Uzoqov G'ulom Norboyevich

GII ning Oʻzbekiston rivojlanishidagi oʻrni tahliliga bagʻishlangan xalqaro konferensiya oʻtkazildi

Joriy yilning 4-oktabr kuni Innovatsion rivojlanish vazirligida Global innovatsion indeksning (GII) Oʻzbekiston Respublikasining rivojlanishidagi oʻrni tahliliga bagʻishlangan xalqaro konferensiya boʻlib oʻtdi. Konferensiyada xalqaro tashkilotlar, tegishli vazirlik va idoralar vakillari hamda iqtisodchi olimlar tomonidan Oʻzbekistonning GIIdagi oʻrni yaxshilanib, 2020-yilga nisbatan 7 pogʻona koʻtarilgani muhokama qilindi.

Butunjahon intellektual mulk tashkilotining (BIMT) iqtisodiyot va statistika boʻlimi boshligʻi hamda GIIning tahrirchisi Sasha Vunsh-Vinsent Oʻzbekiston innovatsion rivojlanishni ustuvor maqsad qilib, reyting tuzuvchilari bilan doimiy hamkorlik olib borayotgan tashabbuskor davlatlar qatorida ekanligini alohida taʼkidlab oʻtdi va shu bilan bir qatorda Oʻzbekistonning tadqiqot va ishlanmalar, axborot texnologiyalari, intellektual mulk kabi qator sohalarda katta ijobiy natijalarga erishayotganini kuzatib kelayotganini bildirdi.

Bundan tashqari, konferensiyada Oʻzbekistonning innovatsion rivojlanishining ustuvor yoʻnalishlarini belgilash, iqtisodiyotning barcha tarmoqlarida va aholining kundalik hayotida innovatsiyalar va texnologiyalarning keng kirib borishini taʼminlash, milliy iqtisodiyotning jahon miqyosidagi raqobatbardoshligini taʼminlash, va Oʻzbekiston Respublikasini 2030-yilga kelib Global innovatsiya indeksi reytingida jahonning 50 ta ilgʻor mamlakatlari qatoridan oʻrin olishini taʼminlash maqsadida ishlab chiqilgan “Oʻzbekiston Respublikasini 2030-yilgacha innovatsion rivojlantirish strategiyasi” loyihasini BIMT va Kornel universiteti bilan birgalikda koʻrib chiqish va takomillashtirishga kelishildi.

Batafsil ma'lumot olish:

Qayta tiklanuvchi energiya hajmini bashorat qilish tizimini yaratish masalalariga bagʻishlangan xalqaro anjuman oʻtkazildi

4-oktabr kuni Oʻzbekiston Respublikasi Innovatsion rivojlanish vazirligi, Energetika vazirligi va USAID agentligining “Kelajak energiyasi” bilan hamkorlikda olib borilayotgan “Oʻzgaruvchan qayta tiklanuvchi energiya manbalarining respublika energiya tizimiga taʼsirini oʻrganish” loyihasi doirasida xorijiy ekspertlar ishtirokida tadbir oʻtkazildi. Tadbirda vazirlikning Tarmoq korxonalarida innovatsion ekotizimni shakllantirish boshqarmasi, Energetika vazirligi, “Oʻzbekiston milliy elektr tarmoqlari” AJ, “Energiya” hududiy koordinatsion-dispetcherlik markazi, “Elektr energiyasini hisobga olishni avtomatlashtirish” filiali mutasaddi rahbarlari, mutaxassislari, Fanlar akademiyasining Fizika-texnika va Materialshunoslik institutlari, Qayta tiklanuvchi energiya manbalari milliy ilmiy-tadqiqot instituti, Toshkent davlat texnika universiteti olimlari ishtirok etdilar.

Anjuman davomida elektr energiyasini ishlab chiqarilishini avtomatik tarzda hisobga olish, maʼlumotlar bazasini hamda quyosh va shamol manbalaridan ishlab chiqarilayotgan energiya miqdorlarini bashoratlash tizimini yaratish masalalari koʻrib chiqildi. Qayta tiklanuvchi energiya manbalari asosida ishlaydigan yangi elektr stansiyalari ishga tushirilayotganini inobatga olib, yuqorida koʻrsatilgan masalalar boʻyicha yechimlar kelajakda mamlakat energiya tizimni barqaror ishlashiga yordam beradi.


