Vatican News па-беларуску

Тыдзень у Беларусі – важнае

✅ Дні моладзі Віцебскай дыяцэзіі праходзяць у Браславе. Вучняў школ, прафесійных устаноў, студэнтаў і працуючую моладзь запрасілі на сустрэчу пасля двухгадовага перапынку. 22-24 ліпеня 2022 года у санктуарыі Маці Божай Валадаркі Азёраў моладзь разважае на тэму "Як трываць у Хрысце".

✅ Па выніках першага туру ўступнага экзамену ў беларускія каталіцкія семінарыі залічаны пяць кандыдатаў. 20-21 ліпеня 2022 года ў будынку біскупскай канферэнцыі ў Мінску іспыт прымала камісія на чале з біскупам Аляксандрам Яшэўскім. Другі тур адбудзецца 10-11 жніўня.

✅ Кіраўнік беларускага епіскапату ўзначаліў начную цэлебрацыю ў Гудагаі. Уначы з 16 на 17 ліпеня 2022 года ў санктуарыі Гродзенскай дыяцэзіі Найсвяцейшай Панны Марыі з гары Кармэль біскуп Віцебскі Алег Буткевіч адслужыў Эўхарыстую, перад якой адбылася працэсія з цудадзейным абразом Маці Божай Шкаплернай.

✅ Віцебская Курыя паведаміла, што пробашч мясцовай парафіі Святога Духа ксёндз Андрэй Вашчук быў асуджаны на 15 сутак арышту па абвінавачванні ў парушэнні парадку арганізацыі або правядзення масавых мерапрыемстваў. Суд адбыўся 18 ліпеня 2022 года ў закрытым рэжыме, таму ў чым канкрэтна абвінавацілі святара, невядома.

✅ Арцыбіскуп Юзаф Станеўскі і біскуп Юрый Касабуцкі памаліліся за кардынала Казіміра Свёнтка ў гадавіну яго смерці. Мітрапаліт Мінска-Магілёўскі і Генеральны вікарый архідыяцэзіі 21 ліпеня 2022 года цэлебравалі святую Імшу ў архікатэдры.

Тыдзень у Беларусі – важнае

✅ У Гудагаі пачаліся урачыстасці з нагоды 15-й гадавіны каранацыі цудадзейнага абраза Маці Божай Гудагайскай. Духавенства, мясцовыя вернікі і пілігрымы 15 ліпеня 2022 года ўдзельнічалі ў святой Імшы падзякі, урачыстасці працягнуцца 16 ліпеня-17 ліпеня.

✅ Купалаў фэст у 140-годдзе з дня нараджэння беларускага песняра прайшоў у Радашковічах. 10 ліпеня 2022 года ў мясцовай парафіі Найсвяцейшай Тройцы ўшанавалі памяць народнага паэта Беларусі Янкі Купалы.

✅ Дыяцэзіяльныя ўрачыстасці ў Тракелях завяршыліся аднаўленнем сужэнскіх абяцанняў i Эўхарыстыяй. 10 ліпеня 2022 года, на другі дзень урачыстасцяў у санктуарыі Маці Божай Каралевы нашых сем’яў, свае абяцанні аднавілі больш за 50 пар і затым паказалі супольны танец.

✅ Першы езуіт-беларус склаў вечныя манаскія шлюбы ў пасвячаным напярэдадні касцёле святога Ігнацыя Лаёлы ў Віцебску. Цырымонія ўрачыстага манаскага абяцання айца Віктара Жука адбылася 10 ліпеня 2022 года.

✅ Caritas Мінск працягвае дапамагаць жыхарам сельскай мясцовасці - дабрачыннае каталіцкае таварыства Мінска-Магілёўскай архідыяцэзіі рэалізуе праект «Звераполіс». У чэрвені і ліпені валанцёры і супрацоўнікі Caritas падтрымалі каля 300 чалавек.

✅ У Абухаве Гродзенскага раёна заклалі фундамент новага касцёла. Святыню будуюць па ініцыятыве вернікаў мясцовай парафіі благаслаўлёнага Міхала Сапоцькі. Да гэтага часу ў вялікай вёсцы няма каталіцкай святыні, а тут жыве каля 300 католікаў.

✅ Прадстаўнікі амбасадаў краін Еўразвязу ў Беларусі наведалі Івянец і ўсклалі на прыкасцёльным цвінтары кветкі на магілы польскіх салдат, якія загінулі ў баях Другой сусветнай вайны. Таксама 13 ліпеня 2022 года дыпламаты наведалі тутэйшы касцёл Святога Міхаіла і кляштар францішканаў - помнікі пачатку XVIII стагоддзя.