РАҚҚОСАГА
Даврага тортма , санамжон, қўлимдан тутма, қўйгил,
Сиқма кўнглим дастрўмолин, шаллобо бўлсанг керак,
Табассуминг билан бугун даврани забт этдинг, гул,
Ўқима, дард дафтаримни булут каби тўлсанг керак,
Дардларимни тишда тишлаб, толиқдим кулмоқ истагим,
Фасл кўрмай қишда қишлаб, зориқдим,
кулмоқ истагим,
Сўнги йўқ ишда ишлаб, ичикдим, кулмоқ истагим,
Бир нуқтага боқиб кулдинг, бир нима билсанг керак.
Парпираган кўйлакларинг алвонида кўзим қолур,
Пирпираган киприкларинг айвонида
сўзим қолур,
Дилга боқсам, на қувончу, на тантана, базм қолур
Замон сенга боқмаса, гул каби сўлсанг керак.
Эгнингдаги ҳарирингдан зарлар чўчиб турибди,
Гули гулга қўшилолмай ранги ўчиб турибди,
Бир дардинг бор, кулсанг ҳамки, қайғунг кўпчиб турибди.
Сен ҳам мендек эй раққоса, ёлғондан кулсанг керак.
Ўқима, дард дафтаримни булут каби тўлсанг керак.
Ҳафиза ЭГАМБЕРДИЕВА,
11.09.2021