لسان حال مولاتي الزهراء عليها السلام
وهي تخاطب ولدها الكافل وتقول


يعباس .. خلص كلشي
يعباس .. العلم مجفي
يعباس .. اخذ جفي ........ أنه الزهره
______________
اجيتك والضعن يبني رايد منك اميه
لكيتك طايح ودامي وطولك صاير اشويه

طايح عالارض حيلك واجيت ابستري اهفيلك .. يروحي

من شفتك هويت الكاع ردت اتكوم ماتكدر
طلع نابت سهم بكفاك و سهم ابكلبك الأثر

صفيت ابحيره من امرك وزينب واكفه اتنطرك .. يروحي

تحاجيك .. يبو الكلفه
تحاجيك .. طحت وسفه
تحاجيك .. وترد تبجي .......... أنه الزهره
______________
ييمه من هويت الكاع طاحت روحي مسبيه
وسهم النابت ابعينك خضر هالسهم بيه

شفتك نازف اجروحك وانته تاكل ابروحك .. يروحي

ردت ابجسمك الكه امجان سالم ماله اثر طعنه
وكل هذا اللي صاير بيك وانته اتفكر ابسكنه

خجلت روحك عليها من تسمع بواجيها .. يروحي

احس بيه .. سهم عينك
احس بيه .. انهدم حيلك
احس بيه .. وكمت انعي ........... انه الزهره
_________________
اخ حسين من شافك يمه وتكتل الحسره
اجاك ابنص ظهر مجفي رد منك بلا ظهره

وحده ويكسر الخاطر ظهره هلال جن صاير .. يروحي

روحه اتفرفحت مابي حيل ايكوم ويعوفك
ولا يكدر يضل يمك وزينب تنطر اجفوفك

كام ايسند ابروحه وعين الناس مفتوحه .. يروحي

يرد بيش .. من عندك
يرد بيش .. جا واختك
يرد بيش .. وشيحجي ............ انه الزهره
___________________
رجع يم الضعن مكسور حيله وطاحت ارسومه
يزينب راح اخوج ايصيح يختي وسالت ادمومه

يكلها يوجع المنظر تكطع جسمه وموذر .. يروحي

حملني سلامه عليج كلج خويه اعذريني
خبطت الماي ويه ادماي انه وراحت اسنيني

ضل يسأل على احوالج ويكلج راح كفالج .. يروحي

بالدموع .. طبك جفنه
بالدموع .. بقت سكنه
بالدموع .. خلص عمري ................ انه الزهره

___________________
يبن القدمت كلشي و كفو من الذي ربت
من دارت صدرها اعليك غيره ويه اللبن صبت

ترست بالوفه راسك وطلعت شلون عباسك .. يروحي

اجازيك ابوكتها هناك يبني بساعه المحشر
اخلي الناس كلها اتشوف ذنب اليكفل الخدر

بوكت المايضل غافل اشيل اجفوف ابو فاضل .. يروحي

واشوفك .. كلمه وفايه
واشوفك .. انته والرايه
واشوفك .. عالنهر تروي ............... انه الزهره


#سيد_محسن_الجابري