Bismillahir rohmanir rohiym!
MUKAMMAL HIJOB
Sattor Zot bo‘lmish Alloh taologa hamdu sanolar bo‘lsin!
«Ayol kishi avratdir», «Hayo iymondandir», deya marhamat qilgan iffatli zot Nabiyimizga salotu salomlar bo‘lsin!
Alloh taolo ayollarga hijobni farz qilib, shunday deydi:
«Mo‘minalarga ayt: «Ko‘zlarini tiysinlar, farjlarini saqlasinlar va ziynatlarini ko‘rsatmasinlar, faqat zohir bo‘lganlari mustasno. Ro‘mollarini ko‘kslariga to‘sib yursinlar» (Nur surasi, 31-oyat).
Rasululloh sollallohu alayhi vasallamdan hijob haqida quyidagilar vorid bo‘lgan:
Oisha roziyallohu anhodan rivoyat qilinadi:
«Asmo bint Abu Bakr roziyallohu anho Nabiy sollallohu alayhi vasallamning huzurlariga yupqa kiyim bilan kirdi. U zot undan yuzlarini o‘girib oldilar va: «Ey Asmo! Ayol kishi balog‘atga yetganidan keyin uning mana bu va mana bundan boshqa joyi ko‘rinmasligi kerak», deb ikki kaftlari va yuzlariga ishora qildilar».
Abu Dovud rivoyat qilgan.
Balog‘atga yetgan ayol nomahramlar huzurida avratlarini yopishi kerakligi ko‘pchilikka sir emas. Ayol kishining avrat chegarasi ham ko‘pchilikka ma’lum. Ammo hozirgi kundagi biz guvohi bo‘lib turgan hijoblanish holatlarini shariatga to‘la muvofiq deya olamizmi? Afsuski, «hijob» so‘zining mazmun-mohiyatini to‘liq anglab olmaganlar ham bisyor. Bunga ba’zi ayollarimizning bugungi kundagi yurish-turishlari, tashqi ko‘rinishlari, kiyinishlari ochiq-oydin dalildir. Shuningdek, ko‘pchilik hijob deganda har qanday kiyim bilan ayol kishi yopishi kerak bo‘lgan joylarni yopishni tushunadi, xolos. Shunigina olib, boshqa jihatlarini olmaydilar, e’tibor ham bermaydilar. Ba’zilar uchun esa go‘yoki boshni bir parcha latta bilan berkitib olsa, undan boshqa hamma narsani qilish mumkindek.
Keling, avvalo «hijob» so‘zining ma’nosini tushunib olaylik. Uning ma’nosi to‘siqdir, ya’ni ayol kishining avrat joylarini nomahramlardan to‘sishidir. Avrat deganda yopilishi kerak bo‘lgan, ochilib qolsa ayb bo‘ladigan narsa tushuniladi. Ayol kishining yuzi, qo‘lning ikki kafti, to‘piqdan pastki qismidan boshqa hamma joyi avratdir. Avratni to‘sishdan maqsad esa nomahram erkakning e’tiborini o‘ziga jalb qilmaslik, xayolini buzmaslikdir. Mana shu hijobning ma’nosi va eng katta shartidir.
Endi ijozatingiz bilan hijobning e’tibor qilinmayotgan jihatlarini birma-bir o‘rganib chiqaylik.
Avvalo shuni ta’kidlab o‘tishimiz lozimki, aslida ayolning butun jismi avratdir. Lekin ayol kishi ham inson bo‘lgani uchun, insoniy ehtiyojlarini inobatga olgan holda ma’lum bir shartlarga ko‘ra uyidan tashqariga chiqishiga va nomahramlarga ro‘baro‘ bo‘lishiga ruxsat beriladi.
Ayol kishi nafaqat jismini, balki ovozini, nazarini, harakat va bo‘yini ham satr qilishi, ya’ni to‘sishi, yashirishi, berkitishi lozim.
Hijobning ikkita asosiy sharti bor.
Birinchi sharti: badanning rangi ko‘rinmasligi. Badanning rangi bilinmasligiga yuqoridagi hadis dalil bo‘ladi. Hadisga ko‘ra ayol kishining nomahramlar ko‘zi tushadigan joylarda kiyadigan kiyimi shaffof bo‘lmasligi, matoning tagidagi badan ko‘rinmasligi shartdir.
Ikkinchi sharti: tananing shaklini bildirmasligi. Mana shu – hijobning hozirgi ayollar tomonidan eng ko‘p buzilayotgan shartidir.
Kuzatishlarimdan shuni xulosa qilib aytamanki, ko‘pchilik ayollar nihoyatda tor kiyim kiyadilar, buning ustiga, ro‘mollarini kichik qilib o‘rab, tor kiyimlaridan shakli yaqqol bilinib turgan ko‘kraklarini to‘smaydilar. Hattoki ustilariga abaya (choponsifat kiyim) tashlab oladigan ayollar aynan ko‘krak qismini bo‘rttirib oladilar. Ko‘krak esa erkaklarni eng ko‘p maftun qiladigan, o‘ziga jalb qiladigan a’zodir. Vaholanki, oyati karimada: «Ro‘mollarini ko‘kslariga to‘sib yursinlar», deb ochiq-oydin aytilgan. Shuningdek, beliga belbog‘ taqib, yoki tor kiyim bilan bellarini bildirib oladigan ayol-qizlarni ham har qadamda uchratish mumkin. Bel ham, undan pasti ham erkaklarning diqqatini tortadigan a’zolardir.
