&(23) مات الولد كلولي ▪︎▪︎ ▪︎ اوجفي تريد اتلولي
غالي او أنذره أبغالي ▪︎▪︎ لو مات أرسمه أبالي
مات الولد كلولي
--------------------------------------------

1) ادري هسه اشتاك لحضاني الورد
وانه من نظراته احس كلي يرد
والله عذبني ابغرب هذا البعد
ابياهي من أجروحي ياكلبي أعد
& درب الهجر اذاني ▪︎▪︎▪︎ او عبد الله شو ما جاني
اوجم صوره خله اكبالي ▪︎▪︎لو مات ارسمه ابالي
مات الولد كلولي
--------------------------------------------

2) أنه أحس ابكلبي بفراكه انلجم
اوكمت أصيحن مارجع صوب الخيم
أنه اخاف اعليه والله أمن السهم
اوخاف يغفه ابنحره ويبجي الحرم
& فدوه رحت لعيونه ▪︎▪︎▪︎ خاف العدى ايذبحونه
راح او أخذ دلالي ▪︎▪︎ لو مات أرسمه أبالي
مات الولد كلولي
------------‐------------------------------

3) ابني مو طبعه يغمضله جفن
وامه مو يمه اوينام ابلا حضن
كبل ليدفنونه كون انه أندفن
لو أخلص عمري يم كبره أون
& يم الولد خلوني▪︎▪︎وبفراكه تعمه اعيوني
هالدنيه ماتحلالي ▪︎▪︎ لو مات أرسمه أبالي
مآت الولد كلولي
-------------------------------------------


4) روحي بفراكه فلا تحمل قهر
وأكل أبعمري مثل جرف النهر
مهده اشوفه أكبالي وكماط وصور
اوصحت كون اوياه أمشي ابهالسفر
& بالخيمه اصيحن ويلي ▪︎▪︎▪︎اومطفيه شمعة ليلي
اوجرح الولد للتالي ▪︎▪︎ لو مات ارسمه أبالي
مات الولد كلولي
--------------------------------------------

5) كلت يكبر واسمع أنه أدللي
مادريت ايروح عني او أبتلي
ياهو بالدنيه يظل باجر الي
أيضمد أجروحي اويعوضلي هلي
& يرجع الي امتانيته ▪︎▪︎▪︎ اوميت إنه اتلكيته
اوبس الحزن يبرالي ▪︎▪︎ لو مات أرسمه أبالي
مات الولد كلولي
---------------------------------------------

6) أزغير بعده اوجنحه ماطار او عله
او مو رجوله أيذبحه بالطف حرمله
أدري من شافه طفل ما خجله
وأنه ادري أبعيد عنه المرجله
& اشسوه الزمن بفراكه ▪︎▪︎▪︎ ولعيونه أظل مشتاكه
وأدري البعد جتالي ▪︎▪︎ لو مات أرسمه أبالي
مات الولد كلولي
---------------------------------------------
لخادم اهل البيت ع/ أبو أحمد المجراوي 07805007942
قصيده سريعه بحق (عبد الله الرضيع )
اسألكم الفاتحه والدعاء لوالدي