***
Қизғалдоқдай бир қиз хаёлин,
Хаёлингга чоғламиш булбул.
Оловланиб ёлқинли ёли,
Ёраб, қанот боғламиш дулдул.

Бунча гўзал бўлмаса дунё,
Бунча майин эсмаса шамол,
Ғофилликдан уйғондингми ё,
Уйғотганда ул соҳибжамол.

Андишадан тўсилган сарҳад,
Сароб янглиғ уфққа сингар.
Минг йилларким мерос муҳаббат
Ифорлари сени ҳам енгар...

Адо бўлиб ишқнинг қасдидан,
Оҳларингни тошларга битсанг.
Энг ёруғ бир юлдуз остида,
Дунё билан бир бўлиб кетсанг...

Одил ҲОТАМ
t.me/Odil_Hotam