NUG အဖွဲ့က ထုတ်ပေးသည့် ယာယီဆေးပညာဘွဲ့လက်မှတ်အား နိုတြီပြုလုပ်ပေးမှုဖြင့် နိုင်ငံခြားရေးဝန်ကြီးဌာနမှ ဒုညွှန်မှူးတစ်ဦး၊ ရုံးအုပ်နှစ်ဦး အပါအဝင် ခုနှစ်ဦးဖမ်းဆီးခံရ
NUG ၏ ယာယီဆေးပညာဘွဲ့လက်မှတ်ဖြင့် UAE နိုင်ငံတွင် ဆက်လက်ပညာသင်ကြားရန် နိုတြီပြုလုပ်ပေးခဲ့သည့် နိုင်ငံခြားရေးဝန်ကြီးဌာနမှ ဒုတိယညွှန်မှူးတစ်ဦး၊ ရုံးအုပ်နှစ်ဦး အပါအဝင် ခုနှစ်ဦး ဖမ်းဆီးခံရကြောင်း သိရသည်။
ယင်းသို့ဖမ်းဆီးခံရမှုမှာ၂၀၁၁ ခုနှစ်မှ ၂၀၁၉ ခုနှစ်အထိ ဆေးတက္ကသိုလ်(မန္တလေး)၌ ပညာသင်ကြားခဲ့သော ဒေါ်ကေဇင်ထွန်းသည် ကလေးဆေးရုံကြီး(မန္တလေး)နှင့် မန္တလေးဗဟိုအမျိုးသမီးဆေးရုံကြီးတို့တွင် အလုပ်သင်ဆရာဝန်အဖြစ် တာဝန်ထမ်းဆောင်ခဲ့ကြောင်း၊ ၂၀၂၀ ပြည့်နှစ်တွင် ဆေးတက္ကသိုလ် (မန္တလေး)မှ ဆေးပညာဘွဲ့လက်မှတ်ရရှိခဲ့ပြီး ဆက်လက်တာဝန်ထမ်းဆောင်ခဲ့ခြင်းမရှိဘဲ ပြည်ပသို့ တရားမဝင်ထွက်ခွာသွားခဲ့ကြောင်း၊ ၂၀၂၄ ခုနှစ် နိုဝင်ဘာလတွင် NUG အဖွဲ့လက်အောက်ခံ တရားမဝင်ဆေးတက္ကသိုလ်(မန္တလေး)၊ ယာယီတက္ကသိုလ် ကောင်စီနာယက(Disloyal Civil Servant-DCS) ဖြစ်သူ ဒေါက်တာဦးခင်မောင်လွင် (ဆေးတက္ကသိုလ်- မန္တလေး၊ ပါမောက္ခချုပ်အဖြစ်မှထုတ်ပယ်ခံထားရသူ)က တရားမဝင်ထုတ်ပေးခဲ့သည့် ယာယီဆေးပညာဘွဲ့လက်မှတ်ဖြင့် ဒူဘိုင်းမြို့တွင် ဆက်လက်ပညာသင်ကြားရန် အတွက် တရားမဝင်လျှောက်ထားခဲ့ကြောင်း သိရသည်။
၂၀၂၅ ခုနှစ် မတ် ၄ ရက်တွင် ဒူဘိုင်းမြို့ရှိ The Data flow Group Company မှ ဒေါ်ကေဇင်ထွန်း၏ ပညာဆက်လက်သင်ကြားရန်လျှောက်ထားမှုနှင့်ပတ်သက်၍ သံသယရှိသဖြင့် ယာယီဆေးပညာဘွဲ့လက်မှတ်အား အတည်ပြုပေးနိုင်ရန် မြန်မာနိုင်ငံရှိဆေးတက္ကသိုလ် (မန္တလေး)သို့ အကြောင်းကြားလာခဲ့ကြောင်း၊ အဆိုပါ ယာယီဆေးပညာဘွဲ့လက်မှတ်အား တာဝန်ရှိသူများက စိစစ်ခဲ့ရာ NUG အဖွဲ့လက်အောက်ခံ တရားမဝင် ဆေးတက္ကသိုလ်(မန္တလေး)က ထုတ်ပေးသည့် ယာယီဆေးပညာဘွဲ့လက်မှတ်(အတု)ဖြစ်ကြောင်း သိရှိရသည့်အတွက် ကျန်းမာရေးဝန်ကြီးဌာနသို့ ဆက်လက် သတင်းပို့တင်ပြခဲ့ကြောင်း သိရသည်။
ဒေါ်ကေဇင်ထွန်း၏ ယာယီဆေးပညာဘွဲ့လက်မှတ်(အတု)ပြုလုပ်ပေးခဲ့မှုနှင့်ပတ်သက်၍ စိစစ်ရန်အတွက် ၂၀၂၅ ခုနှစ်၊ မတ် ၅ ရက်တွင် ရန်ကုန်တိုင်းဒေသကြီး၊ ကျောက်တံတားမြို့ နယ်ရှိရွှေပြည်အောင် နိုတြီဆိုင်ပိုင်ရှင် ရှေ့နေ ဦးလှဝင်း၊ လပြည့်ဝန်း နိုတြီ ဆိုင်ပိုင်ရှင် ဦးဇာနည်လွင် (ခ)လပြည့်နှင့် နိုင်ငံခြားရေးဝန်ကြီးဌာန၊ ကောင်စစ်ရေးရာနှင့်ဥပဒေရေးရာဦးစီးဌာန၊ နိုတြီဌာနစိတ် (ရန်ကုန်)မှ ဒုတိယညွှန်ကြားရေးမှူး ဦးအောင်ကျော်မိုးတို့ သုံးဦးအားလည်းကောင်း၊ မတ် ၆ ရက်တွင် နိုတြီ ဌာနစိတ်(ရန်ကုန်)မှ ရုံးအုပ်များဖြစ်ကြသော ဦးနိုင်နိုင်လတ်နှင့် ဦးမောင်မောင်ချစ်စန်းဦး၊ ကျော်တံတားမြို့နယ်ရှိ အောင် နိုတြီ ဆိုင်ပိုင်ရှင် ဒေါ်အေးသီတာနှင့် ဆိပ်ကြီးခနောင်တိုမြို့ နယ်ရှိ Angel Online Notary Service လုပ်ကိုင်သူ ဒေါ်အိလဲ့လဲ့ထွန်းတို့ လေးဦးအားလည်းကောင်း ထိန်းသိမ်းဆောင်ရွက်ခဲ့ကြောင်း သိရသည်။
ထို့နောက် ထိန်းသိမ်းခဲ့သူများအား စိစစ်ရရှိချက်များအရ ၂၀၂၄ ခုနှစ် နိုဝင်ဘာလတွင် ဒေါ်ကေဇင်ထွန်းက ဒေါ်အိလဲ့လဲ့ထွန်း(Angel Online Notary Service)အား ဆက်သွယ်၍ ၎င်း၏ NUG အဖွဲ့ လက်အောက်ခံ တရားမဝင်ဆေးတက္ကသိုလ်(မန္တလေး)မှ ယာယီဆေးပညာဘွဲ့ လက်မှတ်(အတု)အား နိုတြီ(သက်သေခံချက်)ပြုလုပ်ပေးရန် ငွေကြေးပေး၍ စေခိုင်းခဲ့ကြောင်း သိရသည်။
ယင်းနောက် ဒေါ်အိလဲ့လဲ့ထွန်းက ဒေါ်ကေဇင်ထွန်း၏ဘွဲ့လက်မှတ်(အတု)အား နိုတြီ (သက်သေခံချက်)ပြုလုပ်ရန်နှင့် နိုတြီ ဌာနစိတ်(ရန်ကုန်)မှ ထပ်ဆင့်လက်မှတ်ရရှိရန် ဦးဇာနည်လွင် (ခ)လပြည့်(လပြည့်ဝန်း နိုတြီဆိုင်ပိုင်ရှင်)အား ငွေကြေးပေး၍ ထပ်မံစေခိုင်းခဲ့ကြောင်း၊ ဦးဇာနည်လွင်(ခ)လပြည့်သည် ၎င်းနိုတြီ (သက်သေခံချက်)(အတု)အား ရှေ့နေ ဦးလှဝင်း(ရွှေပြည်အောင် နိုတြီဆိုင်ပိုင်ရှင်) ထံသို့ ငွေကြေးပေး၍ ရှေ့နေလက်မှတ်ရေးထိုးစေခဲ့ပြီး ဒေါ်အေးသီတာ(အောင် နိုတြီ ဆိုင်ပိုင်ရှင်)နှင့်ချိတ်ဆက်၍ နိုင်ငံခြားရေးဝန်ကြီးဌာနမှ ထပ်ဆင့်လက်မှတ်ရရှိနိုင်ရန် ငွေကြေးပေး၍ စေခိုင်းခဲ့ကြောင်း၊ ဒေါ်အေးသီတာသည် ၎င်းနိုတြီ(သက်သေခံချက်)(အတု)အား နိုင်ငံခြားရေးဝန်ကြီးဌာန၊ နိုတြီဌာနစိတ် (ရန်ကုန်)တွင် လက်မှတ်ရေးထိုးနိုင်ရန် ပွဲစား ဒေါ်ခိုင်ခိုင်(ထွက်ပြေးတိမ်းရှောင်)အား ငွေကြေးပေး၍ စေခိုင်းခဲ့ကြောင်း သိရသည်။
အဆိုပါပွဲစား ဒေါ်ခိုင်ခိုင်(ထွက်ပြေးတိမ်းရှောင်)သည် ဒေါ်ကေဇင်ထွန်း၏ နိုတြီ(သက်သေခံချက်)(အတု)အား Notary ဌာနစိတ်(ရန်ကုန်)မှ ထပ်ဆင့်လက်မှတ်ရရှိရန် ရုံးအုပ် ဦးမောင်မောင်ချစ်စန်းဦးနှင့် ရုံးအုပ် ဦးနိုင်နိုင်လတ်တို့အား ငွေကြေးပေး၍ ဆောင်ရွက်စေခဲ့ကြောင်း၊ ရုံးအုပ် ဦးမောင်မောင်ချစ်စန်းဦးနှင့် ရုံးအုပ် ဦးနိုင်နိုင်လတ်တို့မှ နိုတြီ(သက်သေခံချက်)(အတု)အား ဒုတိယညွှန်ကြားရေးမှူး ဦးအောင်ကျော်မိုး ထံသို့ ဆက်လက်တင်ပြခဲ့ကြောင်း၊ ဒုတိယညွှန်ကြားရေးမှူး ဦးအောင်ကျော်မိုးမှ ငွေကြေးရယူ၍ ၎င်း နိုတြီ(သက်သေခံချက်)(အတု)အား လက်မှတ်ရေးထိုးပေးခဲ့သည်ကို စိစစ်တွေ့ရှိရကြောင်း သိရသည်။
Website Link - - - >>>
https://news-eleven.com/article/300985
