ،ائله اوچ دؤرد ایل قاباغا جان اؤیله یدی!
آما ایندی آتیشقادان توت تاااا گؤلون باشینا جا یؤخ تا اؤلکه نین باش داشینا جا آغاریر ،سانکی آناخاتینین ساچلاری توکولوب یئر اوزونه !
پینتی آناسینا سسله نیب دئدی:
آنا گؤلون ده آتاسی اؤلوب ؟
نئجه اؤغول ؟
آخی آتام اؤلندن ائویمیز قوپ قورو قورویوب،سنین ساچلارین آق آپباق آغاردی!
گؤلونده اوچ دورد ایلده دؤوره سی قورویوب ،هر یئری آغاریبدی!!!
آلقورد

یاریم گئتدی
یاریم قالدی
دویغولاریم
آتیب گئتدی
ساتیب گئتدی
اوره گیمده
سئوگیلری
آیاقلایب،ازیشدیریب
قاتیب گئتدی
منده ده سئوگی دویغوسو
درده غمه
باتیب گئتدی
آلقورد

تؤپلومدا دورد چئشیت اینسان وار
۱_یوخلایانلار
۲_اوزونو یوخویا وورانلار
۳_اوزونو اؤیاق گؤسترنلر
۴_اویاقلار
دوردونجو قوروپ چالیشار اؤ بیری اوچ قوروپداکیلاری اویاتسین،!
یوخوداکین راحاتجا اویاندیرار
اوزونو یوخویا وورانی اویاندیرماق اولماز.
بو ایکی قوروپ قارا فهله دیلر!(سیاهی لشگر)
اوزونو اؤیاق گؤسترنلره،سوز قاندیرماق اولماز،اوزلرین عالیم بیلیب هئچ کسه قولاق وئرمزلر،!!!!!!!!

آه
کؤنلوم
آه

کؤنول
کویر اولوب
سنسیزلیگیمده
سنی سندن آلیب
ساخلایانمادیم
سنسه مندن منی
چالیب آپاردین
ایسته مه زدین منی
قؤپاریب آتدین
قاپیوین تابانیندا
آیاقلادین
ازدین منی اوردا
سوواشیب قالدیم
هر گون آیاغیوین
آلتین اؤپورم
منسه بوشالدی ایچیم
بؤشا بؤشونا
بوردا یالنیز قالیب
حسرت چکیرم
آلقورد

کند اهلی ییغیشمیشدی مچیده ، فرماندار گلیب دانیشاجاغیدی.
کاتی دئییردی هامی فرمانداردان ایستییک کی بیزیم کندین اوسته کی چشمه دن سو پایین آییریب اؤتورسونلر گلسین ،آخی اوردا او غریبه گلیب یئر آلیب باغ اکدیگیندن بویانا ،نه کتده چشمه قالیب ، نده اوسته کی چشمه لردن سو گلیر کنده .!!
هم قویو ویریب یئردن سو چکیر ،همده چشمه لرین اؤنون باغلاییب ایکی کندی سوسوز قؤیوب.
فرماندار بیر نئچه نفریلن گلیب مچیدین یوخاری باشیندا اؤتوردولار .
تاری قولو گتیریب چای توتدو ،هره سی بیرین گؤتوروب قؤیدولار یئره.
پینتی ده قند توتوردو.
بیری الینده بیر گوشی اوینادیردی هی بارماغین سورتوردو صفه سینه دئیینیردی ، تلگرام دا فیلتر لندی،بو زه هر اولموش فیلتر سیندیراندا ایشله میرکی آخی .....
عمو قندیزی گؤتورون .
باشین قؤوزاییب پینتی یه باشدان آشاغی گؤز سالدی،بیر گیریق ره روفو گئتمیش بولوز گئیمیشدی ،دیزلری یاماقلی شالوار ،آیاغیندا بیر تاییندان بارماغی جورابدان ائشیکده، بیری تایینین دابانی!
بو اوشاق بوردا نئنیر ! بونون اوخولدا اولماسی گره کیر!!
قندی گؤتوره گؤتوره یاواشجا دئدی ؛
دوز دئییسیز بولاری فیلتر ائلیین با.
پینتی باش تاپمادی اونون سؤزوندن .
فرماندار میکروفونو گؤتوروب ،باشلادی دانیشماغا ، سودان ،گؤلدن ،دوزدان سؤز آپاردی .
میللت ده او غریبه نین گلن گوندن بو ایکی کندین سویونون کسیلمه سین دئدیلر ، کؤللرینین،باغلارینین قورویوب آرادان گئتمه سین ، جاوانلارین ایشسیز قالیب ،کتدن گئتمه لرین ، کتده یالنیز اوشاقلارینان قؤجالارین قالماسی .....
اؤ جاوان آقا دا گوشیسینن ساواشیردی ، فیلتر ،فیلتر دئیب سؤیلنیردی!
اورمو گؤلونه سو فیلتر اولوب قالیب سدلرده،کوللره چشمه لر فیلتر اولوب، کتلر جاوانلاردان،کاسیبلار یاشامدان،
اوشاقلار اؤخولدان،میللتلر دیلیندن ، بولوتلاردا بوردا فیلتر اولوبلار.......

