🍃🍃
🍃
📌 ئمزا...
کورتە چیروک وە بنزوان گەڕووسی
🖌نووسەر: فەوزیە بەشارت- ئەندام زانستتەنیا لە ناو ئەو داواگە م ناو جی کردم . . .
جا تاوانی ئرام بڕیگنەوە وە قەد هەرچی گوناهەک سەر لەم نەدایه.
دەنگی لەرزی، سەری خستە خوار. یەی ڕا وەک قانگ بان ئاگر لە جیەی خوەی باز برد. تمشای وەکیلەگەی کرد. دوارە دانیشت. خودکار وەکیلەگە له بان کاغزە نۊسریاگەی بان میزەگە ئەڵگرت و وەک سگار نیاگەیه سەر لیوی. فریە زۊ لاوردەیا. وەکیلەگە جمشتی دالە خوەی و خواست چتی بۊشی. هوومەن نەیلشت و وت: م بی‌گوناهم! لە ناو ئەو داواگە م ئەسڵەنی چەقوو لە لام نەۊ. وەکیلەگەی وت: بەنا وە شەواهدی ک هەس ئەسەر کلک تو لە بان چەقووەگە پەیا بیە.بریەگانی گریەدا لە یەک و وت: وەلی لە تاوانەگەد دشکنم! دڵنیا بوو، گاگەس تا پای دار برۊد وەلی بان دار . . . .وت نیلم، تا ئەورەک لە دەسم بیای داڵاش خوەم دەم، دەمچەوی ئاوردە نزیک هوومەن و وت: قەوڵ داگمە باوکد، وەقەرەی باوکدەوە باوەڕ کەم تو بی‌تاوانید، ئت مایە قازیەگە. م وەخاتر هورمسگەگان باوکدەوە ک ڕشیانە بان دەسم، سەری گرتە بانەو، هەردگ دەسی نیا ژیر چناوکی و شۊن قسیەگەی گرت: هورمسگەگانی چایگ بین، وەک یەخ.
هوومەن زەردەیگی گرت، بی‌دەنگ گیرست، هورمسگەگانی چایگ چایگ لە چەوەگانی ڕشیانە بان کاغزە نۊسریاگەگە ک وەکیلەگەی دانیاۊگەیا تا هوومەن ئمزای بکەی. وت: درووە ئاغه! کلکی کیشیا بان ڕەستەگان کاغەزەگە، وت: درووە!
ئەڵسیاگا، دوارە دانیشت، وت: تەناف دار قەواخەگە لە بان گەردنمە! وە بوغزیگەوە
کاغزە نۊسریاگەگە ئمزا کرد، خودکارەگە دانیا بان میزەگە و وەر کاغزەگە خشانەیە وەردەم وەکیڵەگە. چەو بڕی لە دەرە ئاسنیەگە ک دەلاقەی چوارگووشەی لەی بڕوش دریاۊ، سەروازەگە ئەوکردەوەی و وت: وقت تموم. هوومەن هەواسی هاتەو، دەنگ زڵە و هاوار و داد دیات. دوارە ناو بەندە قاچاقچیەگان بۊە داوا.
دەنگ ڕەستن و ترپە ترپ پووتین پای سەروازەگان لە فکر وەلەیە باڵی گرتۊ و کیشیاۊگەیە دەیشت.
وەکیلەگە کووتە چەرمەگەی خستە بان باڵی و کیفەگەی گرتە دەسیەو و وت: م . . .
هوومەن بەرز وت: نا نیخوازی، ئەگەر عەداڵەت ئەوقەرە بیشەرەفە و نەفام و م وە گوناکار دزانی . . . . سەروازەگە دوارە لە کونا چوار گووشەی دەرە ئاسنیەگەوە هاوار کرد: وقت تموم.
دەرەگە ئەوبیگەوە و یەی چرکە ڕووشنایی خوەرەتاو دەس داکوتا بیایە ناو سلوولەگە، وەکیلەگە دا بان دەسیا و داوردا و ڕوەی.
دەرەگە بەسریا.
هوومەن ما و سلوولی پڕ لە بیرەوەری. بیرەوەری ڕووژگەلیگ ک لە مابەین ڕستەی چیرۆکەگانی خوەیان ئیشتۊنە جیە، ناو ڕستەگەلی ک چەوەگانی نیتۊەنستن هورمسگەگانی ئامووشەوە بکەن، ناو ڕستەگەلی ک چوار پایەگە لە ژیر پای پاڵەوان چیرۆکەگەی کیشریاگەوە، پەت دارقەواخەگە فشار دیاوردە دەمارەگان گەردنیا، چەوەگانی سیەوە کرد، دەس و پا کوتا، دەمپاییەگان لە پای خزیانە خوارەو بان موزایکەگان ناو سلوولەگە.
بیە کەنینەو، دەنگ باوکی هاتە گۊەچکەیا: هوومەن تو بی‌گوناهید، ڕوەیم لاڵیامەو، وەیان وتم آقا بە خدا من هستم و این پسر، وتم پسر من باسواد و درس خانده، به خداوندی خدا مادرش تا دەقەی آخر امانتش را بمن داد، آقا بە خدا...دەنگ کەنینەگان داڵکی دیاتە گۊەچکەیا: پیاگە ئاخری قژه چەرمگەگان سەرد کاری کردن؛ حورمەت قژە چەرمگەگان سەرد گرتن، خاسە لەی ئاخر پیریەوە دڵمان نەشکیاگەو.
ئاری ژنەگە! وە قازیەگە وتم: آقا تو را جان بچەهات ڕەحم کن. کەفتمە بان دەس و پای، وەخودا، گیرستم، وتم پسرم بی تاوان . . . .دەنگ کەنینەگان داڵک و باوکی سلوولەگە پڕ کردۊن . . . .
برۊسکەی له ڕووشنایی خوەرەتاو لە سۊچی کەفتۊە بان دیوارەگەی پشت سەر هوومەن و وە خەجاڵەتییگەوە چەو بڕۊە ڕستەی ک لە ناوی نۊسریاۊ، شەرەف، تاوان، حورمەت، خدا...
لینک کانال زانست
@zanist2021🍃
🍃🍃
