ما قلت حرف .. طولت شديد
حاولت كتير ..
في خيالي إتقولبت الهوبة ..
..
صنيت .. شان أسمع نبضباتك
شان إتحسس تامن أعجوبة
..
أنا فيني من الأحلام هييييلك
للعاقل تب ما محسوبة
..
لي أوضة .. وزير
وسرير .. في نص الراكوبة
..
لي ضحكة تقولها .. لحن شجي
همسة و رميش ..
في توب معليش ..
لو سرب خزان إسلوبها ..
..
أنا فيني كتير .. والفيكي يزيد
ده شعار الريدة ومجلوبها
..
أشري للغيم .. إشتهي مطرة
.. في الحال
تنزلك محلوبة
..
ما تهمي .. التمرة متيمة بيك
لي حجرك .. حيتب شخلوبها
..
أنا بين إيديك .. لو بالإمكان
تلقيني الشيخ الواعظ داك
تلقيني أبوك .. وقت الحوبة
..
تلقيني أخوك .. الضهرو ضراك
لو شاب الجو أي صعوبة
..
تلقيني جناك .. لامن إنضام
حين أبدأ أئن ..
ألقى الأوجاع بيك مطبوبة
..
هاك كلمة .. دي للتاريخ ( طبعا" )
إنتي قصيدي .. الكنت كتبتو
إنتي الهسسسع
إنتي الجايات ..
يا محبوبة ..
..
خليني أقول ( الحق ) يا بت
إنتي قصيدتي .. الما مكتوبة
..
.
..
#رَمَّاحْ_إبْنِعُوفْ