پینتی اؤتورموشدو اونون اؤنونده باخیردی اوزونه ،باش تاپمیردی نه دئییر.
_بیر گوجلو فیلتر سیندیران ایستیر !!
پینتی دئدی ،کاتی سیندیرار اؤ بوردا هامیدان گوجلودو ، آنام دئییر مچیدین داشلارین تکینه بیر گونده سیندیریبدی!!
اؤ جاوان باخیب پینتی نین اوزونه ،بیر آجی گولوشله دئدی:
یوخ گؤزل اوغلان داها دا گوجلوسین ایستیر!!!!!!!!
آلقورد

ایچیمدن ایچیمی آلا بولمه دیم
باخ «یئییب قورتاریر٬
ایچیم ایچیمی»
نه قؤرخو
نه اؤزلم
نه ده دویغو وار
اوره گیم کیرپینیر
بوشا بوشونا
نه اؤزوم سئویرم
بویله یاشامی
نه ده هئچ تانرینین
گه لر خوشونا
گره کیر دئوریمین
دوزه نین پوزاق
یئنی بیر یاشامین
قایداسین یازاق
آلقورد

گؤزومو تیکمیشم
تانری الینه
یالواریرام
باخیشلاریم گؤیده دی
یا گله بولوتلار
یا گؤی دلینه
قار یاغیشی تؤکه
آزربایجانا
آلیشارام سئلینه،بورانینا
بو گؤلون باشیندا
دوروب عزرائیل
واقت قالیر؟!
نئچه آی ؟
نئچه ایل؟
اولنده گله جک صورون چالاجاق
اسرافیل گلنده محشر اولاجاق
گؤل شوعار اولوبدو
ساتقین،مانقوردا
گؤزومو چکمیشم ،
نیظامدان داها
آزربایجانا
وئرمه دی هئچ، باها
گون به گون ایشلری آتدی صاباها
عدالت قورشاغین ساریب بئلینه!!!!!!!
دیلیمی تیکدیلر
منده گؤزومو
یوخویا وورموشام
ایندی اؤزومو
بؤغازیم قورویوب
دانیشانمیرام
دییه بولمورم کیمسیه سؤزومو
نه قده ر قالیر یوردومون دؤزومو؟!
توکنیبدی داها
یومور گؤزونو
سطیل سطیل سویون
چکیب ساتمیشیق
باغیندا ،مئشه سینده
یاد سوروسون
اؤتاردیق قالمادی
یئشیللکدن ایز
قاریش قاریش توپراق
ساتیب قورتاردیق
یوردومون آز قالیر،آدی سیلینه!!؟؟
داها گلمییه جک ائلین دیلینه
آلقورد

سؤن دوراق
بو قاطار چوخ اوزون
یؤل سوروب گلیب
سانکی ایندی چاتیب
دوراق دا دورور
هر دوراقدا بیر بیر
آیریلیب دوشدوک
بیرینده همدان
بیرینده تهران
ساوا،قزوین،سینانداش
دوشدو قالدی
قوم ،بیجار،آستارا
انزلی گئتدی
شیمدی سانکی بیزده
سؤن دوراقداییق
اورمو ،تبریز
گئدیر زنگان ،اردبیل
هانسی تئز دوشجک
ایندی قاطاردان
آزربایجان دوشوب
دارما داغیندی
هر دوراقدا
قارداش قارداشدان اولدو
آیریلیقدا قالیب
سارالدی سولدو
آدینی ده ییشیب
سؤی آدی قالیر
یالنیز بو اوره گین
دردینی آلیر
آلقورد

