الشاعر رياض الرسل الجابري

زينب (ع) تتكلم مع اخيها العباس بعد عودتها في الاربعين
---------------



وصل ضعن الفواطم گوم ياعباس
تلگاني يخويه و لو متأخره

اجيت بأربعينك والگلب مشتاگ
فك باب الگبر منك ردت نظره

خجلان السهم بالعين ها متشوف
اخذ العين مني والگلب جبره

اگعد خل اسولف عالجره والصار
واراويك المتون البالضرب حمره

بعد عينك خذوني امچتفه بحبال
شسولف عالضرب عالشتم عالسطره

حدي بيه الشمر يا وسفه لرض الشام
وصار الراي رايه والامر امره

وهسه اني اجيت ودمعتي بالعين
حاچيني يخويه بداعت الزهره

حتى لو تون بالگبر اني ارتاح
سمعني ونينك والگلب صبره

متعوده يخويه امشي بس وياك
حارس خدر اختك انته والعشره

اجيت شلون وارجع وانته مو وياي
لتخليني خويه هواي منتظره

اول مره احچي وماترد عباس
راح ارجع وگلبي من الحزن جمره

مو هين افراگك صعب ياعباس
صعب كلش صعب وافراگك اشكبره






لاتنسون والدي من الرحمه والغفران
خادمكم رياض الرسل الجابري

كعديه اربعينية
عند انتهاء الاربعينيه ماهو شعور الخدام





ايام اربعينك ياضوه العين
خلصت وانتهت بدموع يحسين
والخدام يبجون
من رجعو لأهلهم

١

الخادم بليل اربعينه واگف بدمع انتظاره
فارغ الشارع يعاين خلصت بساع الزياره
ناده واتسمعه المواكب ينظر بحيره ومراره

خلصت الخدمه بيا وضع
مابين آهات ودمع
والخادم المحني ضلع
خدمة الزاير شعاره

بكل لهفه المواكب من ينصبون
تعال انظر عليهم من يرجعون

بالمدمع ينوحون
من رجعو لأهلهم
٢

اربعين الخدمه جنه وتگصد العشاگ ليها
والمواكب كلها تحضر تستعد تنوي وتجيها
اسبوع واسبوعين تخدم الزهره واتعاين عليها

كل المواكب والخيم
مقبوله أي كلها نعم
صك الشفاعه للخدم
اتوقعه الزهره بديها

بخدمت اربعينيتك علامه
الزهره اتسلمك صك الخدامه

بشاره خل يسمعون
من رجعو لأهلهم
٣

الخدمه حلوه وبيها لذه
من تعوف اهلك وتحضر
تشعر بعابس الخدمه چنك وتشعر بقنبر
الناس تزغر بالخدامه وبربعينك انته تكبر

تحضر وجاي بنيتك
تشعر اللذه بخدمتك
بس المصيبه برجعتك
بيك ترجع نار تسعر

تنظر للدرب مابي مواكب
خلصت خدمتك والگلب ذايب

وانقبلوا يسألون
من رجعو لأهلهم
٤

سنه يجمع ابو الموكب فلوس ويحسها قليله
حتى بيها اسبوع يخدم وخدمته ايحسها طويله
يدعي كل هاي الخدامه
كون ترضاها العقيله

من تخلص الخدمه بألم
اتشيل المواكب والخيم
والخادم ايحس بالندم
ويرجع اهمومه ثگيله

وتهل الخدم بالحيره دمعه
وبطارف الموكب كلها تنعه

كلها تبچي لعيون
من رجعو لأهلهم
٥

تفرغ بساع المواكب والمواجع تبدي بينه
نسأل وماندري احنه بره لو جوه السفينه
حسين نسأل بالمدامع خاف ماقابل علينه

لو شافنه انهل الدمع
وانحلفه بكسر الضلع
يقبلنه ندري بأي وضع
حسين ابو الروح الحنينه

ينزف نحر ابو اليمه عجايب
مذبوح ويحن اعله المواكب

چم عاشگ ومجنون
من رجعو لأهلهم



المصيبه


خلصن ايام الخدامه واربعين حسين عده
ورجعت اتون المواكب والحنين البيها بعده
اتعاين الخادم بحيره صافن ودمعه اعله خده

رافع اديه صوب السمه
عالخدمه روحه هايمه
ايحلف الباري بفاطمه

ايسجل اسماء المواكب والخدم هاي المسيه





لاتنسون والدي من الرحمه والغفران
خادمكم رياض الرسل الجابري

قصيده اربعينية




رجعت بالدموع
والگلب مفجوع
تحمل جرح فوگ الرمح
وحسين ينزف نحره
١

على اجروح المدامع صوت يعله الزينب بحسره
هذا المنذبح عطشان اخويه ومهجت الزهره
عافت جسمه فوگ الگاع عاري ومنهشم صدره
واخذت راسه لرض الشام حامي وعالضعن يبره

