به‌شێک له رێبه‌ری نه‌مر

هه‌رچی له ئاخێ ڕسکاوه
مه‌رگیشی بۆ داندراوه

مرۆ دێته سه‌ر زه‌مینێ
خۆشی و ناخۆشییان ده‌بینێ

هه‌یه ژیوه و هه‌ڵوه‌ریوه
هاوساشی پێی نه‌زانیوه

هه‌یشه به‌رز ده‌بێته‌وه
ناوبانگی ده‌ته‌نێته‌وه

حوکمی سه‌رزه‌مین داده‌گرێ
هه‌ر هێنده زله تا ده‌مرێ

جه‌لال و گه‌وره‌یی و شکۆی
به‌رپێوار ده‌بن له‌گه‌ڵ خۆی

زه‌مان ناوی ده‌سڕێته‌وه
له یادی یاد ده‌چێته‌وه

ئه‌وی مه‌رگ پێ ناوێرێ
ناچاره خۆی لێ ببوێرێ

هونه‌ره، مه‌ردایه‌تییه
به‌خشینه، ئازایه‌تییه

به‌زه‌یه به هه‌ژاراندا
وه‌فایه ده‌گه‌ڵ یاراندا

دژ وه‌ستانه له بێدادی
هه‌وڵ‌دانه بۆ ئازادی

بۆ هه‌ق روو به مردن چوونه
بۆ زاڵم سه‌رکز نه‌بوونه

خێوی هه‌ریه‌ک له‌و خدانه
نێوی به‌دوور له نه‌مانه

هه‌تا کۆن بێ گه‌شتر ده‌بێ
له ژین خاوه‌ن‌به‌شتر ده‌بێ

چ جای که گش لای یه‌کێ بێ
ده‌بێ ئه‌و هه‌ر ژیوه کێ بێ؟!
(هه‌ژار)