نار .. الحرب شعلوها
نار ..غضب علنوها
سيوف .. زلم سلوها بعزم
~~~~~~~~
الاصحاب القدموا اعضم بطوله
ترسوا الطف بعزم عرضه ويطوله
لو تريد اتسولف انته عالرجوله
من حبيب وقيس تاريخ الفحوله

عاش .. فده للعتره
عاش .. حبيب الزهره
صاال .. وقدم نحره بعزم
~~~~~~~~~
نزل للحومه ورمح خزرت عيونه
مزك اثيابه وجهنم صار لونه
حير ألعالم ابحبه وابجنونه
اني عابس صاح جاوين اليجونه

كال .. اهد وافنيها
كال .. الزلم امحيها
جاي ..وروحي افديها. بعزم
~~~~~~~~~
بعد شحجيلك شسولف عالاراده
بعمر شاب وصاح يا محله الشهاده
ابد مهتم ابكثر جيشه وعتاده
برز للجيش وهتف ابنه جناده

صاح ..امير حسيني
صاح .. حبيبي وعيني
جيت .. أوفي ابديني بعزم
~~~~~~~~~~
عركت اكصصهم وفه وغيره وحميه
وطلع جون ايصيح قافل عالمنيه
كل قضيه اتهون بس هاي القضيه
ارد اطيب ريحي يم ابن الزجيه

صار .. يلوذ ابونه
صار .. عطر بالجنه
ركاب .. نوفي كلنه بعزم
~~~~~~~~~~
الموت كالوا تحت جدمك ياحلاته
وخيمه صاروا همه لحسين وبناته
لبسوا اثياب الوفه ودينه وثباته
وهب والحر وزهير ابكل صفاته

رجال .. سيوف ورايه
رجال .. أهل الحجايه
سباع .. ودكوا ثايه بعزم


سيد محسن الجابري