هيبه نصار الحسين داسو عالمنايه
من دمهم التاريخ خط أعظم روايه



شماوصفنه الأنصار مانوصل وصفهم
ارجال ونعم الرجال والطف يشهدلهم
لبسو فوگ الدروع الگلوب بعزمهم
اسباع وبذلو ارواح لبن خير البرايه
__________

لبو صرخه حسين...... ها يبن الزچيه
جنودك احنه مولاي.... منهاب المنيه
سلو بيض السيوف..... قفلو عالقضيه
صاحو كلنه وياك والحد النهايه
_______________


نبقى وياك للموت.... منخيب ضنونك
نصير گبالك دروع ....وبضهرك نصونك
والله الدنيه يحسين.... ماتسوه بدونك
لجلك عالثرى نصير كل احنه ضحايه
__________________

لجلك ياضوه العين يرخص خله دمنه
عن اهلك محامين واخيامك خيمنه
جدك نطلب ارضاه وكلشي مايهمنه
ونتلاگه ويالحتوف املاگه الضمايه
_______________

من الموت يحسين مترف هالشوارب
احنه أهل الكلافات ورجال النوايب
گبال اعيونك اليوم نگلبها الكتايب
ونعصر ناظر العين لوصح نطي مايه

_____________

✍🏻 أم أباذر السكيني

https://t.me/rugeamajeed