Tadbir davomida qayta tiklanuvchi energiyani ishlab chiqish miqdorini bashoratlash tizimi xorijiy davlatlarda samarali joriy etilishi amaliyotining asosiy natijalarining tahlili oʻtkazildi.

Batafsil ma'lumot olish:

Olimlar deyarli yanchib bo‘lmaydigan suvarak-robotni yaratdi

Odatda barcha kichik robotlar bir muammoga duch keladi: ular juda nozik bo‘lgani sabab, sinishi oson. Ammo suvaraklarni o‘ldirish juda qiyinligi maʼlum, shuningdek, ular juda tez harakatlanadi. Olimlar esa aynan shundan ilhomlangan.

Tajribalarning ko‘rsatishicha, robot 60 kilogrammgacha yukni ko‘tarishga qodir: yaʼni o‘rtacha og‘irlikdagi inson uni bossa, robotga hech narsa qilmaydi.

Bu kabi ixtironing siri oddiy: “suvarak” asosini PVDF-list, o‘zgaruvchan tok ulangan yupqa va egiluvchan polimer tashkil etadi. Korpusining egiluvchanligi sabab robot barqaror va kichik. Mitti robot soniyasiga 20 santimetr tezlikda harakatlanishga qodir. Shuningdek, o‘zidan olti barobar og‘ir bo‘lgan yong‘oqni bemalol ko‘tara oladi.

«Bunday robotlar falokat va tabiiy ofat ro‘y bergan hududlarda katta yordam ko‘rsatishi mumkin. Mitti-bot osonlik bilan vertikal yuza bo‘ylab harakatlanishi, odam kira olmaydigan tirqishlar, trubalar va boshqa joylardan o‘ta olishi mumkin. Kelajakda robotga ko‘z datchigini ham o‘rnatish rejalashtirilgan», — deyiladi xabarda.

Batafsil videoni ko‘rish:

Ilmiy faoliyatga oid davlat dasturlari doirasida amaliy hamda innovatsion loyihalar tanlovining 55-turi e’lon qilinadi

O‘zbekiston Respublikasi Innovatsion rivojlanish vazirligi ilmiy faoliyatga oid davlat dasturlari doirasida amaliy hamda innovatsion loyihalar tanlovining 55-turini quyidagi fan yo‘nalishlari bo‘yicha e’lon qiladi:

1. Axborotlashtirish va axborot-kommunikatsiya texnologiyalarini rivojlantirish fanlari

2. Farmakologiya va farmasevtika fanlari

3. Filologiya, psixologiya va pedagogika fanlari

4. Huquq fanlari

5. Iqtisodiyot fanlari

6. Kimyo fanlari, kimyoviy texnologiyalar va nanotexnologiya

7. O‘rmon xo‘jaligi, tuproqshunoslik va o‘simliklarni himoya qilish fanlari

8. Qishloq xo‘jaligi va atrof-muhitni muhofaza qilish fanlari

9. Tarix va arxeologiya fanlari

10. Texnika fanlari

11. Tibbiyot fanlari

12. Yer to‘g‘risidagi fanlar

Tanlov shartlari.

Tanlovga taqdim etiladigan ilmiy loyihalar grant.mininnovation.uz elektron platformasining “Tanlovga ilmiy loyiha taqdim etish” sahifasi orqali 2021-yilning 2-noyabriga qadar faqat elektron shaklda qabul qilinadi.

Ilmiy loyiha hujjatlarini grant.mininnovation.uz elektron platformasi orqali ro‘yxatdan o‘tkazish jarayonida quyidagi hujjatlar asl nusxalarining pdf/doc shakli elektron platformaga yuklanishi lozim:

1️⃣ ijrochi tashkilotning rahbari tomonidan imzolangan yo‘llanma xat (pdf);
2️⃣ ijrochi tashkilotning ilmiy (ilmiy-texnik) kengashi qaroridan ko‘chirma (.pdf);
3️⃣ amaliy yoki innovatsion loyiha matni (imzo va muhr qo‘yilgan holda, pdf va doc/docx).

