Yomg'ir...daraxtlar jim boshini egar,
Yomg'ir...anglaganga hamma sirlar fosh,
Ko'kning juldurvoqi ko'ylaklariga
Oltin ipda yamoq soladi quyosh.

Bog'larda gerdayar korchalon shamol,
Izsiz ketmog'idan xabardor g'ofil.
Hanuz o'zgarmagan qadimiy savol,
Ichimizda tirik Qobil va Xobil.

Yomg'ir—balki Tangri ko'z yosh to'kar jim,
Ilviroq oriyat, loylangan nomus.
Ichimizda yashar kofir va muslim,
Ichimizda yonar Isroil, Quddus.

Haddimizdan oshdik, bitdi tamosho,
Lahzada bariga chek qo'yar Sobir.
Oxirgi ovozga tashnami dunyo,
Nahot yaqin bo'lsa eng so'nggi yomg'ir?!

Yomg'ir...anglaganga hamma sirlar fosh...

Mehrnoz

23.05.21.

@mehrinoz_abbosova