Шиллиқурт сингари имиллар тақдир,
Соатига қараб айланар фалак.
Тангри нимаики яратмиш - бари,
Бизларни рўбарў этолмай халак.

Ҳаловати учган сайёраларнинг -
Яқин-йироқ бўлиб ненидир излар.
Дарёлар келтирган хабардан ранжиб,
Ўзини соҳилга отар денгизлар...

Қисматим томирдек турибди бўртиб,
Юрак дўқ уради бериб ишора.
Жоним - учрашувга берилган чипта,
Умрим - сени топмоқ учун бир чора.

Келгин, яшамоқнинг нуфузи ошсин,
Камайсин минг йиллик ҳасратнинг божи.
Тушун, сенга боғлиқ менинг гуноҳим,
Сенсиз покланишнинг йўқдир иложи...

(с)Шуҳрат  Ориф