Чизги

Кутубхона. Ўликлар макони.
Тириклар сиғмайди бу ерга.
Қоғозлар сўзлашар валдираб
Муаллиф жўнаган қабрга.

Жимжитлик. Жин урсин сукунат!
Сунъий ҳаво гўё шаббода.
Аҳволимни маҳбуслар кўриб
Тутиб кетар қўлимга бода.

Газета, журналлар -- жўралар
Кулишмас, на қаҳ-қаҳ урарлар.
Сиёсат юритиб ёнимда
Кўзимга бақрайиб турарлар.

Анъана йўқолган замонда
Атласлар деворда ҳилпирар.
Деворлар йўқолган маконда
Ҳайкаллар негадир қимирлар.

Жон кириб кетдими, ёпирай?!
Ким эди бу яримта ҳайкал?
Тепакал бошидан ўргилай
Зўр берилган экан-ку, сайқал!

Кутубхона, мен кетдим яхши қол
Тўғриси, нафасим бўғилди.
Наилож ташаккур айтаман
Яна бир янги шеър туғилди.

Ошиқ Дарвеш
09.06.2022

@oshiq_darvesh