بیر عوموردور تؤکولور
قورقوشوم بؤغازیما
گینه جیح گلمیری
قیسمت
منه هی بورک دوشورو
سورتولوب لاب زیلان اولدوم
قالمادی یان دؤره منه
آما آلچی نیه گلمیر
منه تؤوخان دوشورو
ساققا سنده
پئش اولوبسان
منه گلدین جوت قریج
سولاق الده چیرتا بیلمیر
سنه حیلله دوشورو
نه جیزیقدان آتابیلدیم ائششییه
نه یازاندا قازانیبدی آشیغیم
آما سون آشیق
دولور
هله قورقوشوم آخیر
باخ نئجه آغیرلاشیر
آتارام
اوندا گؤررسن
بو آشیق دیک گله جک!!
سون آشیق دیک گله جک
آلقورد

پینتی پیس وضده اؤسگوروردو،آز قالیردی جییارلاری توکولسون ائشییه.
آناسی بیراز امنگ اؤمنجی دمله ییب گتیردی . ایچه ندن سونرا آزیجیق بؤغازی یوموشاندی.
دئدی آنا آز قالیر نفسیم کسیله نئینه ییم.
اؤغلوم بیراز دؤزوملو اوُل سحره بیر شئی قالمادی . گئده ک شهرده کی دؤقتور گؤره ک نه دئییر.
گون چیخیب یاییلمیشدی ، هر یئره آنا خاتین پینتی نین الیندن توتوب یؤللاندی،قارا یولون قیراغینا یئتیشیب دوردولار .
مینی بوس گلیب دایاندی ،ماشینا چیخیب بؤش صندل تاپیب اوتوردولار.
پینتی نین اؤسگورمه سی گینه توتدو، نفس چکمه سینه آمان وئرمیردی.
بیر گئنج قیز مینی بوسون دیبیندن اوزانیب بیر دنه حب وئریر :
بونو آت سینه وی یوموشاتسین .
پینتی حببی آتیب بیر قورتوم سو ایچیر.بیراز سؤنرا یوخویا دالیر.
قیز سؤروشور، آی آنا نه ییدی؟
دئییر بیر ایکی آیدی باشلییب اؤسگورمه یه ،ایکی گوندو ده بو جور بترله ییب داها نفسین کسیر.
دؤقتورا آپاریبسیز؟
یوخ ائله ائوده دمله مه لیدن زاددان وئرمیشم.
دونن آپاردیم درمانگاها دؤقتور یازدی تبریزه،بیلمیرم نه ییدی!!
قیز آلیب دفترچه یه باخیب دئدی،ائله منده بورا گئدیرم سیزه اوردا یاردیمجی اوللام.
آنا خاتینین آزیجیق دوداقلاری گولومسه دی.
قیز اولاری مریضخانییا آپاردی ، بیر قاپینین قاباغیندا دایاندیریب ایچه ری گیردی .سؤنرا اولاریدا چاغیردی .
اوستاد بولار منیم کؤیلولریمدی ،دئدیگیم کیمین بو اوشاق پیس وضده اؤسگورور .
پینتی نی تختین اوستونده یاتیردیب سینه سین ،کوره کلرین،بؤغازین ماینا ائله ییب دئدی . بونون سینه سی توخون جاق (حساس)اولوب ،بیر شئی ضرر ائلییر.
قیز دئدی ،اوستاد هاوادان اولماسین؟
دؤقتور دئدی اولار بو گونلر اورمو گؤلونون دوزلو تؤزو چؤخلارینی بو حالا سالیب ، ایللاه دا اوشاقلاری.
بوجور ایلرله سه گلن نسلیمیز آرادان گئده جک.
اوزوموز اؤلمه دن نسلیمیز کسیله جک.
آلقورد

