عشاق الشعر



انتي كل عقلج تمرين بسلام
الناس فقره ومن تشوفج تنصدم
ياللي طولج فتنة والوارد صيام
وياللي حسنج قاضي يبري المتهم
يا بختها الكذلة فوك الخد تنام
ومن تكفيها احس بيتي انهجم
بين مشيج والارض صار انسجام
طايره على الكاع مشياتج رسم
ساكج بلون صفع بيض النعام
مرمر ومصقول ومبرم برم
والخصر يشكي الحمل فوك الحزام
ينفجر في اي لحظة كاللغم
والشفايف كرزه والنظرة سقام
والجذع ثابت مثل جذع القلم
لا حمل مثلج يمن او شاف شام
لا عرب مثلج ولا بمثلج عجم
تروحلج فدوة شلع كل الاصنام
الللات والعزة ولعاهم كل صنم
انتي شيو كلوج جوري لو خزام
لو مسج لو عنبر بدمج لزم
تشعشع بنورج مجرات الظلام
الوالدة شو جنها متنسية بنجم
ينكسر كلبج على طاري الايتام
واني والله يتيم اذا عندج علم
من تمرين الخلك كلها قيام
تاخذ استعداد وتردد قسم
هذي شنهي الهيبة يمعوده حرام
هيبتج ما صادفتني ويه الزلم
اعذب من النسمة واهدا من الحمام
واسرع من الطلقة واقسى من السهم
من يجور الليل واصفن بالغمام
ابجي حسنج من ركبتج للقدم
وابقى حاضن صورتج كبل المنام
بلكي الله وطيفج يمرني بحلم



شاعر ابن رمادي