Но сякоє! Доникав єм первый сезон «Чорного зерькала»
(Black Mirror, 2011–2019), а поділити ся думков забыв. Старав єм ся без шпойлерув, айбо уйшло видав ги усе. 🌚
The National Anthem (s1e01)
Премєр Споєного королства стає леді Ґодівов XXI стогудя: як далеко зайде людськоє жаданя «хліба тай зрілищ» тай обсесія публичными личностями? Ідея, масштаб, абсурдность заязкы — туй усьо так ги має быти. Про мене иппен сесь епізод задав тон, а з тым и жаданя до двох другых.
Fifteen Million Merits (s1e02)
На первый позур исе ми ся виділо таков тіповов камернов медіакратичнов антіутопійов, а конець мало фрустровав — (ДАЛЕ ИДУТ ШПОЙЛЕРЫ) чекав єм, ож у кунцьови увижу недоволных своими роботами Бінґема тай Ебі... айбо направду епізод уйшло май многогранным ги я зачатково думав.
Єден детайл заставив ня повторно обдумати сюжет: у посліднюй сцені у главного героя перед очима реалный ліс, а не файный образчик на екранови ги было сперед тым.
На поверьхности йся серія вызирать крітиков зрады прінціпув ради властної выгоды, айбо я туй вижу другу мораль — нам указуют персонажа, котрый на удлику уд другых поберовав економно ся справовати из грушми, дати шансу другому челядникови реалізовати ся, тай сам ся уділив на позадині другых. Главный герой не просто проклав свуй пішак до удносно нормалного живота, а досягнув того ціленапрямленостьов тай затятостьов, хоть на то му требало дустати мотіваційного копняка. Ун не пушов у то, што итак популарноє, а вытворив докус нову атракцію.
The Entire History of You (s1e03)
Што бде кедь нашу неідеалну людську памнять замінити почти ідеалнов ціфровов; кедь учинити споминкы фурт тай усяде приступныма, у высокуй кваліті тай из можностьов указати їх другым? Дустанеме 45 минут суперської драмы. Сесь епізод — трібный коментарь на тему «ци дуже файна памнять ото дар, ци проклятя?».