آغیز منیم
بؤغاز منیم
دیل منیم
منیم سسیمین نه ییدی
سوسدورولوب توتساق اولوب
ندن سنین سسین گلیر
سسین بؤغازیمی دلیر
ندن منیم دانیشماغیم
سنه بؤیله آغیر گلیر
دیلیم سسیوی گوه لیر
سانما کی منی خفه لیر
بیر گون چیینه ییب آتاجاق
هئچ سسیوی اودمییاجاق
اوتدوغونو دا قوساجاق
آلقورد

ایرانین سوقاقلاری
قیشقیریر
اوتلانیب الولاری
گؤیه فیشقیریر
توستو دومان
بورولور دار کوچه لردن
باهالیقدان اؤخویور
گینه نیفرت توخویور
دوروشوبلار اوز اوزه
کوچه لر قان قوخویور
باغیریرلار،چیغیریرلار
هانی تبریز
هانی اورمو
آزربایجان دؤزه جکدی
اوره یین اوز مییه جکدی
سیزه قان وئرمییه جکدی
تبریزین سوقاقلاری
یالنیز
تورکده یالنیز
تورک تورکه سس وئره جکدی
آلقورد

اؤ گون پینتی اوشوتموشدو ،آخی تک بولوزونو آناسی یویاندان سورنرا گتیریب کورسونون آلتیندا قوروتماق ایسته میشدی.
گئجه نین بیر واقتی یانیق اییینه اویانیر ،کورسو یورقانین قؤوزاییر گورور پینتی نین بولوزو دوشوب حوزه حده اوتون اوستونه یاواش یاواش اریییر.
بولوزو گؤتورور آمما داها گئیمه لیلیکدن دوشموشدو.
اونا گؤره پینتی بیر دنه نازیک کؤینه گینن ایشه گئدیب یولدا سویوق جانینا اوتورموشدو.
گئیینمه اوتاغیندا پئنجین دیبینه سیغینمیشدی،تیتره ییردی.
حاج علی پینتی نین یؤخلوغونو آنلاییب اونو سوردو ، ایشچی باشی دئدی ،سحر گلمیشدی بیلمیرم هایاندادی.
حاج علی گئدیب بیر بیر اوتاقلارا باخدی.
گئیینمه اوداسینین قاپیسین آچیب ایچه ری باخدی ،اوردادا گؤرمه دی !
قاپینی باغلایاندا پینتی آسقیردی.
گیردی ایچری ،گؤردو پینتی سیخیلیب پونجون دالیندا تیتره ییر.یاخینا گئدیب الین قویدو پینتی نین آنلینا اوت وئریردی.
قاییدیب سالونا ایشچی باشین چاغیریب دئدی ،پینتی نوخوشلاییب گئت اونو آپار ائولرینه .
سئیفعلی گئدیب ،پینتی نین الیندن توتوب آیاغا قؤوزادی،آمما او آیاقدا دورانمیردی.
اؤنو چیینینه آتیب بیر کؤهنه حوله اوستونه چه کیب کارخانادان چیخدی.
کنده ساری یولا دوشدو.
حاج علی اونو دالیدان چاغیریب دئدی ،تئز اوتور ائولرینه قاییت ایشینه.
سئیفعلی هئچ نه دئمه دن یولونا دوام ائتدی.
پینتی تب ایچینده یانیردی،ائله کی سئفعلینین ده بیر طرفین ترله تمیشدی!
بیزار گئدندن سونرا سئیفعلی اوچ یولدا دوروب،بیر دالییا باخدی،بیر پینتی یه.
یولون ده ییشیب ،قونشو کندین یؤنونه دوشدو.
کنده یئتیشیب درمانگاها گئتدی،اوردا پینتی نی تاختین اوستونه سالیب دؤحتورو چاغیردی.
دؤحتورون باشی شولوغودو ،آما باشین قؤوزاییب باخاندا پینتی نی گؤروب وضعینین قولای اولماسین آنلادی .
باخدیغی نوخوشو یوللاندیریب گلدی.
الین پینتی نین آلنینا قؤیدو،ایینه وورانی چاغیردی دئدی بونو آپارین تزریقات اوتاغینا ،پالتارلارین چیخارین،من گلیم.
پینتی گؤزلرین آچیب اوزونو چیپلاق گورنده اوتانیب مله فه نی چکدی اوستونه،قولونا سئرم باغلامیشدیلار.
سئیفعلی اوتورموشدو یانیندا،ایینه ووران گلیب اونا دئدی دؤحتور سیزی چاغیریر.
سئیفعلی قاپینی چالیب ایچه ری گیردی.
_اؤغلونوزدو ؟
-یوخ کتلیمیزدی،تک آناسیلا قالیر .
باشماق کرخاناسیندا ایشله ییریک،اوردا نوخوشلامیشدی گوتوروب گتیرمیشم بورا.
_بیر هفته دینلنمه یی گرک ،بدنی چوخ ضعیفدی بیزار قووه لی یئمک یئمه لیدی ووجودو اوزون تاپسین.
-آغای دؤحتور کاسیبدیلار هاردان آلسینلار!
_شهره گئده بیلر سن می ؟
_آل بو کاغاذی گئت اورا ،یئرینی ده یازمیشام.
ایینه ووران گئدیب ائولریندن پینتی یه پالتار گتیرمیشدی اونو گئییندیریب،داوالارینی موشامبییا ییغیب ،واقتین،اندازاسین آنلادیب یوللاندیردی.