گدام الضعون
وتنظره العيون

بدمع الحزن زينب تون
كل لحظه من اتنظره

٢

بعد جرح الهضم والشام وعيون الحرم تدمع
للشام بحزن طبت ومچتوفه بحبل تطلع
هاي الخارجيه هاي تحچي الوادم وتسمع
مهضومه ولخوها حسين هسه بيا گلب ترجع

رجعت بالجروح بالمدمع اتنوح

جرح الهضم طخ بالعضم
زينب حزنها اشكبره

٣

رجعت زينب بيا حال مابين الرعب والخوف
من اول طفل مچتوف ولأخر طفل مچتوف
وين الچان حاميها خل يگعد بعينه ايشوف
وين ايشوفها بيا عين لا عين البقت واچفوف

ماعدها حراس
وتنادي عباس

بدمع النظر وين الگمر
وتنادي بس بعبره

٤

وصلت والجروح هواي من راحت لما ردت
وحشه اگبور اهاليها زينب بالهضم گعدت
محتاره وتدير العين وبدمع الصبر شهگت
حست ريحة الخوه من صوب الگبر طلعت

مدمعها بالعين
وتنادي يحسين

يهل العزم وين الزلم
مذبوح ابن الزهره

٥

گامت راحت بآهات وصلت للنهر تنحب
تنظر وين طاح الجود ونيران الگلب تلهب
اختك انه ياعباس نادت وبهضم عتبت
ترضاها يبو النوماس رجعت بالدمع زينب

زينب بالأحزان دخلت بديوان

هذا الجره بت حيدره
ترجع بنار الجمره




لاتنسون والدي من الرحمه والغفران
خادمكم رياض الرسل الجابري

نزله اربعينيه سريعه




الأربعينيه
ثوره قدسيه
نبقه نسگيها بدمانه ثورة احسين
١

بثورة احرار الولايه حاملين الرايه
مثل سيل المطر نطلع رايه تتبع رايه
احنه خدام العقيله والها ننطي احچايه
ابيوتنه انعوف واهلنا ونعتني مشايه

هيه تبديها
بدمنه نحييها

احنه خدامچ يزينب ياضوه العين
نبقه نسگيها بدمانه ثورة احسين
٢

مثل جابر بالمدامع نحضر انواسيها
بربعين الطاح ضامي بالدمه انوافيها
من يصير ازامط باچر تسمع اناديها
راية الحق يالعقيله بكربله انعليها

من تعنينه
ألها نادينه

كربله ثوره وعقيده وألها ماشين
نبقه نسگيها بدمانه ثورة احسين
٣

كربله بعين الحقيقه والولايه انشوفها
ندفع ارواح ونجيها كعبه واحنه انطوفها
كربله نبقه اهلها واحنه احنه ضيوفها
انعوف كلشي وما نبالي وكربله منعوفها

عايشه بدمنه
كربله أمنه

الخاطر حسين وعضيده الضحه چفين
نبقه نسگيها بدمانه ثورة احسين
٤

الكربله احنه نواصل نزحف اتعنينه
كعبة الاحزان نادت زينب ولبينه
انعوف كلشي احنه ورانه وبالدرب نادينه
انصيح لبيك بدمعنه ومدد يامهدينه

ما تآخرنه
من ضمايرنه

صحنه يازهراء اشهدي عالموالين
نبقه نسگيها بدمانه ثورة احسين
٥

صرخة المشايه صرخه والدهر حاچيها
بعين زينب صرنه دمعه والزمن باچيها
تاج فوگ الراس نبقه زينب امخليها
احنه نتشرف خدمها وانحسبنه اعليها

منبع الطيبه
بت علي الهيبه

مثل هاي الخدمه نسأل تنوجد وين
نبقه نسگيها بدمانه ثورة احسين





لاتنسون والدي من الرحمه والغفران
خادمكم رياض الرسل الجابري

قصيده للمشايه




جنود هبوا رايه تتبع رايه
راح تبدي ثورة المشايه
ثورة الحق المبين
وين اهل الاربعين
راح تبدي ثورة المشايه
١

وين اهل الحق جنود المنتظر
راح تبدي رحلة العز والفخر
بكل سنه المشايه تنقل هالخبر
لأن دم حسين عالسيف انتصر

تنقل اسرار الدمع والعايله
ويبقه مفتاح التواصل كربله

ناده صوت العاشقين
وين اهل الاربعين
راح تبدي ثورة المشايه
٢

وين ياشعب الحسين اليعربي
گوموا يلا استقبلوا بنت النبي
زينب الراحت بنيران العبي
رايه رجعت ترف من ارض السبي

وين اهل ياليتنا كنا معك
يلا امشي والملائك تتبعك

صوت يعلوا الخافقين
وين اهل الاربعين
راح تبدي ثورة المشايه
٣

ثورة المشايه من نحر الدمه
عاشت وكبرت وصعدت للسمه
خضرت خدام بجروح الضمه
ولا تزال الثوره عدنا قائمه

ثوره وتنادي بيقين
وين اهل الاربعين
راح تبدي ثورة المشايه
٤

من اجل مشاية الحق والقيم
بكل شبر بالگاع من تنظر خدم
والنعم تربات شيال العلم
بيهم اتشم انته دخان الخيم

