БИР ЖЫЛ БОЛДЫ

Жигит едим ҳәр муқамға қулпырған,
Мәнсиз күнге өз өмирин толтырған.
Бул өзгерис көптен емес, былтырдан,
Себеп маған таўдан асып бах келди...

Болған менен жолларымда жолдас көп,
Шыннан жебеп туратуғын қолдас жоқ.
"Енди саған үй болмасаң болмас!" деп,
Қайлардан-дур кеўилиме шәрт келди...

Излеп-излеп таптым сахыйбжамалды,
Көп узамай сүйгенимди тән алдым.
Қарар етип Сени қорқпай таңлаўды,
Ойлап көрсем жүрегим де мәрт келди...

Қабыл еттим Тәңиримниң сыйы деп,
Нур таратып жүрдиң соннан үйимде.
"Үйленерсең... Үй болыўың қыйын!" деп,
Даналардың айтқан сөзи ҳақ келди...

Мәжгүн болдым әп-әнедей шайырдан,
Тап Сениң де Өжеттен жоқ айырмаң.
Таўып қосқан тәғдириме қайылман,
Минезиң де минезиме шақ келди...

Бир жыл болды, үлгериппен көниўге,
Жол қалмады ҳәр муқамға дөниўге.
Мине бүгин бөпемизди көриўге,
Сүйиклим, Отыз биринши Март келди...

Өжет Байназаров
31-март, 2023-жыл
t.me/baxadir_baynazarov