یولدا پینتی دئدی،
سئیفعلی عمی اللرین آغریماسین منی دوحتوره گتیردین آمما ایندی حاج علی سیزی ده ایشدن اوتوره جک!!!
آلقورد

یئنه یارامیزدان قابیق گؤتوردون
یئنه آلنیمیزی چاپیق گؤتوردون
یئنه تپیکله نن توپوق گؤتوردون
ساری یارامیزی قانیمیز گئدیر!
آی آلقورد! کس یولو جانیمیز گئدیر!
عقیل مرادی (ائلدار)

اوره ییمیز الیمیزده گزیریک
داش آلتینا قؤیوب اونو ازیریک
قانییلا اوز گؤزوموزو بزیریک
گولوش کوسوبدو اوزوموزدن گئدیر
یوردوموز ایتیر گؤزوموزدن گئدیر
آلقورد

دوز دئدین: "یورقانلی" قهرمانلاریق!
بیزه "پیخ!" دئسه لر، یاری جانلاریق!
هاچان آییلاریق؟ هاچان آنلاریق !
شوکتیمیز گئدیر! شانیمیز گئدیر!
آی آلقورد! کس یولو جانیمیز گئدیر!
عقیل مرادی (ائلدار)

گؤزده یاش دا قالماییب آغلاماغا
گؤزلریمیز کوسوبدو چاغلاماغا
گؤله گئدن سولاری ساغلاماغا
گؤل قورودو صبیر داشیمیز گئدیر
گؤل یوخ وطندن سیرداشیمیز گئدیر
آلقورد

آغلادیقدا, سیزلادیقدا اولمادی!
یان- یؤره نی سازلادیقدا اولمادی!
یارامیزی دوزلادیقدا اولمادی !
یادداشیمیز گئدیر! آنی میز گئدیر!
آی آلقورد! کس یولو جانیمیز گئدیر
عقیل مرادی (ائلدار)

یوردوموزدا،نه غریب یاشاییریق
نه اؤزگوروک ،نه اؤزگور دانیشیریق
یاشاییشیمیز یالنیز حایالدادی
دویغولاریمیز یانیر،آلیشیریق
دیلیمیز سانکی گئجه لر دیلیدی
گونوزلر دانیشانماییر اولودی(و)
دوزه نیمیز پوزولوبدو، دلیدی
یالنیز قارانلیقدا دیل چالیشیریق
قوروب ایلقارلیغی اؤزگه یه وئردیک
وار یوخوموزو آیاغینا سردیک اونودوب ،اؤنوموزده دایاندی دیک
یاواش یاواش اریییب قاریشیریق
بؤرکه کلاه دئییب قؤیدو باشیما
گؤیه سبزی دئییب سالدی آشیما
مینی یوز ائله ییب یازدی یاشیما
تورک ،آزری دییه بیز یاریشیریق
دیلیمیز تورک یوردوموز آزربایجان
قوروماغا هامی وئریر اونا جان
ساتقینلار ائله ییب اونو یاری جان
ایندی بیز ایچیمیزله ساواشیریق
آلقورد