خونمون به داٛیٱک... ٱندکا
دٱم پوؽیز که إبۊ ز سٱر شوم یه لوئر سٱردؽ إگرمون. تیام جٱخدؽ گٱرم آبی ڤ خۉ، دٱم دٱما سوڤ زی، پیش خورۊسخون، ز قومشت هۊفناک سوڌا زمین یٱ گٱز ز لا جا بول گرؽڌوم( ایما عٱشایریم منه هٱف دل خۉ هٱم که بۊیم ز کوچیرتٱرین سوڌا إؤورستیم.) إگوی إخاست زمین جومشت بیائه...
تا بونڳ زؽنه کردوم: "پٱریناز... پٱریناز... پٱلاته بوریڌی سی موردیٱل ؤوری تازه تۊ پولوفه ری بٱچیٱلوم..."
آقا که تو بۊی، یٱ دۉ دیڌوم زمین زؽر پام اۉاٛی ڤ پیت خٱردݩ. جۊر تٱئڌه بورد و ٱؤردمون. یٱ ؤلا إبوردمون چونوݩ یه دۉ ایٱؤردمون چینوݩ...
منه هٱمی یو روندوم ڤ دور کوچیره( خٱندی) ۉ غارنیڌوم ڤ زؽنه...
هو هٱم ؤا تیا خۉآلۊ، هراسی تیا پر هاٛی نیٱشت بؤینه چه ؤابیڌه.
گوڌوم زؽنه چل کورومه بگه خوته بکوݩ به سٱئرا تازه گرفتار إبۊیم هٱمیچو ۉ پا یک جستیم دٱر.
بونڳ لیک و لاک ؤریستا ز چارغر آباڌی. پا یٱک گایٱل إبورنیڌن. سٱیٱل إؤٱقنیڌن. هٱر إزارنی. بنڳشتوݩ إؤاٛیڌن ؤا سوڌا. مورغ، تیل، پلیش ؤٱست به آباڌی. پٱریناز چفکلۊگ زاٛی ری گل خٱندی و کاٛیخوسرۉ نه چنڳ زاٛی کرد آ بغٱل ؤا سوڌا گرؽڌه هاٛی إلکنی ؤو ریا نه کٱند...
هونهآ ایچو پای ز چیر هوشکه ؤو شاخ و بٱلٛ ٱندۉؽیڌه ڤ کٱئگله، دٱیومی نڌاره. هٱرکه فلیکست جون ڤ دٱر ایکونه، هٱرکی هٱم مٱند ؤا زؽر بٱرد و چۊ مٱیڌسه درارن.
یا سولتون براٛیم چونوݩ بورد و ٱؤردمون هٱرچه منه آباڌیه پای کوپ آبی. بٱرد چیر پولوفست ری هاٛیؤنون. کیک و چر ؤریستا. یٱ بٱڌبٱختی گرؽڌمون که تٱمومی نڌاشت.
سٱفیڌه زاٛی. رۊز گرؽڌمون. جٱخت مٱئلۊم که چه ؤابیڌه. ظلم گرون. یا شا قاسوم کٱم طاقت.
آباڌی دٱرگٱشت. هونهآ بٱرد چیری سٱر جا خوسون کوپ آبیڌن ری زٱن و بٱچه مٱردوم. یه پیت و قر لیشی گرؽڌمون...
بیست هونه هڌیم. پیایٱل بونڳ یٱکڌی کردن جٱم آبیڌیم یٱکی یٱکی هونهآ نه گٱشتیم بؤینیم چه ؤابیڌه مؽنه ایݩ هٱمه زمین جومشت. هٱر هونهاؽ که کٱسی نه زؽر آؤار بڌاشت ٱمداڌ إطلبی، إجستیم بارت هو...
تاته، دالۊ دراؤردیم. زؽنه، دوئڌٱر، جغله بٱچه...
بگه جونسون ڤ یو بی پا رٱختخۉ، کوموڌ یا گاز به خۉ بیڌن، ٱلحمدلله کوشت و میر نڌاشتیم ٱما تا دلت بخو سٱر، دٱس، پا إشکٱنده ؤو خینالی داشتیم...
إخبار رٱسی هٱرچه آباڌی دۉر با خومونه پای دٱرگٱشتنه. جۊر خومون زٱئم دارن.
ؤٱرگٱشتوم تاٛی زؽنه. فٱقیر ؤا کٱڌ بوریڌه داشت دٱرف و دۊلا هٱرچه سالوم مٱنده جٱم و جلنڳ إکه.
دوتاؽی شورۊ کردیم به ؤورداشتن بٱرد و چۊ ز ری هونه زندؽیمون. هٱرچه خۊ بی ؤا داشتیم هٱرچه هٱم ز باٛیݩ رٱئڌ خو دی رٱئڌ.
نهنڳ زوئر جٱخت ز بارت هلال ٱئمٱر[ احمر] اۉاٛیڌن دٱک دٱؤا کونن مٱردمون فٱقیر هیچی نڌاره. که اومۊرات زندؽیسون ز چارتا میش و بوز إگوڌٱرته...
پٱ نمایٱنده کوینه؟ ٱی رٱی بخاست ز یٱ سال نهاتٱر[ جلۉتٱر] لکمونه ؤل نیکه. ٱمرۊ که ایما دٱرمٱنده و پٱئلی إشکٱندهایم هیشگی ؤا دیارمون نیا.
اوسو هٱم که ؤا یه کوت آڌوم و فیلمؤٱردار ایا( که غاٛیرا ز خوسون فیلم إگره) تازه ؤا خینریزون کونی نهاسون[ جلۉسون]، کؤاؤ سیری هٱم إخورن یٱ موست تٱل و دورو کونه. خوڌافز، خوڌافز...
پٱ یٱئنی إگوی ایما ز کافرون کوهیم؟ سٱر کی نه بوریدیم؟
یه کومٱکی ز ایما کونین. ری ڤ سٱرماؽیم. سٱرپناهی نڌاریم. زٱن و بٱچه ریتٱنیڌه ؤا بال تٱش دٱک زٱنه تا رۊز بگرمون.
ایما هم سجلتمون ایرانیه• محمد گُلگیری
پ.ن: کلمات داخل[ ] از متن اصلی هستند
🔰 لری بختیاری
@Lurishsongs