-----------

አይገባኝም...
ትኩስ ገላ ውስጥ የልብ ማርጀት
ውበት ነው? መርገምት?

አልረዳውም...
ለአበባ ፣ ለሰው ወድቆ መሸነፍ
መኖር ነው? መክሸፍ?

አይዘልቀኝም
ነፋሱን አምኖ መጎዝ በዱር በሜዳ
ነዋይ ነው? ዕዳ?

የቱን ልመነው?
ማንን ቀርቤ ልስማ
ተቀባዥሮብኛል
እሳት አለ ሆዴ...ውሃ ሚያስጠማ
:
በመገረም
በአፍ መክፈቴ
ወፍ ቢመገብ ከጥርሶቼ መሀል ገብቶ
በህይወት ሚሆነው ቢያንቆራጥጠኝ
በሀዘን ሆዴ ቢወጠር መልስ ማጣት ሽሉን ዘርገቶ
በቃ! አልኖርኩም ከቶ?
:
ውበት እና ትርጉም ማጣት መሀል
እድሜዬ የሽቦ ገመድ መስሎ ተወጣጠረ
በፀሀይ...በዝናብ ፍርርቅ
ያሰጣሁት ልቤ ተፈረፈረ
ለአይኔ ቢያሳሳኝ የሰው መግባት መውጣቱ
እንጀራ ቢሆነኝ የህይወት ኪነቱ
አቅፌ ባፅናናው የኑሮን ባዛናነቱ
ያስብላል ከነቱ?
:
ልጆች ባልወልድ
ርዕዮተ አለም ፅፌ ታሪክ ባልሰራ
ለሀገሬ ባልዘምት በዱር በጋራ
እሱማ ህይወቱን ኖሯል ለመባል
ጀግና እንዲያስብለኝ ስሜ ተጠቅሶ
አይበቃም ነበር?
ለሰው ድካም ግጥም የፃፍኩት
ለከተማዬ ያለቀስኩት ለቅሶ!