Қардош ижодкорлар Ўзбекистонда
Ўзбекистон Ёзувчилар уюшмасида Озарбойжон Миллий Мажлис Маданият қўмитасининг эксперти, шоир Акбар Қўшали ва Туркиядан келган бир гуруҳ ижодкорлар билан “Адабий дўстлик – абадий дўстлик” номли ижодий учрашув бўлиб ўтди.
Тадбирни Ўзбекистон Ёзувчилар уюшмаси раиси, халқ шоири Сирожиддин Саййид олиб борди. Унда “Кўнгил саёҳати” китоби тузувчиси Жўшқин Қорабулут, Озарбойжон Миллий маданият маркази раҳбари Самир Аббосов, уюшма аъзоси Нурбой Жабборов ва кўплаб меҳмонлар сўзга чиқди. Учрашувда ушбу китобларнинг таржима қилиниши, нашрга тайёрланиши, унга кирган асарларнинг ғоя ва мавзулари ҳақида таъкиланди.
– Озарбойжон, Туркия ёзувчилари, шоирлари билан ҳамкорлик алоқаларимиз мустаҳкамланиб бормоқда, - деди “Китоб дунёси” бош муҳаррири Ҳосият Рустамова. – Бир неча кундирки, қардош ижодкорларимиз “Дўрмон” ижод уйида, юртимизнинг Самарқанд, Бухоро ва бошқа кўплаб жойларида бўлди. Таассуротлари чексиз. Қувончлари бир олам. Ижодий режаларимиз янада кенгаймоқда.
Тадбирда Акбар Қўшалининг ўзбек тилида нашр этилган “Хаёлимни чақирдим” ва турк шоирлари ижодидан жамланган “Кўнгил саёҳати, Ўзбекистон” китобларининг тақдимоти ҳам ўтказилди. Озарбойжон шеъриятининг истеъдодли вакили Акбар Қўшалининг “Хаёлимни чақирдим” номли шеърий китоби “Янги аср авлоди” нашриётида чоп этилди. Таржимон – Раҳмат Бобожон. Сўзбоши муаллифи – Ўзбекистон Ёзувчилар уюшмаси аъзоси, шоир Фахриёр.
Тақдимотда уюшма раиси Сирожиддин Саййид Акбар Қўшалига Ўзбекистон Ёзувчилар уюшмасининг аъзолик гувоҳномасини ҳамда бошқа меҳмон ижодкорларга сертификат ва китоблар жамланмасини топширди. Туркийзабон шоирларнинг шеърий чиқишлари ижодкорларга янада илҳом берди. Тадбирдан сўнг йиғилганлар Ўзбекистон Ёзувчилар уюшмаси тарихи музейи билан танишди.
Зулайҳо Аҳмаджонова тайёрлади.
Web-site |
Telegram |
Facebook |
YouTube
