كورونا 

يباب الحوائج هتف صوت الخدم     بجاه الشريعه الوكع يمهه العلم

بحق دم كربله   دعانه تقبله

* 


حضرنه انجمعنه  نقيـم التعزيه

بحزنه تواسي المدامـــع جاريه

وتنوح القصـــــيده وتون القافيه

جريحه وشجيه ابمصابك ناعيه

عقدنه النوايه وهتف صوت الحزن    حضرنه المصابك يمتيت بالسجن

يعالي المنزله    دعانه تقبله

** 


يباب الحوائج يســلطان الكرم

يقاضي الكلايف يوهاب النعم

اجينه وكلبنه اشكثر شايل ألم

دعينه وبجينه ونحلفك بالخيم

بجاه المصيبه وجمر ذاك العطش   ودموع العقيله وألم يوم اهدعش

ودموع العايله    دعانه تقبله

* 



عقيده وحقيقه نحـــــــــس بمأتمك

حضورك علينه وتشوف اليخدمك

تسمعه الينوح بحــــــــوائج كلمك

وداعك بدليله يموســــى وحشمك

يقين وعقيده ابد متـــــــرد طلب   اليمشي عليك الرضيع  الماشرب

ودمومه سايله     دعانه تقبله

**

بلطمنه ودمعنه بحضــــور الفاجعه

حوائج جثيــره ويســـــــألونه الدعه

عليك الكفيل الجفوفـــــــــه امكطعه

الكسر ظهر اخيه الوكع عالمشرعه

ابو فاضل الطاح صـــريع اعله النهر     الكسر كلب اخيه وحنى منه الظهر

بكفيل القافله    دعانه تقبله

****

تضرعنه ندعي وندك اعله الصدر

تزيح البلايا وتفـــــــــرج كل عسر

كرونا الغزانه مرض هذا العصــر

فزعتك علينـــــــــه وتعجلنه الامر

صبرنه ونتاني يمولانــــه الوعد       نحسه علينه اقترب يوم العهد

الوعد نتأمله     دعانه تقبله

****
أبو علي الركابي