لجل زينب جددوا عهد الوفاء
بيها عرفوا رجعت الطف كربلاء

تنادي رجعت بالآنين
وين اهل الاربعين
راح تبدي ثورة المشايه

٥

رجعت الطف كربله بنت الكرام
رايه مرفوعه وعليها ايرف حمام
بت أمام وعالمه وأخت الأمام
بسيف اخوها ايقاتل وهيه بكلام

بين اخوها وكربله حلقة وصل
وثورة حسين اعله أديها تكتمل

زينب الحبل المتين
وين اهل الاربعين
راح تبدي ثورة المشايه





لاتنسون والدي من الرحمه والغفران
خادمكم رياض الرسل الجابري

اين الان زينب ؟
------------------

وين زينب هسه اسمع يالغيور
هسه زينب عالهزل

بعد ما رحلوا أهلها ومشوا عنها
بدمـعه تتسله وتخفـف بيـها ونها
زينب العـاشت اميره وملك چنها
هسه مـن كثر السياط ازرگ متنها
على زينب الوكت ياوسفه يجور
الشافـته ماينحمل
هسه زينب عالهزل


من بعد عـباسها وليه ولوها
زينب ابلاي كفيل اتصوروها
شلون من جابوا الناگه وصعدوها
الشمر صعدها بمكان الحيد اخوها
صبر زينب صار بالطف الها سور
هذا ياديـن وعــدل
هسه زينب عالهزل


صعدوها والدمع يجري اعله خدها
اتذكرت عـبـاس كافلها وسندها
شلون زينب للغرب تمشي وحدها
و لو مشت ياهـو الوطن جدها يردها
گلب زينب جلد بالطف وصبور
هـالظلم هـم ينقـبل
هسه زينب عالهزل


بجال ابـوها وامها واخوتهـا اميره
هسه تمشي اعله الهزل راحت اسيره
من بلد تمشي الـبـلد يادنيه حيره
من بعد عباس اخوها ابـو الغيره
شلون زينب قدمت بالطف نحور
وبگـلـبها المشتعـل
هسه زينب عالهزل


بعد كل رحلت عذاب الغاضريه
عالهزل ام الخدر تمشي سبـيه
لبن اخوها اتعاين ابـدمعه جريه
وبالعـبايه املفـلفه سكنه ورقيه
جرح زينب ثوره عالطاغي يثور
وياها چم طفله وطفل
هسه زينب عـالهــزل







لاتنسون والدي من الرحمه والغفران
خادمكم رياض الرسل الجابري

بشر عندما عاد الى المدينه وصار هذا الحوار
مع السيده ام البنين ( ع )



بشر صاح ويـروي حـال الـواقـعـه
ويحچي لام عبـاس ويهل مدمـعـه



اتـقـدمـت يـمـه وتعـدتـهـا الجــمـوع
اتـلگـتـه ام عـبـاس وبفـيض الدموع
بـالگـلـب عـبـرتهــا تبچـيـهـا وتـلـوع
اتگـلـه احچـيـلـي الگـلـب لـتـلــوعــه



يابـشر احـچـي اخـتـصـرلـي بـالكـلام
لاتهـيـج نــاري مــو كـافـي حــــــرام
راح اسـألـك انـي عــن ابـنـي الامـــام
وگلـبـي مـــاريــد بغـصـص لتجـرعــه



صــاح بـشـــر وگـلهــا يـم الـفــاگـــده
اربـع ابـنـيـنـچ احچـيـلـي اشـرايــــده
ايساعـــد الله بـهـاي گـلـب الــوالــــده
شـلـون تـتـحـمـلـيـن فـگــد الاربـعـــه



افگدتي عون وجعفر وعبد الله طاح
هـناك بين اسـيـوف أمـيـه والـرماح
جروح ولـدچ صارن بجـيدچ وشاح
عـظـم الله أجـرچ بـهـاي الـفـاجـعــه



يـابـشـر ارحـمـنـي وارحـم حـالـتـي
مـا سألـتـك عـن بنـيـنـي بـدمعـتــي
گلبي يسأل عـن حسيـن ومهـجـتـي
يـابـشـر جــاوب الگـلـبـي واقـنـعــه



راح اخـبـرچ صاح وبـهــذا الخــبـــر
طاح عـبـاس الگـمـر فـوگ الـنـهــــر
وطاحن اعله النهـر چـفـيـن الـگـمــر
وجـثـت ابنچ ضلت اعـله المشـرعـه



صاحت بصوت ودمـعـهـا مـن دمــه
ليـش يـابـشـر الـدلـيـلـي اتــألـمـــــه
اني اسألك ويـن مهـجـة فـاطــمـــه
ويـابـشــر ردت الجـوابـك اسمـعـــه



يـلا خـبـرنـي واريــد اسـمع جـــواب
و ريـح گـلـيـبـي بعـد هــذا العـــذاب
كافي مو گلبي خلص بالحـسـره ذاب
بهـيـده وي گـلـبـي بـعــد لتـصــدعـه



