Ağrılar səngimir, xatirən haqqı
Yox... indi ayrılmaq vallah günahdı.

Çöldəki fevrala yaxşı-yaxşı bax
Gör bir qol saatında necə donur vaxt.

Bir də bundan belə ömrün buz içər...

Canından soyuq bir sızıltı keçər
Boşalar qolların, çiynin, biləyin
Qəfildən əl-qolun cismindən köçər.

Toplarsan özünü bütöv olarsan
Yalandan bir ailə, bir ev olarsan.

Mənim də ömrüm alınmaz, düzü
Bax bu əllərimlə itirdim bizi...

Sonra da hardansa, necəsə oldu:
Küçədə ətrini duyub duruxdum
Məni pis haqladı qoxu yaddaşı.
Yuxuda saçınla danışıb-güldüm
Üzünü gizlətdi yuxu yaddaşı.

Sonra yadırğadım süst qucağını...

...Məndə qalıb, gəl apar saç sancağını
Qolunu qoynunda cütləyib durma
Vida qucaqlaşmasıyçün aç "sancağını".

Sındır akvariumu - xatirəmizi
At səmaya uçsun o balıqları
Öyrət göy üzünə ayrılıqları.

Dinlə bu küləyi... bu son küləklə
Ömrümə ayrılıq nəfəsi gəlir.

...Sən o gün qapını elə örtdün ki,
İçimdən qapının küt səsi gəlir.

(c) Aqşin Evrən