یئنه بو شهرده اوز-اوزه گلدیک
نئیله یک ، آیریجا شهریمیز یوخ
بلکه ده بیز خوشبخت اولابیلردیک
بلکه ده خوشبختیک خبریمیز یوخ
آرادان نه قدر ایل کئچیب ،گورن
تانییا بیلمه دیم منی باغیشلا
من ائله بیلیردیم سن سیز اؤلرم
من سن سیز اؤلمه دیم منی باغیشلا
"اولمه دیم"دئییرم ،نه بیلیم آخی
بلکه ده من سن سیز اولموشم ائله
قبیرسیز-کفن سیز اولموشم ائله
بلکه ده بیز اوندا آیریلماسایدیق
نه من ایندیکی ایدیم نه سن ایندیکی
آیریلدیق ، شئیطانی گولدوردوک اوندا
بو ایلین،بو آیین،بو گونونده کی
ائله بو کوچه نین بو تینینده کی
منی ده،سنی ده اولدوردوک اوندا
...ساغیمیز-سولوموز آدام لا دولدو
قول-قولا کیشی لر،قادین لار کئچیر
اوزوندن خبرسیز عومرونده مین یول
اوزونو اولدورن آدام لار گئچیر
کئچیر اوز قانینا قاتان آدام لار
بیر ده کی قان هانی؟
قان آخی یوخدو
هامی گوناهکاردی دونیادا اما
دونیادا هئچ کسین گوناهی یوخدو
بیزسیز یازیلمیشدی بو طالع، بو بخت
ساپانددان آتیلان بیر جوت داشیق بیز
بلکه ده دونیادا اون-اون بئش ایل یوخ
مین ایل بوندان قاباق آیریلمیشیق بیز
حالال یولوموزو دییشیب نسه
چاشمیشیق ، بیر اوزگه یولدان گئتمیشیک
بلکه ده مین ایل قاباق سهو دوشوب نسه
مین ایللیک بیر سهوه قوربان گئتمیشیک
دییشیب یئرینی بلکه قیش-باهار
قاریشیب دونیانین شهری -کندی
بلکه اوز بطنینده اوگئی آنالار
اوگئی بالالاری گزدیریر ایندی
عومروم باشدان-باشا یالاندی بلکه
طالئعیم باشقا ایمیش دوغرودان ائله
او یولدان اوتن قیز آنام دی بلکه
بلکه ده ، اوغلومدو بو اوغلان ائله
بو یالان عومرومده گورن سن نه سن؟
بلکه هئچ سئوگیلیم دئییلسن منیم
آنام سان، باجیم سان، ننه م سن، نه سن؟!..
بیرجه آللاه بیلیر نه ییم سن منیم
بیزی کیم آددادار بو آیریلیقدان
چاتماز آدیمیزا نه یول، نه کورپو
اولوسن، دیری سن، هر نه سن دایان!
دایان هئچ اولماسا الیندن اؤپوم...
دئییرسن : "اولویم، اولونو اوپمه "...
الیمین ایچینده سویویور الین
دئییرسن:" سن آللاه، الیمی اوپمه
الیمدن دئیه سن قان اییی گلیر...
#رامیز_رووشن
عرب الیفباسینا اویغونلاشدیران:
#آیسو_زنگانلی
@Sevgidanizi1