اهـنـا بـشـر صاح بـألـم يـم البـنـيــن
زيـدي من بچـاچ زيــدي والـونـيــن
بـعــد عـن حسـيـن بـالـچ تـسـألـيــن
مات بـس مـن مات مـحــد شـيـعــه



مات ضامي حـسيـن مـابـيـن الـعـده
عـالـتـرب ضل والثـيــاب امجــــرده
ويـلـي ثـلـث أيــام ضـل الــوحــــده
هــذا ابـنـچ حـالـه هــذا ومـصـرعـه



الخيل سحگت صدره والراس انفصل
مــات الحـسـيــن وبعــد مـاضـل امـل
وهــاي زيـنب رجـعــت ابـلايـه اهــل
بـفگـد اهـلـهـا وبـالحـزن متگـبـعــه






لاتنسون والدي من الرحمه والغفران
خادمكم رياض الرسل الجابري

رقيه لم ترجع مع الضعن في الاربعين





رقيه ما اجـتـي بهل سفر
رقيه بيها وشسوه الدهر
رقيه هناك مـاتت عالنحر
رقيه
رقيه



بگلبه شيصير اليفارگ دنيته ومحبوبه
من المدينه من اجتي بالضعن مهيوبـه
من بعد حرگ المخيم تنحب ومرعوبـه
وينـــه لينادي رقيه الله يمحي ذنــوبــه
رقيه تنحب الليله وتـــون
رقيه والسياط اعله المتن
رقيه تروي الكم هالخبــر
رقيه
رقيه



حضرت ويمها ابوها وعمها بيــــده الناگه
صعب عالعاشگ يدنيه من تفضحه اشواگه
شوف من حضرت رقيه بنارها الحــراگــه
تصيح مادامت فـرحتي والفرح من بــاگــه
رقيه عينها الـــراعي العلم
رقيه وتنظر الصوب الخيم
رقيه يعني هالليله بخطــر
رقيه
رقيه



چان متوقعــه رقيه يبقه ويــدوم الشمل
بمعركه ودارت رحاهـا وشافت الماينحمل
شافت بعين الطفوله انذبح چم طفله وطفل
والشمر شافته بيده راس ابوهــا ينفصل
رقيه شافت بدمع الضمـه
رقيه انذبح مهجت فاطمه
رقيه والگلب منها انكسر
رقيه
رقيه




راحت اخـــذوهــا سبيه ينظر الها الاجنبي
الله يلعن آل امــيــه نصـــرخ وكل ناصبي
طفله مهيوبه واميره وينها اويـن السبي
وين ماتلتفت تلگه كلها محــروگـه العبي
رقيه بدمعه تمشي وسايله
رقيه ودعــتــهــا الكــربله
رقيه تلتفت وين المفـــــر
رقيه
رقيه





وصلت الشام بدمعها شلون صايـر لونها
بالخرابه گعدوها والله يدري شلونـهــــا
الها جابو راس ابوها شمته وخي عونها
فوگ راس الابو ماتت تالي ويدفـنونها
رقيه من بعد ذاك الحـزن
رقيه بالخـرابــه تـنـدفــن
رقيه تصيح وين المنتظر
رقيه
رقيه







لاتنسون والدي من الرحمه والغفران
خادمكم رياض الرسل الجابري

اربعينية الامام الحسين (ع)





شوف زينب ردت ابدمعه وتون
شوف زينب والدمع غطه الجفن
ردت بـدمـع الآلـم
ويـاها اطفال وحرم
شوف زينب شوف زينب



بـالگلـب دمع اليســر والانـتـظــار
من اثـر نـار السبي الصايــر مرار
القدر مفروض القـدر مو باخـتـيار
واحـنـه مو بـيـدينـه ونحـدد مـسار
شوف زينب لبست ثياب الحزن
شوف زينب ردت بلوعه وتون
تشعـر الحيل انهدم
وياهـا اطفال وحرم
شوف زينب شوف زينب



رجعـت بجـرح الصبـر والامنيات
بعــد ماكلشي انتهى والامـل مات
شلون تگدر تحيي هاي الذكريات
والامـل يـرجـع اذا ماكـو حــيـاة
شوف زينب تحچي والمدمع يهل
شوف زينب تصيح شيـرد الشمل
تگول محد ما سلـم
وياها اطفال وحرم
شوف زينب شوف زينب



لعـبـت الايــــام وامـتـــد الصــده
بين جرح الفاجعه ونـــار العــده
وزينب تعـوف الضحايـه امــدده
حتى هاي الملحمه تظل خــالــده
شوف زينب جرح يمشي اعله الارض
شوف زينب عـالجــره ماتعــتـــرض
من اجل هاي القـيم
وياها اطفال وحرم
شوف زينب شوف زينب



ردت ولـيــل اليسـر مابـي گــمــر
عافته ايضوي اعله جرفين النهر
راحت وردت بـلـوعــات الـقـــدر
بين دمــعــات اليـتــامه والسهــر
شوف زينب عالنهــر ردت تصد
شوف زينب عالنهـر عافت ورد
تنادي ياراعي العلم
وياها اطفال وحرم
شوف زينب شوف زينب



