Охирги вақтлар энерготизимдаги камчиликлар ҳақида кўп гапирилмоқда. Ҳукумат ҳам холис, ҳақорат ва туҳматларсиз танқидларни кўтариш билан бирга, имкон қадар муаммони ҳал қилишга ҳаракат қилмоқда. Мутасаддиларнинг ўзи чиқиб, жамоатчиликка тушунтириш, ҳисоботлар бермоқда.
Муаммони яширгандан кўра, уни тан олиб, ечим берган яхши. Агар бу муаммони ҳал қилиш узоқ муддатни талаб қилса, буни ОАВ ва блогерларам тўғри тушуниши керак. Вазирнинг истеъфосини сўрайвергандан фойда йўқ. Янгиси келса, муаммо тизимли ҳал қилиниши керак бўлса, бирдан ҳал бўлиб қолмаса, униям истеъфосини сўраймизми яна?
Аслида бу муаммоларнинг илдизи иқтисодиётда оддий талаб ва таклиф қонуни ишламай келган олдинги даврга боришини исталган нормал инсон тушунади. Ривожланган жамият қуриш йўлини танлаган исталган давлат аввалига энерготизимда маъмурий ислоҳот ўтказади. Ислоҳот йўлидаги мажбуриятларни тузилмаларда тақсимлаб олади.
Кейин нархлар сиёсатини қайта кўриб чиқади. Яъни бозор қонунлари ишлаб, сарфга яраша тўлов қилишга ўтади. Тизим субсидия ҳисобига яшашидан қутқарилади. Истеъмолчиларга тежамкорлик маданияти сингдирилади. Ана ундан кейин тизим тўлиқ ишга тушгач, чириган кабель, станциялар модернизация қилингач, рақобат пайдо бўлиши ва тизим юқори босқичга кўтарилиши учун хусусийлаштириш бошланади. Очиқ ва шаффоф тарзда. Бу эса узоқ муддатни сўрайди.
Аслида бу ишлар 90 йиллардаёқ қилиниши керагиди. Аҳоли сони анча оз, энергияга талаб жуда юқори бўлмаган, техника, машиналар кам вақтларни назарда тутяпман. Бироқ нималар бўлса бўлдики, чириган совет энерготизимида яшаб келавердик. Ўн соатлаб ўчирилган свет ёнганда "мен биринчи" деб шамни шошиб ўчирган вақтларни эслабам турайлик баъзан. Блэкаутдан кейин ўтган икки-уч йилнинг ўзини бир-бирига солиштирсак ҳам бўлади. Ҳолат анча яхшиланган. Тўғрими? Бу мавзуда яна гапларим бор, сал кейинроқ.
👉
@Zafarbek_Solijonov
