Kel kapalak

Sen gullarga men gullarga shaydo bo'ldik
Gulga qarab ikkimiz ham yutinamiz
Bizlar turfa tabiatda paydo bo'ldik
Kel kapalak aka-singil tutinamiz

Kel kapalak bir mehribon singlimday bo'l
Singlim bilgan o'shal nozik ko'nglimday bo'l
Bevaqt yog'ib qanotingni bosmasin do'l
Kel kapalak aka-singil tutinamiz

Oq qanoting ko'targanmi dil toshingni
Tongi shabnam silaganmi yosh boshingni
Aka bo'lib o'zim artay ko'zyoshingni
Kel kapalak aka-singil tutinamiz

Kel kapalak orzuyimday asrab yuray
Qorday mayin qanotingni ko'zga suray
Yana bir kun o'zim senga umir so'ray
Kel kapalak aka-singil tutinamiz

Men bilmayman yana qancha kuning qoldi
Bog' qo'ynida o'tkazgan bir tuning qoldi
Seni o'ylab meni tuzsiz xayol oldi
Kel kapalak aka-singil tutinamiz

Kel kapalak mayli bugun tong otguncha
Quyosh yonib ufq ortiga kun botguncha
Mayli desang tanamizdan jon ketguncha
Kel kapalak aka-singil tutinamiz

Ergashev Biloliddin

@sherlarolamii