‍ ئەی تەمە ژن!
من واهاتووم...
ئیتر چراوگی سەری خۆم
بدەمە دەست شەقامێکی
شەوگاری تۆ
من واهاتووم کە
گمەگمی تەنیاییت لە
چوار چێوەی هێلانەیەک
بێنمە دەرێ و ئیتر
بیسپێرم بە ئاسمان،
ئیتر بیسپێرم به چریی دارستان و
بە گۆرانییە میللیەکانی،
ناو گەڕەکی هەژارەکان.

من وا هاتووم
چارەنووست ئیتر،
بسپێرم بە مەرگم،
وەختێ مەرگم
پەنجەرەیەک لە ساماڵدا
بکاتەوە و لەسەر
باخچەی گوڵی ڕەشت،
من ئەمەوێ لەم
شەڕی عەشقە نوێیەمدا...
وەکوو بارانی سەر ئاگر
دابکەم و ئینجا بمرم.

من وا هاتووم...
ڕۆحم بە پرچتا هەڵواسم
بەهەردووکمان جۆلانەیەک
لە شەفەق و
جۆلانەیەک لە خەونەکانی ئایندە
دروست بکەین،
بۆ ئەو چرا و گوڵ مێخەک و
پیاڵەی شەراب و کتێب و کەمانچانەی
سبەی ڕۆژ ئەبنه منداڵمان.

من واهاتووم ...
ئیتر شەماڵت نەخەمە سینەمەوە.
ئیتر پەپوولەی دووانت...
نەهێنمە ناو بیستنمەوە.
من واهاتووم...
لە گەوەکانی دەروونتا
باهۆزت بێدار کەمەوە.
لە تۆفاندا تەوارەکەت بێنمە قسە.

#شێرکۆ_بێکەس
#ژن_و_باران
نیگارکێش: #پێژمان_عەلیپوور
▪️ #ڕاوێژیسم

↪️ @sherko_beka
📎 @rawwzhism
https://t.me/joinchat/AAAAADvfdFVQoncrY0XPxA