نعي للأمام الكاظم عليه السلام

*

وداراك

الدهر مايوم ســــر كَلبك وداراك

ومن سجن الســجن فرك وداراك

وبعيد اصبحت عن اهلك وداراك

بطاموره وحبس حدر الوطـــــيه

***

وشالات

بعد ماظل دمــــــــع لاظــل وشالات

على الروحه بسجن فاضت وشالات

وحماميل ارفعت نعشـــــــه وشالات

وظلت عالجسر جثته رمــــــــــــــيه

****

ينازع وحــده والسجن مسدود

يعالج بالألـــم والجــبد ممرود

يصيح الله وكبر ياهـو موجود

وينه اليفك عن ســاكَي الكَيود


يصيح احــــاه ويفطر ونـــــينه

على الحيطان ويلي ايدير عينه

يلوج الوحــده  ويعـــرك جبينه

ويتكَلب علــى ايســـاره ويمينه


يحشم بخوتــــــــه وما يسمعونه

يهون كل ألـــــــم من يحظرونه

وكل كَيد البجسمه يفكــــــــــونه

ومن السجن موسى يطلعـــــونه


حس الكاظم بسـاعة وفاتـــــــــه

تشَهَد من عـرف خلصت حياتـه

كَبل روحـه واتغطه ابعباتـــــــه

غريب وبالسـجن صارت وفاتـه


صحيح انته متت فـــوك الوطيه

غريب وبالســجن شفت الرزيه

لاجن مومــــــــثل ذيــج العزيه

حسين المنذبــــــــح بالغاضريه


اهدومه امســــلبه وابلا عبايـــه

واصحابه امذبحه واهله ظحايه

واخته ام الخـــدر وي الســـبايه

تمشي اميســـــره وابــلا حمايه


ومحد كَطع راسك يبن جعفــــر

ولاجسمك بقى مطروح بالحــر

ولا بســــــــيوف عالغبره توذر

ولا ظلت علــــيك الخـــيل تفتر


ولا ونت بكترك هاشـــــــــــميه

ولا شافت اعيونك فاطمــــــــيه

تدفعه الزلم فـــــوك الوطــــــيه

ولاعندك مثل لوعة رقـــــــــيه