كدامي موتي وهالتراوالي
يابو الحسن عينك على اطفالي

خل تغفة عيني.. وعندي راحة بال

###############################

ياحيدر اعيونك على السباحة
خليني اغمض عيوني بس مرتاحة

لاتبجي يمهم..اكعد وسطهم
بحنيتي ضمهم

ضمهم بجفك يبو اجفوف الحنان
وانته بس بمجاني لتسد المجان

ليل الدمع لو سير اعليهم
امسح دمعهم لاتبجيهم

مو همة روحي .. وعندي راحة بال
###############################

من يوم شفتك وانه ما خالفتك
مطاوعتك بنضراتك وسالفتك

بس عندي جلمة..كلبك تلجمة
ابريني ذمة

رايدة اتحاللني يالكلبك يحن
ادري موتي ايذبل عيونك حزن

لاتبجي من تنظر وضع زينب
تدريني من كبري وعليهة انحب

نزلني كبري ..وعندي راحة بال

###############################

يم الحسن وحسين ضل كل همي
اواحدهم ايسألك علي وين امي

الماترجع امهم..بالله شتكلهم
ويبطل دمعهم

انه عدهم نفس ليروح ويرد
لاتكلهم نامت ابوسط اللحد

كلهم اذا رادو يشوفوني
مو موت نوم الغمض عيوني

خلهم يجوني..وعندي راحة بال

###############################

بلفت الجفن حط عينك بنص عيني
وخل صورتك للمكبرة توديني

ابفلت عشرتي ..ختضل نضرتي
الوجهك ذكرتي

خل اروح الكبري وانتة ابالي
اهناك بس طاريك اليحلالي

من وجهك ارد اخذ ولو نضرة
بليلة وحشتي تصير للذكرة

ذكرك اماني ..وعندي راحة بال
###############################
شيعني باليل انه احب السكتة
وعليه ليهل الترب بس انتة

ومرلي اعلة كبري ..طيبلي كسري
مشتاكة تدري

ضيف روحي سير اعلة المكبرة
الخاطر ايريد اليطيب خاطرة

حط ايدك اعلة الكبر حسسني
راحة البال ابتربتي اتمرني

ايطيب جروحي ..وعندي راحة بال
###############################
ذوالفقار الزيدي