Taqdim etilgan loyihalar tanlov talablariga qat’iy rioya qilinganligi, loyiha materiallarining ishonchliligi va haqqoniyligi, ko‘chirmachilikka (plagiatga) yo‘l qo‘yilmaganligi, talablar asosida shakllantirilganligi, shuningdek loyiha yakunida qo‘lga kiritiladigan muhim ilmiy natijalarning tadqiqot dizayniga muvofiq to‘liq asoslanganligi va so‘ralgan mablag‘larning tanlov shartlarida keltirilgan moliyalashtirish hajmiga muvofiq to‘g‘ri hisob-kitob qilinganligi bo‘yicha dastlabki texnik ekspertizadan o‘tkaziladi.

Elektron ro‘yxatdan hamda dastlabki texnik ekspertizadan o‘tmagan loyihalar tanlovning keyingi bosqichiga tavsiya etilmaydi.

Tanlov shartlari bilan tanishish.

Batafsil ma'lumot olish:

Jahon banki ishtirokida “O‘zbekiston milliy innovatsion tizimini modernizatsiya qilish” loyihasi doirasida “Ilmiy tadqiqot va tijoratlashtirish sifatini oshirish” dasturi bo‘yicha grant tanlovi o‘tkaziladi

"O‘zbekiston Milliy innovatsion tizimini modernizatsiya qilish" loyihasining "Ilmiy tadqiqot va tijoratlashtirish sifatini oshirish" 1-komponenti doirasida O‘zbekiston Respublikasi Innovatsion rivojlanish vazirligi joriy yilning oktabr oyida “Ilmiy tadqiqot sifatini oshirish” dasturi bo‘yicha ilmiy tadqiqot grantlari uchun tanlov e’lon qilinishini ma’lum qiladi hamda ilmiy hamjamiyatdan ushbu tanlovga tayyorlanib, unda ishtirok etishni so‘raydi.

Ilmiy tadqiqot sifatini oshirish dasturi tadqiqotchilar tomonidan taqdim etiladigan tadqiqot loyihalarini moliyalashtirish uchun yo‘naltirilgan “Ilmiy tadqiqot sifatini oshirish dasturi” mahalliy va xalqaro tadqiqotchilarning (jumladan, chet eldagi o‘zbek olimlarining) qo‘shma tadqiqot takliflarini, yosh tadqiqotchilarning mamlakatni kelajakdagi tadqiqot salohiyatini yanada boyitishga qaratilgan takliflarini maqullaydi.Tanlov ikki asosiy mezonlar bo‘yicha amalga oshiriladi, bularga: (I) ilmiy yutuqlar nuqtai nazaridan beriladigan takliflar va (II) ijtimoiy yoki iqtisodiy ahamiyatga ega bo‘lgan hamda ayrim ijtimoiy muammolarni hal qilishga xizmat qiladigan takliflar kiradi.

Ilmiy tadqiqot sifatini oshirish dasturi ikki turdagi grantlarni taqdim etadi: (I) yosh olimlar uchun ajratiladigan grantlar (Junior research grant) hamda (II) katta ilmiy xodimlar uchun ajratiladigan grantlar (Senior research grant). Grantlar mos ravishda $200 000 va $600 000 ming AQSh dollari ekvivalentida, har bir tadqiqot guruhi uchun 24 oydan ortiq bo‘lmagan muddatga ajratiladi. Qo‘shma xalqaro loyihalarga qo‘shimcha muddat berilishi mumkin. Dastur shuningdek, mamlakat talablariga javob beradigan xalqaro tadqiqot fondlariga ariza berish uchun zarur bo‘lgan dastlabki tadqiqotlarni ham o‘z ichiga olishi mumkin.

