كافي يا دهر ، والله مثل مصابي ما تحصل مصيبة
يشهد النهر ، يَمَّه كافل ينعى زينب يا غريبة

؛؛؛؛؛؛؛؛؛؛؛؛؛؛؛؛؛؛؛

لا تلوموني ، لو بچيت إبهالعمر حد المنية
ريت ذبحوني ، ولا شفت ذبح إخوتي بالغاضرية
شافت عيوني ، جسم أبويه السحگته خيول آل أمية
حيل عذبوني ، من شفت أم الخدر طلعت سبية

يذبح القهر ، و آنه عشت إلهالوكت والله عجيبة
كافي يا دهر ، والله مثل مصابي ما تحصل مصيبة

؛؛؛؛؛؛؛؛؛؛؛؛؛؛؛؛؛؛؛؛

عندي چم غالي ، عني غاب و رجعته صارت بعيده
ماتت آمالي ، من شفت عبد الله فاض بدم وريده
حزني أوحالي ، سكنه صاحت وينه عمي الماي أريده
صورته إبالي ، عمي طايح عالنهر بس گطعوا إيده

مو من الكِبر ، راسي من هالفاجعة بين مشيبه
كافي يا دهر ، والله مثل مصابي ما تحصل مصيبة

؛؛؛؛؛؛؛؛؛؛؛؛؛؛؛؛؛

عايش بنوحي ، فاجعة عاشور خلت بيه جمره
زادت جروحي ، عالجروح البيه قلبي من يصبره
كل جرح يوحي ، صورة من أرض الطفوف و بيها عَبره
سكنت بروحي ، صورة الجسم السليب و خسف صدره

إبوحشة السهر ، إبليلي حتى الحجر گمت أسمع نحيبه
كافي يا دهر ، والله مثل مصابي ما تحصل مصيبة

؛؛؛؛؛؛؛؛؛؛؛؛؛؛؛؛؛؛؛

ويلي يا ويلي ، صعبة و الفاگد أبو يكثر عذابه
ينهدم حيلي ، لو ذكرت إلي جره بذيچ الخرابه
من يجن ليلي ، چانت رقية تذكرني بمصابه
چانت إتجيلي ، إبلهفه تنظرلي و تگلي وينه بابه

نوره من ظهر ، ماتت الطفلة على الشيبه الخضيبه
كافي يا دهر ، والله مثل مصابي ما تحصل مصيبة

؛؛؛؛؛؛؛؛؛؛؛؛؛؛؛؛؛؛

شوصف مصابي ، من رحت للغاضرية إبلا عشيرة
أدفن أحبابي ، بالجثث والله حرت حيرة چبيرة
الهم إعتابي ، ليش خليتوني وحدي دربي أسيرة
دم على ثيابي ، عيني صبت من شفت عمتي أسيرة

خاطري إنكسر ، عاليتامه مجرحة و كلها تريبه
كافي يا دهر ، والله مثل مصابي ما تحصل مصيبة

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

أسمع الجاني ، الگطع ترچية رقية يحچي بيها
بصوت نادني ، گال هاي الطفلة خل تگطع بچيها
والله أذاني ، يگول گلها هسه تسكت لو أجيها
همس بآذاني ، بس تضل تبچي أچويها بديها

گتله لا مفر ، من بطشكم لكن أترك هالحبيبة
كافي يا دهر ، والله مثل مصابي ما تحصل مصيبة

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

#كافي_يا_دهر
#علي_حسن_الكناني


معرف الخاص
https://t.me/Ali22kinani

رابط القناة
الشاعر علي حسن الكناني
لنشر القصائد الحسينية فقط
https://t.me/kinani16