#ويبقى_الحسين
ياسامعي . من ادمعي . اسمع جواب امصابي
انسم الجبد . لكن يهد . حيلي الجره اعله احبابي
بطف كربله فجعوني .. ابسم العده يسكوني
اسمع جواب امصابي
. . . . . . . . . . . . . . . . . . .
جبدي مسموم . بالعمر يوم . باقي ودموعي تخط آهاتي
بالحشه جروح . گلبي مذبوح . من الجره بطف كربله لوعاتي
چم اخو انطيت . وباليسر جيت . للمدينه واكفلت عماتي
وخربة الشام . خلت الآم . بيه ومدافع غدن حسراتي
ياحسرتي . ويا دمعتي . اعله اختي رقية اجريها
من عالطشت . صاحت متت . وراس الابو امتانيها
وابچي سواد عيوني .. ابسم العده يسكوني
اسمع جواب امصابي
. . . . . . . . . . . . . . . . . . .
ما عشت يوم . الا وتحوم . كربله الما تبتعد عن بالي
يسرح البال . لنه جمّال . خنصر الوالد يگطعه اگبالي
وشفت الخيول . گامت أتجول . فوگ صدر حسين ابويه الغالي
وانظر الناس . مامش احساس . تشوف ابويه ينذبح متبالي
وبهالوضع . السم ينجرع . اهون من القاسيته
بطف الحزن . ذاب الجفن . من كثر ما بچّيته
وگبل الابو ذبحوني .. ابسم العده يسكوني
اسمع جواب امصابي
. . . . . . . . . . . . . . . . . . .
شفت الأيتام . بجمر الخيام . تنچوي وترد تظن تطفيها
والضمه يزيد . فروا ابعيد . الهيمه شوك وتذبح ابرجليها
شفت الأطفال . بذيچ الحبال . چفوفها الترفه العده امگيديها
والعده تريد . تهدي ليزيد . راس ابوي و عمتي تسبيها
وآل النبي . تروح بسبي . من انذبح واليها
بيت الفخر . عگب الگمر . يكون الشمر حاديها
وبسلسله گيدوني .. ابسم العده يسكوني
اسمع جواب امصابي
. . . . . . . . . . . . . . . . . . .
انسگي ابسم . ظنهم اهتم . مادروا مسموم گاظي ايامي
گلبي ممرود . شفت الورود . بالحوافر تنسحگ گدامي
علي الاكبر . من توذر . حيلي مات اعله الاخو وحزامي
احنه الاثنين . آنه وحسين . عالاخو اتكسّر ظهرنه ودامي
شفت الابو . يم الاخو . منحني وكض خاصرته
وآنه علي . الاكبر الي . مثل الهوى وفارگته
وبلا هوى خلوني .. ابسم العده يسكوني
اسمع جواب امصابي
. . . . . . . . . . . . . . . . . . .
عاشت وياي . لهفة الماي . بعين عبد الله ولا انساها
اتمرني لحظات .بيها حسبات . وعالشريعه حسبتي الگاها
انظر اچفوف . ذبحة الخوف . امگطعه ويمها الرمح والواها
اصرخ بصوت . خذني ياموت . من بعدهم دنيه شترجاها
ومنّ الاجل . يمي وصل . وابتده يقبض روحي
گتله ابحزن . گلبي اليون . اقبض وياك اجروحي
والكربله ودوني .. ابسم العده يسكوني
اسمع جواب امصابي
. . . . . . . . . . . . . . . . . . .
خادم أهل البيت عليهم السلام
عمار العيساوي الكربلائي
#لك_الفداء_سيدي_اباعبدالله
#خدر_الفواطم_لنشر_القصائد_الحسينيه
________________________
لمن يجد صعوبة بالحن اطلبه من
@moatmed1