Tanlov qayta tiklanuvchi energiya (renewable energy), energiya samaradorligini oshirish (energy efficiency), past uglerodli texnologiyalar (low-carbon technologies), biotexnologiyalar (biotechnologies), tibbiyot va sog‘liqni saqlash (medicine and healthcare), qishloq xo‘jaligi va oziq-ovqat (agriculture and food), sun’iy intellekt (artificial intelligence), AKT (ICT) va boshqa ilmiy
va texnologik rivojlanishga qaratilgan loyihalarni jalb qilish uchun amalga oshirilishi kutilmoqda.

Ilmiy tadqiqot sifatini oshirish dasturi doirasida taqdim etilgan loyihalarni moliyalashtirish uchun tanlovni nufuzli olimlardan hamda venchur moliyalashtirish, tadbirkorlik va siyosat, ilm-fan, texnologiya va innovatsiya sohalaridagi tajribali mutaxassislardan tashkil topgan Xalqaro ekspertlar kengashi amalga oshiradi.

Loyihalar wbgrants.mininnovation.uz portalida ingliz tilida qabul qilinadi. Belgilangan talablar, dasturlar, jarayonlar arizalar qabul qilish boshlangan kundan ko‘rsatib o‘tilgan internet resursda elon qilinadi.

Qo'shimcha ma'lumot uchun: tel: +99897 170 67 84; e-mail: munis@mininnovation.uz

Batafsil ma'lumot olish:

Shodiyev Bekzod To‘lqinovichning iqtisodiyot fanlari bo‘yicha falsafa doktori (PhD) dissertatsiya ishi himoyasi to‘g‘risida

08.00.04- “Qishloq xo‘jaligi iqtisodiyoti” ixtisosligi bo‘yicha “Qishloq xo‘jaligini modernizatsiyalash sharoitida qorako‘lchilik tarmog‘ining samaradorligini oshirish” mavzusidagi (iqtisodiyot fanlari bo‘yicha) falsafa doktori (PhD) dissertatsiyasining himoyasi Qoraqalpoq davlat universiteti huzuridagi ilmiy darajalar beruvchi PhD.03/30.01.2020.I.20.06 raqamli ilmiy kengashning 2021-yil 5-oktabr kuni soat 11:00 dagi onlayn (masofaviy) majlisida bo‘lib o‘tadi.

Manzil: 230100, Nukus, Ch.Abdirov ko‘chasi, 1-uy, QQDU, QQDU huzuridagi PO‘MOQT mintaqaviy markazi majlislar xonasi

Batafsil ma'lumot olish:

Doktorantura boʻyicha dolzarb savollarga javob

1. Bir tayanch doktorant oʻz yoʻnalishidan boshqa yoʻnalishga “perevod” qilishi mumkinmi?

Vazirlar Mahkamasining 2017-yil 22-maydagi 304-son qaroriga muvofiq stajyor-tadqiqotchi va izlanuvchilarni bir ilmiy yoki taʼlim tashkilotidan boshqasiga koʻchirishga yoʻl qoʻyilmaydi. Shuningdek, tayanch doktoranturaga kirish imtihonlaridagi savollar bir ixtisoslik boshqa ixtisoslikka toʻgʻri kelmaganligi sababli koʻchirish mumkin emas.

2. Mustaqil tadqiqotchi boʻlgan izlanuvchi tayanch doktoranturaga oʻqishga topshirishi mumkinmi?

Normativ-huquqiy hujjatlarda mustaqil izlanuvchilikka rasmiylashtirilgan shaxs tayanch doktoranturaga hujjat topshirishi mumkinligi va mumkinmasligi toʻgʻrisida normalar berilmagan. Shu munosabat bilan, hujjat topshirishda mustaqil izlanuvchilikka rasmiylashtirilgan ilmiy yoki taʼlim tashkilotlarining ruxsatiga asosan topshirish maqsadga muvofiq.

