طريق السبي

لو بيدي اظل ويّاك صبح ومسيه
غصباً خذوني عداك لَبن الدعيه
.........

غصباً خذوني عداك مسبيّه عنك
لا ما شبعت اوداع يبن امي منك
عالناگه من صـدّيت يالغـالي لنّك
مگطع وذر يحسين فوگ الوطيه
..........

من شفتك بهالحال وجهي لطمته
يبن امي خويه حسين معقوله انته
جسمك وذر وجروح عالغبره شفته
شمسويه بيك الخيل يبن الزچيه
.........

شمسويه بيك الخيل صدرك تكسّر
گـدّ الجــــــروح البيك رسمك تغيّر
وشبيـدي خويه عليك گلبي تفطّــر
بحبل السبي يحسين مچتوفه اديه
...........

للكـوفـه مچتـوفيـن عنك مشينه
ترضه الشمر يحسين يحدي الظعينه
عيون الشماته سـهـام تـنـظـر علينه
ما خلّه عـدنا امتـون سوط ال اميه
.............

براس الرمح يحسين راسك تنصّب
وشيبك يبوالسجاد بالدم تخضّب
كلما اصدله تسيل دمعاتي ونحب
عيونك يصدّن شوگ خويه لرقيه
................

هزله وتهدّ الحيل ما ترحم النوگ
يردونه فرجه انصير مرّونه بالسوگ
بالكوفه وسفه انصير سالوفة حلوگ
وجدنه النبي المختار سيد البريه
...............

اصعب وشد يحسين كل الرزايه
لديوان امية شلون ندخل سبايه
وماظل ستر يحسين بس العبايه
ويتشمّت ابن زياد يبن امي بيه

سيد زيد الفحام
2020

لحن القصيده { يبن امي عالتربان عفتك رميه}
_____________________________