جرح لوعـتها وصبرهـا والـدمـع
بكل شبر من تمشي تشعـر ينطبع
رجعــت وليل الشماتـه ابـلا شمع
اتـأمن شـلـون وبعــد بي تقـتـنـع
شوف زينب عرفت بجرح القدر
شوف زينب بالگلب تارك اثــر
واثر شافت للخـيـم
وياها اطفال وحرم
شوف زينب شوف زينب







لاتنسون والدي من الرحمه والغفران
خادمكم رياض الرسل الجابري

قصيده رباطات هوسه للمشايه



هاي الرايه من العباس
راية حيدر
١

ياشيخ وبنص الزلم لمن رفعت الرايه
گاصد حسين برايتك وچفوفك محنايه
افعالك الماتنوصف لمن تسولف آيه
عباس ناده بالصحن ياهله بالمشايه

واحنه انرد اعله العباس
بصوت وصوره
٢

اعدادنه الماتنوصف مثل المطر هدينه
نحضر انجددلك عهد للموت ياوالينه
مشايه وبهاي السنه عين الشمس سدينه
احنه مجانين العشگ لحسين واتسمينه

مجنونين وتاج الراس
حسين الوالي
٣

زامطنه وافعال الزلم وازماطنه ايعرفونه
گد الكلافه بالوصف والوادم يسمونه
عشاگ ابو اليمه وأبد مانصبر احنه بدونه
واحدنه من يمشي بخت وامبين من اعيونه

تمشي وشايل حب حسين
بنص عيونك
٤

مشايه اهل المرجله وشيوخ عد الوادم
كل عام من نمشي الك خادم يوصي خادم
بالك تزعل بالدرب خادم وتزعل فاطم
من بيتك الحد كربله ظل بأمامك هايم

من تصبح عاشگ مجنون
وچنك عابس
٥

كل واحد يشد العزم مشاي هاي افعاله
يگصد مضيف اهل الوفه يابخته ياهنياله
زينب يواسيها بدمع لو شاف هاي الحاله
ضعن الحسين ايشاهده وبدمعته الهماله

الليله حسين ايريد دموع
الخاطر زينب
٦

كل خطوه تخطيها بدمع من توصل المظلومه
زينب وتاريخ البخت يحچيلك المعلومه
راية نصر رجعت ترف بيها وجميع واعلومه
عباس وعگال الزلم لحسين هذا ويومه

الليله الشيخ ولجل حسين ايذب اعگاله



لاتنسون والدي من الرحمه والغفران
خادمكم رياض الرسل الجابري

اربعينيه




ابدمعه عـالخـد هامله
ردت الطـف كــربـلــه
من يسرها من يسرها


رجعت الطف كربله بدمع النواضــر
شلون ردت بالضعن تكسر الخاطــر
انشارك المظلومه احنه بگلب صابر
والها تصدح بالحزن هاي الحناجــر
بدمعه رجعت سايله
ردت الطف كربله
من يسرها من يسرها

بجـمرة الاحزان ردت والمصيبـــه
رجعـت بدمع الحزن زينب غـريبـه
ذكرت وداع الحبيب وي الحـبيبــه
بگلب دامي وللاسف شاجر لهـيبه
بجرح ناتج حاصله
ردت الطف كربله
من يسرها من يسرها



عـرفـت بجرح القدر مارحـم بيهــا
ضحت بشـبـانهــا وضحت وليهـــا
رجعت وحبل اليسر جرح اديهــــا
والف وسفه الشامت ايعاين عليها
والمشيها اتواصله
ردت الطف كربله
من يسرها من يسرها

هــذا حال الفگــد اهله وكل بنينـه
عالصبر واعله الحزن الله اليعينه
الناس تنشد عالكفلها وينه ويـنـه
بغيره ردت للاسف هاي الضعينه
بالضعن متكفله
ردت الطف كربله
من يسرها من يسرها


نادت بــدمـع اليسر هـا يالهـواشم
اتلگوا زينب ردت بضعـن الفـواطم
بنار لـوعـتها اجتي وبگـلـب هـايم
وعالضعـن ياللاسف تنظـر الـوادم
الموقف انته اتخيله
ردت الطف كربله
من يسرها من يسرها





لاتنسون والدي من الرحمه والغفران
خادمكم رياض الرسل الجابري

عگيلي للأربعين



زينب ردت و برايتها
عالمشايه اترف نشرتها


ردت والــرايــه المنـشــوره
زينب تحملـهـــا ومنصـوره
بهل رايه الحـق ودسـتـوره
زينب بت حيدر رفعـتــهــــا


زينب تحملها ومـنـتــصــره
رايـة عــز اتـــرف وخضره
مكتوب اعليها اسم الزهره
بــزود العـبــاس وحملتهــا


مو مثـل الـرايــات الـرايــه
تحمل چم مغزه وچم غايـه
اترفـرف بالحق عالمشايـه
تحملهـــا وللـطـف ردتـهــا


