هذا ياعيد اليهل عند اليتامه
حيدر ودمه صفه جوه العمامه

هذا ياعيد اليمر ..وبكلب زينب جمر
☆☆
هذا اول عيد بيه زينب وحيده
بلا ابو يحسين خويه انه اريده
نكعد انسولف احط راسي ع ايده
جني اسمع ناس تتصارخ بعيده

الظلم نفس الظلم..والهظم رد الهظم
والله اسمع صوت ايتام وظلامه
★★★
معرفت شنهي الجره ياخويه يحسين
ناس هوله تركض وچنهم مجانين
اسمعت صوت المنادي انطبر نصين
والدمه غطت جبينه وفاض صوبين

الالم هو الالم...سيف وبراسه انثلم
صرخت الوادم وين اهله وعمامه
★★★
خلاف ابوي اليوم ياوحشه الليالي
وضلت ايتامك تون حيدر يوالي
بويه عگبك يتمونه انهظم حالي
من كسر ضلع الزجيه وهسه غالي
العمل طاح للعمل..وراح يابويه الامل
والسبي يابويه بانت له علامه
★★★


وصه حيدر بالصلاة وباليتامه
والجرح ينزف دمه جوه العمامه
يگله بويه حسين رايح بالسلامه
باجر انت بكربله لطايح حسامه

من السقيفه هل جرح… راسي ابوي المنذبح
طبروالاسلام ياراعي الشهامه
★★★


صعبه يابويه لمره محتاجه ابوها
هاي صعبه ياخلگ كسرة اخوها
جبر والله تنجبر لو حاوطوها
بجيت الوالي لون مرو خذوها
وسفه بويه منطبر. ..هامته انفطرت فطر
اصيح بويه واندب ليوم القيامه
★★★

✍باقرجبار الشويلي