Одил Ҳотам

***
Ўроз ҲАЙДАРга

Юлдузини йўқотиб сўлар,
Пайпасланиб кезган қуюқ тун.
Иккимиздан кўп нарса тилар,
Қаршимизга келган янги кун.

Сўнгги кунки… Асло қайтмайди,
Айтиб кечмиш интиҳосини.
Биз айтмасак – бизга айтмайди,
Юракларниинг илтижосини .

Кўчаларнинг тошқин сатҳида,
Тўлқин-тўлқин тошган тилакдир.
Илтижолар қилмоқ пайтида,
Балки, жиндай кўз ёш керакдир…

Ширин сўзлар лозим, эҳтимол ,
Лозим яна ширин табассум.
Ҳароратдан бўлиб масту лол,
Елкамизда куйласа маъсум…

Биз-чи, унга ташламай назар,
Остонада қолдирган кўйи.
Бир-бировдан қилгандай ҳазар,
Дайдиб юрдик бесуз кун бўйи.

Ёруғликка интилган бедор,
Сўзлар тошдай аста чўкди-да.
Қолиб кетди айтилмай бекор,
Биз ҳўплаган қадаҳ тубида.

Манзилига энди етолмас,
Оқшом аро қизарган булут.
Мени кутиб ётар столда,
Сўнгги рейсга олинган билет.

Бундан ўзга сўнгги кун нетар,
Эҳсонини оламан ўктам.
Унинг ўзи қолдириб кетар,
Тағин қайтиш билетини ҳам…

Одил ҲОТАМ
t.me/Odil_Hotam

Навоий вилоятида Одил Ҳотам ижод мактаби очилиши керак деб ўйлайман. Қарийб ярим аср "Кармана овози" газетаси қошида "Чашма" ижодий тўгарагига раҳбарлик қилди, ёш ижодкорларга йўл-йўриғ кўрсатди.
Умуман Навоий вилояти ижодий муҳити ҳақида гап кетганда, бу инсонни эсламай илож йўқ.

t.me/Feruz_Nematullayev

ҲАЛОЛ СЎЗ

Чин сўзни ҳар недан қўйганча устун,
Кулажак кўзингда ҳайрат юлдузи.
Ҳақиқат энг олий амалинг бутун,
Меҳнаткаш отангнинг йўл кўрар кўзи.

Ҳақ сўзнинг залвори тоғдан ҳам оғир,
Вале, шоир қалби унга тарозу.
Биров тик боқолмай кўзлари оғрир,
Биров тақдирига ичирар оғу.

Борлиқ вужудидан ҳорир ўт-ўлан,
Тийрамоҳ турналар карвонин тузар.
Ўз ўрнига қайтар яна тонг билан,
Ҳар кун тушларингга кирган Тоғгузар.

Синовлар занжири мисли чирмовиқ,
Ва ё аждаҳодай тортар домига.
Эътиқодинг, сабринг, иймон – жон қавиқ –
Қўлинг чўзиқ қуёш – ҳаёт жомига.

Ҳақ сўз, ҳалол сўзинг, бошинг эмас хам,
Фарзандлар, шеърларинг боринг, йўғингдир.
Шоир қавми ичра дўстим, сенинг ҳам,
Навоийдан қолган қалам ТУҒИНГДИР.

Чағирлар қаҳридан титрагай очун,
Кимни жабр сийлар, кимнидир сафо.
Лабингда табассум, кўзларинг маҳзун,
Ўзинг ҳам дўстлардан кўрдингми вафо?!

Илҳом лаҳзалари илоҳий тортиқ,
Йўлларингни ювар ёмғир, дўл шаррос.
Таъриф-тавсифларни хушламай ортиқ,
Жилмайганча дейсан: “ Вафоман, холос...”

Одил ҲОТАМ
____

ОДИЛ ҲОТАМ

Карманада қирқ йил баҳорни кутди,
Сочларига қўнди ўрикнинг гули.
Ким шеър деса унга қалбини тутди,
Кимларга кўрсатмаган шеърнинг йўлини.

Хаёлин чўққисида яшар Кавоби,
Болаликдек маъсум, сўнгсиз, бетакрор.
Тошкент сари кетган йўллар рубоий –
Дунёнинг ҳақиқатин этади изҳор.

Қадим гузар софдил, тутади журъат,
Саҳардан шом ораси нафс отли ўзга.
Азизон хонақоҳи бетимсол ҳикмат,
Мир Саид Баҳром боғи қўлида кўза...

Бунда Улуғбекни учратгани бор,
Тож кийиб ер қаъридан кўз узмас даҳо.
Лойқа Зарафшоннинг рошида бедор,
Мискин бир армонга ботади гоҳо.

Балки шунинг учун хотири қутлуғ,
Очиқ хонадони Сўзга бир бекат.
Юксак бир орзу билан у кўтарган туғ –
Иймон буюргани билмагай сарҳад!

Лайлаклар Хончорвоққа интилар ҳамон,
Барно, Бектемирнинг рангин девони.
Не бўлса ҳам занжир узган бу карвон,
Вафонинг ҳам ўсмир чоғин сарбони –

Карманада қирқ йил баҳорни кутди,
Маънога ўгириб қисмат дўлини.
Дунё ўзгаради шуъладан бутун,
Бир бор ўқисайди унинг кўнглини!

Вафо ФАЙЗУЛЛОҲ