بهـل رايه العـزه ومعـناهـا
ردت تــرفـعـهــــا بيمناهــا
زينب تمشي وتمشي وياها
هـالــرايه اتمثـل عــزتـهــا


عـزتها الـرايــه المرفـوعـه
ردت ماچـنهـا ومفجـــوعـه
چن ماشافت هضم ولوعــه
كل حيل البيها من اخوتهــا


رايـه وزينب بيها التحــدي
نـادت هاي الـرايه العـندي
مذخوره وباچــر للمهــدي
تظهر من يظهــر حفضتها





لاتنسون والدي من الرحمه والغفران
خادمكم رياض الرسل الجابري

شوط كربلائي للاربعين


رجعت زينب بدمعات بيوم الاربعينيه
اميره ومن بعد عباس ردت هسه مسبيه

1

بعد ماراحو اخوتها بالطف وانتهت الاحلام
اسيره اخذوها بت حيدر الف ياوسفه لرض الشام
هذاك العز هذاك الجاه بعد اخوتها لا مادام
بقت ياوسفه محتاره
ودمع عالوجنه يتجاره
الاسر ماتنحمل ناره
هضيمه يصير بيها الصار بعد عزها ولياليه

2

مشت للشام مهضومه وياها حرم واطفال
الاميره شلون يادنيه سبيه وتنچتف بحبال
الدهر وياها مايرحم وسوه الما يمر عالبال
تمشي اعله الهزل وتروح
اسيره والگلب مجروح
واخوها اعله الترب مذبوح
ورقيه تشوفها تبچي من اخذو الترچيه
3

وصلت زينب بيا حال للشام ابدمه الناظر
تسمع بس حچي الشمات حزينه وتكسر الخاطر
ماچان اليصير يصير الكفيل وياها لو حاضر
الشماته صارو الحراس
وعليها تصيح كل الناس
تمشين وبلا عباس
يهضموني اخويه اهنا اذا ايجيبون طاريه

4

گعدو بالخرابه شلون منظر يصعب حسابه
وجابو راس اخوها حسين تنظره بنار لهابه
وصاحت بالخرابه بصوت آه يحسين ومصابه
لعد الراس وتنظره
ورقيه شمته بنحره
تراويه گامت السطره
متحملت وفوگ الراس تودع اول ابنيه

5

ورجعت بربعين حسين تنادي والگلب جمره
تسمعني اذا اناديك يخويه ومهجت الزهره
وهيه يم گبر لحسين گعدت شمته الگبره
تحچي بجمرت المدمع
ترضه بيا بخت اطلع
وحدي وللوطن ارجع
ويم ام البنين هناك اسوي بدمعي لطميه





لاتنسون والدي من الرحمه والغفران
خادمكم رياض الرسل الجابري

موشح الاربعين



گوم يحسين وتلگه اضعونها
من اليسر جتك وشوف شلونها


گوم شوف اختك وشاهد حالها
بس عليلك والصبر يبرالها
زينب المحد يشوف اخيالها
ترضه يحسين العده يضربونها


الماخطر عالبال زينب شافته
باليسر يحسين والهم شربته
والعليل وياها حارس عمته
چان بالشام ويدافع دونها


طبت الشام وتشاهد صار عيد
ﻻن هذا الأمر صادر من يزيد
مادروا هالراس راسك يالشهيد
العل رمح وتشاهدك بعيونها


ظلت بهل حال وبدمع الحزن
بس تون اعليك يحسين وتون
أبد ماحسبت گلبها يمتحن
ولاحساب الطف تجي ويسبونها


ردت بضعن الفواطم للطفوف
گوم لأختك وأنظر بعينك وشوف
نار سبي اختك امض من السيوف
البيها رادوا بعدك يذبحونها


خلي جسام وعلي الاكبر وياك
وخلي الانصار بشرف توگف وراك
وجيب عباس البطل حامي لواك
وياك لاختك خلي يتلگونها






لاتنسون والدي من الرحمه والغفران
خادمكم رياض الرسل الجابري

اربعينيه



يزينب هضيمه
بعد ذاك الخدر والعز سبيه
اسيره الاميره
بلا كافل ترد للغاضريه

رجعت بدمعت حزن أملها
محد اتلگاها من أهلها
هضيمه هضيمه
١

گلبها ودربها
مشت بي ساهرت سود الليالي
ألمها وهضمها
على عيون الحبايب والغوالي
تناظر تصابر
تشاهد روس برماح العوالي
دمعها وضلعها
لچمها ونادته وينك يغالي

اجيتك اسيره
ولا واحد ابد يسأل عليه
لونها تشاهد
تجي وتشوفني أمي الزچيه

والضعن من كربله وصلها
محد اتلگاها من أهلها
هضيمه هضيمه
٢

صبرها وخدرها
اعز من شامت ايعاين عليها
يشاهد حبلها
الف ياوسفه مچتوفات أديها
الحبيبه الغريبه
لون يگعد يشاهدها وليها
بالدموع يناظر
عزيزة گلبه رجعت من سبيها

