စစ်ဘက်ဆိုင်ရာဆက်ဆံရေးကို ပိုမိုအားကောင်းအောင် လုပ်ဆောင်ဖို့ တရုတ် နဲ့ အီရန်တို့ သဘောတူညီမှုရရှိ

NOM ဧပြီ ၂၈၊ ၂၀၂၂။

စစ်ရေးနယ်ပယ်အပါအဝင် ဘက်စုံပူးပေါင်းဆောင်ရွက်မှုတွေကို ပိုမိုဖွံ့ဖြိုးတိုးတက်စေဖို့ တရုတ်နဲ့ အီရန်တို့က မနေ့က သဘောတူညီခဲ့ကြပါတယ်။ အီရန်သမ္မတ Raisi နဲ့ အီရန်ကိုအလည်အပတ်ရောက်နေတဲ့ တရုတ်နိုင်ငံတော်ကောင်စီဝင်နဲ့ ကာကွယ်ရေးဝန်ကြီး
ဗိုလ်ချုပ်ကြီး Wei Fenghe တို့ တီဟီရန်မှာ ဆွေးနွေးအပြီး သဘောတူညီခဲ့ကြတာပါ။

အီရန်က တဖက်သတ်ဝါဒ၊ အသွင်တူဝါဒနဲ့ ပြင်ပဝင်ရောက်စွက်ဖက်မှုကို ဆန့်ကျင်ပြီး တရုတ်ကို အခိုင်အမာထောက်ခံတယ်လို့ Raisi က ပြောကြားခဲ့ပါတယ်။ ပြီးခဲ့တဲ့ ခက်ခဲတဲ့ကာလတွေအတွင်းမှာ အီရန်ကို တရုတ်ရဲ့ ပံ့ပိုးကူညီပေးခဲ့မှုတွေအတွက်လည်း ကျေးဇူးတင်
ကြောင်း Raisi က ပြောဆိုခဲ့ကာ တရုတ်ကတော့ အီရန်နဲ့ သူတို့ဟာ ရှေးကျတဲ့ယဉ်ကျေးမှုဓလေ့ထုံးတမ်းတွေအရ ချစ်ကြည်ရင်းနှီးမှုက ပိုမိုခိုင်မာလာတယ်လို့ ဆိုခဲ့ပါတယ်။

ပြီးခဲ့တဲ့နှစ်တွေမှာ တရုတ်နဲ့အီရန်ကြား စစ်ဘက်ဆိုင်ရာပူးပေါင်းဆောင်ရွက်မှုတွေကို ပိုမိုပြုလုပ်ခဲ့ကြပြီး တရုတ်က အီရန်စစ်တပ်ကို ပိုမိုမြင့်မားတဲ့အဆင့်တခုကိုရောက်အောင် ပံ့ပိုးကူညီပေးမယ်လို့ ဗိုလ်ချုပ်ကြီးဝေက ပြောဆိုခဲ့ပါတယ်။ အီရန်လက်နက်ကိုင်တပ်ဖွဲ့
အကြီးအကဲ Mohammad Bagheri နဲ့လည်း တွေ့ဆုံခဲ့ကြသလို အီရန်ကာကွယ်ရေးဝန်ကြီး Gharaei Ashtiani နဲ့လည်း စကားပြောခဲ့ကြတယ်လို့ သိရပါတယ်။

ဒီတွေ့ဆုံမှုတွေမှာ နိုင်ငံတကာနဲ့ ဒေသတွင်းလုံခြုံရေးအခြေအနေတွေကို အပြန်အလှန်ပြောဆိုခဲ့ကြပြီး အီရန်နူကလီးယားအရေးနဲ့ ယူကရိန်းပဋိပက္ခကိုလည်း ဆွေးနွေးခဲ့တယ်လို့ တရုတ်မီဒီယာတွေက ဆိုပါတယ်။ သဘောတူညီချက်အရ နှစ်နိုင်ငံစစ်တပ်ရဲ့
မဟာဗျူဟာမြောက်ဆက်ဆံရေးတွေ ပိုမိုအားကောင်းလာစေဖို့ ပူးတွဲစစ်ရေးလေ့ကျင့်မှု၊ ဝန်ဆောင်မှုနဲ့ လက်နက်တွေဖလှယ်ဖို့ကို သဘောတူညီခဲ့ကြပါတယ်။

NOM
Telegram - https://t.me/nomworldnews