قصيده بحق العباس (ع) على لسان السيدة زينب(ع)
سريعه


هاليوم جيتك يا گمــر هاليوم هم عندك خبر

*------------------------*---------------------*

جيت اليـــوم ريت ادگوم خويه وتنظر لحالي
شاب الراس يا عبـــاس جبت الروس تبرالي
عندي اعتاب وي اجناب جيت وانت كفالـــي

وياك چنت امخدرة * وأدريك سبع الگنطره

*------------------*----------------*

فوگ النــوگ عيب اتلوگ اختك تمشي مسبيه
عگبك ليـــش بين الجيش وادم تنظر عليـــــه
زحمه وعيب تالي الشيب يلي اتكفلت بيـــــه

للموت دمعات الجفن * وياك خليني اندفن

*-----------------*-----------------*

دم ابچيت يمك جيت وانت بنومتك غافــي
گوم وياي يا رجواي عگبك ورم اجتافــــي
هذا الصار بين النـــار اركض والجدم حافي

شدگول يا وارث علي * رديت ودموعي تهلي

*------------------*------------------*

مدري شلون عندي عيون ظلت والنظر بيهه
كلهه اتصيـح خاف اطيح حرمه وين اهاليهه
تصعب هاي وي اعداي كلمه ويمك احچيهه

عالنوگ شافتني الزلم * والحيل راح ومنهدم

*-------------------*--------------------*

دمعي السال يحچي الحال اگعد ياضوه عيوني
احچي وياك نخوه انخاك وانت الكافل اضعوني
كلي اجراح جيت ارتاح خويه بكلمه حاچوني

عباس شنهي سگتتك * يا خوي احچي مروتك
*------------------*------------------*

چفـك وين وعدك دين يوفي الينطي الحچايه
خدري انشاف جيش آلاف امشي ويمشي ويايه
عوف النــــوم هسه وگوم بيدك رفرف الرايــه

بحماك هايه العايله * رديت خويه لكربله

*---------------*------------------*

العدهه أحيود تمشي بزود وانه الوادم تسبني
وي ضـــــلام لرض الشام دهري هواي دولبني
شفت الويـل راح الحيـل بفراگك يخال ابني

ياريت موتي بموتتك * انشاف تقبل غيرتك

*------------------*-----------------*

دربي ابعيد وانت الحيد صيتك واصل السبعه
خدري بساع راح اضيـاع وانت بزودك ترجعـه
اخذ الـروح وسفه تروح واختك تبقه منفجعه

يا خوي يحزام الظهر * ضليت باحزان الدهر

*------------------*------------------*
✍ بقلم خادم الحسين ع
الشاعر رعد الجريخي