المجلس مضيف ابني حسين واني اعزم بخطاره

ما يدخل امضيف ابني كائن ميكون
اليدخله لازم طينه بالحب معجون
وأول صفه بحب ابني لازم مجنون

والمايحبون حسين ما ترهم الهم جاره

ثاني صفه بخطاره لازم وفاي
ما ينسه ذكر ابني لمن يشرب ماي
وبالاربعين الكبره يكصد مشاي

والينظر العرض الناس ما حسبه من زواره

ثالث صفه كون اليحب عنده احساس
يضمهن جفوفه لو حجو عن عباس
لازم غيور وما يأذيها الناس

واليشعل بنار الغيض باجر نشعله بناره

رابع صفه مايعتدي اعله بنيه
عرض البنات يحفظه ويحاميه
اليهتك ستر شارك بجتل رقيه

وجاتل رقيه معروف وكلها تعرف اخباره

خامس صفه لليدخل يبر امه
يعزها ولا يجرحها بأبسط كلمه
والفاكد امه يعرف الام نعمه

واليجرح امه بفد يوم ما تنقبل اعذاره

سادس صفه لازم يحامي اخوانه
الفقره يساعد بالاخص جيرانه
اليدخل مضيف ابني هذن عنوانه

اليحملهن يضل خطاري

يالتدخل المجلس وليدي تهندم
كثر السواد بمجلسه اتعلم
ومن الادب لا تضحك وتتكلم

اليتمضحك ترصده انضاري

خادمكم حسام العيساوي