我哋係一班因反送中同後續嘅抗爭而被捕還押咗一段時間嘅手足，知道牆外有唔少仍然未遺忘我哋嘅人，透過唔同嘅方式去關注牆內嘅手足，例如化身寫信師，旁聽師，送車師，或者捐錢、捐物資去唔同組織，呢份心意我哋係絕對感受得到，亦都心存無限感謝！ 但係畢竟大部分在囚手足都唔係備受注目嘅政治明星或者民主女神，如非走上呢條路，背負上呢個罪名，成為某些筆友信中所稱呼嘅「義士」之前，我哋都只係熱愛香港嘅平凡人，大眾媒體固然唔會花篇幅去報導藉藉無名，冇新聞價值嘅人，而牆外人想了解我哋嘅狀況，都只可以通過一啲不時扮演「在囚手足代言人」嘅政客喺報章上嘅三言兩語。因此我哋有一個想法，牆內手足與其被代言，由其他人一知半解地講我哋嘅故事，倒不如創立一個由我地自己做主導嘅平台，讓任何一位身在囚穿嘅手足以第一身去發言，呢個就係開啟Patreon 嘅原因。 我哋希望呢個Patreon Page成為一個供各在囚手足分享所思所想嘅平台，可以透過發佈文章、日記或者唔同類型嘅創作，去讓牆外了解我哋生活、想法同需要，令到在囚手足唔只係一個名字或者一個編號，而係以一個「人」嘅型態，有血有肉有温度咁呈現喺大家面前。 因應香港人現時生活喺國安法天下，處處是無形嘅紅線、陷阱，任何眾籌、集資隨時都會引來政權嘅無理打壓，為免替訂閱者同呢個Patreon Page 嘅管理人員招來不必要嘅麻煩，我哋特此聲明呢個平台並非用作眾籌之用，而所有訂閱和作品分享帶來嘅一切收入，都會留待參與嘅在囚手足之後共同決定用途。