3. Doktorantura qabulida shaffoflik taʼminlanmagan. Bu yilgi imtihonlar qay shaklda boʻladi?

Bu yilgi imtihonlar onlayn oʻtkazilmaydi, doimgidek anʼanaviy tarzda boʻlib oʻtadi. Joriy yildan qabul komissiyasi doktoranturaga kirish imtihonlari va suhbat jarayonlarini video kuzatuv ostida (onlayn translyatsiya) oʻtkazish choralarini koʻriladi. Tayanch doktoranturaga kirish imtihonlari boʻyicha topshiriladigan birinchi fan (mutaxassislik yoki chet tili) umumiy balining 50 foizidan kam ball toʻplagan talabgorlar keyingi bosqichga oʻtkazilmaydi. Bu bilan kirish imtihonlari va suhbat jarayonlari shaffofligi taʼminlanishi, shuningdek, salohiyatli talabgorlar saralanishi belgilanmoqda.

4. Stajyor-tadqiqotchilikda oʻqiyman. Ilmiy maqolalarim, ilmiy ishim ancha oldinlagan. Endi shu yil doktoranturaga kirishga menda imtiyoz bormi?

Stajyor-tadqiqotchilik - ishlab chiqarishdan ajralgan holda tegishli ixtisoslik boʻyicha ilmiy va ilmiy-ijodiy izlanishlarni olib borish va falsafa doktori (PhD) ilmiy darajasini olish uchun izlanuvchini tayyorlash shakli hisoblanib, ushbu shaklda oʻqigan shaxsga hech qanday imtiyoz berilmaydi.

5. Mustaqil tadqiqotchi sifatida hujjat topshirmoqchiman. Ilmiy rahbarni nomzodning oʻzi topishi kerakmi? Universitetning oʻzi biriktirmaydimi?

Koʻpincha mustaqil izlanuvchilikka topshirayotgan shaxs oʻz ilmiy rahbari va dissertatsiya mavzusi bilan tayyor holda hujjat topshiradi. Qabul komissiyasi tomonidan suhbat jarayonida dissertatsiya mavzusi yuzasidan savollar boʻlishi mumkin. Talabgorning soʻroviga muvofiq ilmiy rahbar ilmiy yoki taʼlim tashkilotidan ham biriktirilishi mumkin.

6. Imtihon shakli va imtihon ketma-ketligi qanday boʻladi ( oldin mutaxassislik boʻyicha yoki chet tilidanmi) va imtihon qaysi tashkilot tomonidan oʻtkaziladi?

Qabul imtihonlarini oʻtkazish va imtihon shakllarini tanlash qabul qiluvchi ilmiy va taʼlim tashkilotlari tomonidan amalga oshiriladi.

7. Ilmiy rahbar yoʻq boʻlsa topshirishni iloji yoʻqmi?

Oliy taʼlimdan keyingi taʼlim ilmiy daraja olish bilan bogʻliq boʻlganligi bois izlanuvchilar oldindan ilmiy rahbar va dissertatsiya mavzularini aniqlashtirib olishlari maqsadga muvofiq.

8. Tayanch doktoranturaga ingliz tilidan imtihonni Davlat test markazi oladimi?

Yoʻq. Tayanch doktoranturaga imtihonlar hujjat topshirgan muassasa tomonidan oʻtkaziladi.

Batafsil ma'lumot olish:

Prezidentimizning 2021-yil 1-apreldagi “Ilmiy va innovasion faoliyatni rivojlantirish boʻyicha davlat boshqaruvi tizimini takomillashtirish toʻgʻrisida”gi farmoniga asosan respublikamizning 13 ta tumani, jumladan, Qashqadaryo viloyatidagi Nishon tumanini innovasion hududga aylantirish belgilangan.

Mazkur topshiriq ijrosini taʼminlash maqsadida chora-tadbirlar dasturi va yangi innovatsion loyihalarni oʻzida mujassam etgan “Yoʻl xaritasi” ishlab chiqildi.

