تجرحني كل يوم هاي الرزية
چم غالي مذبوح و إشچم سبية

آ يا زماني . آ يا زماني . آ يا زماني

؛؛؛؛؛؛؛؛؛؛؛؛؛؛؛؛؛؛؛؛؛؛؛؛

يا زمن من لوعتك هون عليه
آنا إبن الداسته خيول آل أميه
بالحبال مربطيها إثنين أديه
مرة أنظر عمتي مرة أنظر رقيه

وكل لحظة الأيتام تنده عليه
تجرحني كل يوم هاي الرزية

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

من مشيت بحيرتي إبين السبايه
إشكثر قلبي شايل آهات و رزايه
طفلة مرعوبة و إجت تختل ورايه
تگول نار الخيمة حرگتلي العبايه

تنظرلي و تنوح و تجر بديه
تجرحني كل يوم هاي الرزيه

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

قلبي ما يبرد ولا يسكن نحيبه
عيني بالطف شاهدت أعظم مصيبه
حنة القاسم ترب بالدم خضيبه
شفت أخوي مكطع إبحاله عجيبه

و عبد الله مفطوم بسهم المنيه
تجرحني كل يوم هاي الرزيه

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

ماكو غير المدمع و صوت الفجيعة
ضلت السبعين بالحومة صريعة
ريت أموت و أندفن يم الشريعة
بيها طايح عمي و چفوفه گطيعة

ريت أوصل هناك و أنصب عزيه
تجرحني كل يوم هاي الرزية

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

آنا ودعت الحسين و عفته ضامي
بس المفارگ أبو يفهم كلامي
عالترب محزوز راسه و جسمه دامي
وحده ضل بلا نصير و لا محامي

يا بويه مذبوح بالغاضريه
تجرحني كل يوم هاي الرزيه

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

أسمع الميمون و ينادي الظليمة
بالبراري هناك فرت چم يتيمة
شعري شاب من المصيبة إشگد عظيمة
جثث أنظر بس ولا جثة سليمة

سحگتها بالدووس خيل آل أمية
تجرحني كل يوم هاي الرزية

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

#آ_يا_زماني
#علي_حسن_الكناني

https://t.me/Ali22kinani
الشاعر علي حسن الكناني
لنشر القصائد الحسينية فقط
https://t.me/kinani16