صعوبه يشاهد
الحبيبه الغاليه و لوعت ألمها
والاكثر والاصعب
اذا شاهد بعد ازرگ متنها

نادت وماجاوب الكفلها
محد اتلگاها من أهلها
هضيمه هضيمه
٣

اليحبها اليودها
ينوح ويبچي وبهاي الرزيه
لأنها بحزنها
ترد مسبيه لرض الغاضريه
المواقف عواطف
نادت زينب الاصعب عليه
اذا حسين سأل وين
يزينب يختي شو ماكو رقيه

شجاوب والدموع
صعب اخفيهن بهذا سؤاله
بديه أمانه
اخويه حسين سلمهم اطفاله

تشعر وصعبه أذا سألها
محد اتلگاها من أهلها
هضيمه هضيمه
٤

بلا روح اذا اتروح
تظل تتعكز بجرح الهضيمه
بلا ظل تناضل
بالشموس وابد ماعدها خيمه
الامل مات بلا ذات
المشه وياها ونطفته مو سليمه
بدمع حار على الصار
تون زينب الف وسفه وحريمه

بدمعتين على حسين
تصبهن والدمع بس للغوالي
بالاحساس يعباس
لونك تعرف اشصار وجرالي

اختك البعدك وگع حملها
محد اتلگاها من أهلها
هضيمه هضيمه
٥

بالاحزان رغم چان
وضع زينب لمن عادت أسيره
تناظر عالحشود
وتشاهد بالدرب هاي المسيره
المواكب والبيوت
الخدم كل الخدم والعنده غيره
يعزبون ويمدون
على طول الدرب سفره چبيره

يزينب يكتبون
عهد هاي المحبه والخدامه
بالاخلاص يريدون
القبول بهل عمل بس والسلامه

زينب الكون انخلق لجلها
محد اتلگاها من أهلها
هضيمه هضيمه



لاتنسون والدي من الرحمه والغفران
خادمكم رياض الرسل الجابري

عودة زينب بالاربعينه




زينب بعد الغياب
ردت بحيره
تمشي بولية اجناب
ردت بحيره
تبچي بدموع العين
نادت خويه يحسين
ردت بحيره
١

بعد اليسر بعد الهضم والاحزان
ردت تنادي وين اخويه العطشان
وين الكفلني ايشوف حال الرضعان
ينظر عليه للاسف ياهو الچان

بت حيدر الكرار
ردت بحيره
تبچي بدمع مدرار
ردت بحيره

دربك والگبر وين
نادت خويه يحسين
ردت بحيره
٢

حيره ومدامع والعمر مامحسوب
زينب اسيره ورجعت بحسره اتلوب
الچانت اميره ايامها بالمگلوب
للأسف ردت مثل واحد مطلوب

بنت الزهره هاليوم
ردت بحيره
تبچي بگلب مالوم
ردت بحيره

ماخذك مني البين
نادت خويه يحسين
ردت بحيره
٣

ماتهده زينب والطريق بحسره
رجعت تنوح وعبره تاكل عبره
ماينجبر گلب الحبيبه وكسره
اتعاين على السجاد حاير بأمره

زينب بهذا الحال
ردت بحيره
تنظر والدمع سال
ردت بحيره

بربعينك ماشين
نادت خويه يحسين
ردت بحيره
٤

عالغبره عفتك منذبح يبن أمي
رديت الك والحسره تسبگ همي
بعدك حبيبي النوح صاير سهمي
فك باب گبرك خويه واگعد يمي

العافت جسمك مطروح
ردت بحيره
يبن أمي يالمذبوح
ردت بحيره

من بعد الصواوين
نادت خويه يحسين
ردت بحيره
٥

يبقه أربعينك حسره وبنص الروح
لا ما دريت اتروح من أيدي اتروح
حسبالي أيدي اتلوح جسمك متلوح
مجبوره عفتك من مشيت ومذبوح

اختك من هضم الشام
ردت بحيره
وياها بس أيتام
ردت بحيره

من بعد الدواوين
نادت خويه يحسين
ردت بحيره




لاتنسون والدي من الرحمه والغفران
خادمكم رياض الرسل الجابري

نزله اربعينية الزينب (ع)



زينب زينب ردت ومرفوعة الراس
زينب زينب رجعت براية العباس
١

من اليسر رجعت
والرايه مرفوعه
رغم اليسر والشام
والحزن واللوعه
براية نصر ردت
زينب ومدفوعه
من شافت الشمات
ماچنها مفجوعه

رايه رايه عاليه وذلت الارجاس
زينب زينب رجعت براية العباس
٢

بت حيدر الكرار
زينب برجعتها
ما دنگت هيهات
مرفوعه رايتها
والكربله الحوراء
منصوره وصلتها
تنظر و للزوار
مشايه شافتها

عاشت عاشت خالده وبهذا الاحساس
زينب زينب رجعت براية العباس
٣

تنظر على الزوار
والرايه فوگوها
تحملها وبأيمان
من رجعت وياها
بوگفتها للثوره
كملت معناها
رحمه الجميع الناس
بالحشر خلاها