– Bu borada Nishon tumani hokimligi bilan uzviy hamkorlikda ish olib boryapmiz, – deydi Innovatsion rivojlanish hududiy boshqarmasi boshligʻi Olimjon Mavlonov. – Jumladan, Innovatsion rivojlantirish vazirligi tomonidan Qashqadaryo viloyatida 2017–2021-yillarda ilm-fan va innovatsiyaga umumiy qiymati 16,4 mlrd. soʻm 31 ta loyiha moliyalashtirilishini alohida taʼkidlash joiz. Hozirning oʻzida “Ilm-fanni moliyalashtirish va innovatsiyalarni qoʻllab-quvvatlash jamgʻarmasi” tomonidan 3,3 mlrd. soʻm mablagʻ ajratilgani tufayli tashabbuskor tadbirkorlar tomonidan amaliy ishlar boshlab yuborildi. Natijada kelgusida qishloq xoʻjaligida 9, sanoat va oziq-ovqat mahsulotlari ishlab chiqarish sohasida 4 turdagi yangi mahsulot ishlab chiqarish yoʻlga qoʻyiladi.

Sayfulla IKROMOV, “XXI asr” muxbiri

Batafsil ma'lumot olish

Stajyor-tadqiqotchilik, tayanch doktorantura (PhD), mustaqil izlanuvchilik (PhD)ga oʼqishga talabgorlar quyidagi hujjatlarni taqdim etadilar

1️⃣ Ariza.
2️⃣ Qisqacha biografik maʼlumot (obʼektivka - namuna 3.5 shakl boʼyicha oʼzbekcha va ruscha shaklda).
3️⃣ Mehnat daftarchasining belgilangan tartibda tasdiqlangan nusxasi (ishlayotgan talabgorlar uchun).
4️⃣ Oliy taʼlim muassasasi magistraturasi diplomi yoki klinik ordinaturani tugatganligi (tibbiyot fanlari uchun), oliy maʼlumot (mutaxasislik dasturlari boʼyicha) toʼgʼrisida diplom nusxasi.
5️⃣ Nashr etilgan ilmiy ishlar roʻyxati, shuningdek ularning nusxalari (kamida 1 ta maqola va 2 ta tezis).
6️⃣ Ish joyidan tavsiyanoma (Mustaqil izlanuvchilar uchun).
7️⃣ Pasport nusxasi.
8️⃣ Oʻzbekiston Respublikasi Prezidenti Davlat stipendiyasi hujjat nusxasi (mavjud boʻlsa).

Doktorantura (DSc), mustaqil izlanuvchilik doktorantura (DSc)ga oʼqishga talabgorlar quyidagi hujjatlarni taqdim etadilar

1️⃣ Ariza.
2️⃣ Qisqacha biografik ma’lumot (obyektivka, namuna boʻyicha 3.5 shakl, oʻzbekcha va ruscha shaklda).
3️⃣ Mehnat daftarchasining belgilangan tartibda tasdiqlangan nusxasi (ishlayotgan talabgorlar uchun).
4️⃣ Oliy ma’lumot, fan nomzodi yoxud falsafa doktori (PhD) yoki xorijiy davlatlarda unga tenglashtirilgan ilmiy darajaga ega boʻlganligi toʻgʻrisidagi diplom nusxasi.
5️⃣ Tadqiqot mavzusi boʻyicha ilmiy ma’ruza va fan doktori (DSc) ilmiy darajasini olish uchun tayyorlangan doktorlik dissertatsiyasi rejasining batafsil loyihasi.
6️⃣ Nashr etilgan ilmiy ishlar roʻyxati, shuningdek ularning nusxalari (kamida 3 ta maqola va 2 ta tezis).
Ish joyidan tavsifnoma (Mustaqil izlanuvchilar uchun)
7️⃣ Pasport nusxasi.
8️⃣ Ilmiy yutuqlari (Oʻzbekiston Respublikasi Prezidenti Davlat stipendiyasi hujjat nusxasi)

Barcha hujjatlar pdf shaklida tayyorlanib Oliy taʼlimdan keyingi taʼlimni muvofiqlashtiruvchi Yagona elektron tizimi (http://phd.mininnovation.uz) orqali roʼyxatdan oʼtgan holda yuboriladi.

Qabul kvotalari: