Мақтымқулы

САЛАР ҚУСЫН АҢЛАМАС

Бәдҳасылға беглик жетсе бир күнде –
Алар аўын, салар қусын аңламас.
Ҳүкими жүрип турған мийримсиз беглер
Пуқараның көзде жасын аңламас.

Билгир баслар туўры жолға шын менен,
Ақыл жигит сөз басламас «мен» менен,
Нәмәрт олдур – кеңес әйлер  зән   менен
Ғош жигитлер зән кеңесин аңламас.

Мәрттен тилек етсең – айтар: «Қуп болар!»,
Бир иҳсаннан жетпис бәле қайтарлар,
Қатынек кеңеси үйде көп болар,
Душпан көрсе – қылар исин аңламас.

Ҳақ жолында ҳәр ким хайр-иҳсан қылар,
Қыйамет күни бир орнына он келер,
Нәмәрт душпан көрсе ғуссадан  өлер,
Ғош жигитлер төртин-бесин аңламас.

Мақтымқулы, бег жанында тил баслар,
Қылышы-ғайраты менен ел баслар,
Мәрттен туўған жығын көрсе жол баслар,
Нәмәрт улы теңи-тусын аңламас.

Қарақалпақшалаған                      Сағынбай ИБРАГИМОВ