الشاعر زين العابدي العبودي

كل شوغه روحي تموت وتعيش
بيضه وصرت حدر الخفافيش
جمره وخوت راسي المناگيش
شابع چوي بموسم دراويش
ياحرمل اليچونه ويهيد

صاباني وكتي وماكلت ليش
ماعندي ريش وكلت بريش
أمنل مگفه شگيت الدشاديش
ناگص محنه الوكت وكتيش
انا الحنين النوك تقليد

ادموعي اصفهن ريز يم ريز
عارچت كلبي بلا حواجيز
اچيم بروحي الخبابيز
ماشيتهن دهليز دهليز
تهيت عمري امن المواليد

ماخله سر بكلبه تشفير
الدلو دومه امفشل البير
ع البير كون انحط نواطير
النوم اكص اجناحه ويطير
لصبح يطرك ع مصايد

ياخوش بس وياي موخوش
الوديتهم ماودو اطروش
ياكلبي ضل امرافج الحوش
زرنيخ وحريشي وبلابوش
وبكاسي اكاسرلك عرابيد

شب ونطفه وتلهوك وشاط
كلبي عليك اعويد شخاط
بعيوني ضل مو شوف نكاط
الجفن شايب مدري الكماط
مادري هو الشيب تعويد

منتظره بس لنتظره ماياش
دموعي بيهن طولت اقماش
من ياهي ادير الكلب ونحاش
هلهلت روحي الضيم شوباش
اعليك اتعبت تعب الچواديد

ضيعت چمه ضيعتك بچول
دليني ولله الكلبي ماكول
مامستوي ونص كلبي ماحول
ياشكر مامر بيك قندول
متلهوك بطرك التجاعيد

شكيته وطلع ياكلب هيج
من الصبح للمغرب الزيج
ارتاحله ويرتاحلي الضيج
صبيره مامتبلل الريج
عوسجت بر ريج المكاريد


ياكلبي شو تعرج سلامات
ماهمت البدوي المسافات
اقرا بمعانيك معانات
بحض غيرك ولفك يبات
ضل شوغ من بعيد لبعيد

فلسهه شوكي وضلت اكشور
حايطنه صاحي بروحي الفطور
كلهم زرتهم بعد شتزور
صليت بس بكلب مخمور
مرات واحد مدري شيريد

رخصني وكتي بحضك افلان
انا الجنت والذهب ماجان
حنطه بكحط عد ال جنعان
لاچن صفيت بسعر الادنان
اتكش روحهم مني الحواصيد

#زين_العابدين_العبودي

من اهد ذاك الماي كلبي ايگرصني

هوه الخذه العباس ماياخذ ابني

#زين_العابدين_العبودي

عيش الوحدك مو اله موجود

بعد ماتنحظن المن صرت عود

#زين_العابدين_العبودي

رساله الى الرزاق

امكامش انا وياه ماينلوي العوز

اتحلهه اذا مابيك دبرلي حاجوز

#زين_العابدين_العبودي

وبفاتحتي مو قران

اخ امفارگيني اعزاز

اريد اسمع طرب خلان

مايطربني اذا مو ياس

#زين العابدين العبودي

گاروگي والتابوت وگت البچي انهز

وانته اعله طبعك ذاك ولبل كهف فز

#زين_العابدين_العبودي

امنيه

كون اعض كلبي واموت

وكون اموتني اعله كيفي

بلايه صوت

وكون مو بلكاع افوت

شويه يونس مرخصتك

انا اريدا كبري حوت

#زين_العابدين_العبودي

خلاف وجهك
خبل وافتر بشوارع

اذنت بيه الجوامع

حصتي چانت منك انته

شامه شامه لحد ركبتك

هسه حصتي بس اباوع

چنت ادور اعليك

بس هسه انا ضايع

البينك وبيني سهر وتلث مدامع

منو كلالك شبر وتلث اصابع

#زين_العابدين_العبودي

صرتلك ماي من طكهه العطش كصتك

صرتلك حلك من شكو بسالفتك

بذمتي اهواي بس اهواي الي ذمتك
انه الشلتك
الماعفتك
المابعتك
الماختنك

بكد مصلحتك انته اوياي ادور چنت مصلحتك

#زين_العابدين_العبودي

لساني اليم عرب صنته بقم صان

كلامي وكلبي شلوطتهه بقمصان

اذا عل شوف يرجعلي بقمصان

يرد بيمن هذاك الكطع بيه


#زين العابدين العبودي