رحمه رحمه الباري زينب حبها مقياس
زينب زينب رجعت براية العباس
٤

تنظر على الخدام
زينب بهل غايه
وتسجل الاسماء
بالسجل وفايه
كل موكب ومشايه
والحامل الرايه
اسمع يهل تخدم
وبشارتك هايه

باچر باچر بالحشر تفتخر عالناس
زينب زينب رجعت براية العباس
٥

كل خادم بهل يوم
لازم يعاهدها
والزينب بكل عام
يحضر يساندها
غير الحزن رجعت
والدمعه ماعدها
بت فاطمه الزهره
زينب ا والدها

حيدر حيدر عايش بشهكت الانفاس
زينب زينب رجعت براية العباس



لاتنسون والدي من الرحمه والغفران
خادمكم رياض الرسل الجابري

قصيده رباطات هوسه للمشايه



هاي الرايه من العباس
راية حيدر
١

ياشيخ وبنص الزلم لمن رفعت الرايه
گاصد حسين برايتك وچفوفك محنايه
افعالك الماتنوصف لمن تسولف آيه
عباس ناده بالصحن ياهله بالمشايه

واحنه انرد اعله العباس
بصوت وصوره
٢

اعدادنه الماتنوصف مثل المطر هدينه
نحضر انجددلك عهد للموت ياوالينه
مشايه وبهاي السنه عين الشمس سدينه
احنه مجانين العشگ لحسين واتسمينه

مجنونين وتاج الراس
حسين الوالي
٣

زامطنه وافعال الزلم وازماطنه ايعرفونه
گد الكلافه بالوصف والوادم يسمونه
عشاگ ابو اليمه وأبد مانصبر احنه بدونه
واحدنه من يمشي بخت وامبين من اعيونه

تمشي وشايل حب حسين
بنص عيونك
٤

مشايه اهل المرجله وشيوخ عد الوادم
كل عام من نمشي الك خادم يوصي خادم
بالك تزعل بالدرب خادم وتزعل فاطم
من بيتك الحد كربله ظل بأمامك هايم

من تصبح عاشگ مجنون
وچنك عابس
٥

كل واحد يشد العزم مشاي هاي افعاله
يگصد مضيف اهل الوفه
يابخته ياهنياله
زينب يواسيها بدمع لو شاف هاي الحاله
ضعن الحسين ايشاهده وبدمعته الهماله

الليله حسين ايريد دموع
الخاطر زينب
٦

كل خطوه تخطيها بدمع من توصل المظلومه
زينب وتاريخ البخت يحچيلك المعلومه
راية نصر رجعت ترف بيها وجميع واعلومه
عباس وعگال الزلم لحسين هذا ويومه

الليله الشيخ ولجل حسين
ايذب اعگاله



لاتنسون والدي من الرحمه والغفران
خادمكم رياض الرسل الجابري

ابوذيات للاربعين
لسان حال زينب (ع)




يدهري اللوعه احسبها ولك عاد
سجيه من گمت تجرح ولك عاد
رجع ضعن اليسر للطف ولك عاد
شعجب مرتين اشوف الغاضريه


يعت بيه الدهر گوه وعتبه
والي وياه الف حسبه وعتبه
لا دار البقت عندي وعتبه
ولا حتى اهل بالغاضريه


الجره مكتوب من الله وعدنه
نطينه كلشي للباري وعدنه
الك يحسين ردينه وعدنه
من الشام بس عفنه رقيه


اشاگف عن ايتامي اشكثر رديت
ويشتموني ولا فد يوم رديت
الك بالاربعين شلون رديت
شوف امتوني ياخويه واديه



لاتنسون والدي من الرحمه والغفران
خادمكم رياض الرسل الجابري

عندما عادت زينب ع الى كربلاء في الاربعين كانت تتوقع بأنتظارها اهلها وعندما لم تجد احد قالت
----------

رجعت الكم يخوتي من اليسر والشام
اجيت بلهفتي والدمعه بعيوني
رجعت من اليسر حسبالي الگاكم
رجعت بحسرتي وبحيرة ضنوني
وحدي بكربله محتاره ماضنيت
ولا اصدگ ابد وحدي تخلوني
گلت ارجع اشوف حسين والعباس
معقوله بغيابي راح ينسوني
راح اصعد التل وانده العباس
واحشمه بغيرته وبضربت متوني
واصيح حسين خويه حسين ماتفزع
زينب اختك وگامو يضربوني
حسبت حساب ارجع والگه ينتظرون
اختهم عالدرب لا مايعوفوني
هسه بكربله وحدي بدمع رديت
اصيح بصوت لاچن مايسمعوني
اجيت و ايدي چانت لازمه العباس
ومن طاح الكفيل بحبل شدوني
بعد ماكو اميره امخدرة عباس
هسه اسمي الغريبه من يسموني
كل ضني اصيح ويطلع العباس
واشوف حسين واگف ينظر الوني
امشي بكربله والحيره تمشي وياي
ياخوتي اجيت وماتشوفوني
گمت اسأل بروحي والدمع بالعين
معقوله اخوتي ماتلگوني




لاتنسون والدي من الرحمه والغفران
خادمكم رياض الرسل الجابري